कान्तिपुर हिरो हाफ म्याराथन विजेतालाई स्कुटर

कान्तिपुर संवाददाता

काठमाडौं — सातौं कान्तिपुर–हिरो हाफ म्याराथनमा महिला र पुरुष दुवैका विजेताले ५० हजार रुपैयाँसहित स्कुटर पाउने भएका छन् । छैटौं संस्करण विजेताले ५०–५० हजार मात्र पाएका थिए ।

सातौं संस्करण फागुन ७ मा हुने मंगलबार पत्रकार सम्मेलनमार्फत् आयोजक कान्तिपुर पब्लिकेशन्सले जनाएको छ । यसपालि पनि २१ किलोमिटरको हाफ म्याराथन, ह्विलचेयर (३ किमि) र कर्पोरेट–मिडिया (५ किमि) को दौड समावेश गरिएको छ ।

‘तीन हजार खेलाडी सहभागी हुने अपेक्षा गरिएको छ,’ कान्तिपुरका सहायक महाप्रबन्धक महेश स्वाँरले भने, ‘अर्को वर्ष पब्लिकेशन्सको २५ औं वार्षिकोत्सव मनाउँदै छौं र त्यसबेला पुरस्कार राशि पनि वृद्धि गरेर हाफ म्याराथनलाई दक्षिण एसियाली स्तरको बनाउने छौं ।’ कान्तिपुरले वार्षिकोत्सवका अवसरमा २०६७ सालबाट सुरु गरेको हाफ म्याराथन बर्सेनि हुँदै आएको छ ।

‘गतवर्ष कोर्स रेकर्ड बनाउनेका लागि राखिएको स्कुटर पुरस्कार फिर्ता लानुपर्‍यो । त्यसबेला नै स्कुटर कुनै खेलाडीलाई दिन पाए हुन्थ्यो भन्ने लागेको थियो । त्यसैले यसपालि महिला र पुरुष विजेतालाई हिरो ड्यास स्कुटर दिन लागिएको हो,’ नेपाल जनरल मार्केटिङकी शीतल दाहालले बताइन् । महिला र पुरुषलाई समान पुरस्कार राखिएको छ । 

उपविजेताले ३० हजार र तेस्रो हुनेले २० हजार रुपैयाँसहित मोबाइल पनि पाउने छन् । चौथोले १० हजार, पाँचौंले ५ हजार र छैटौं स्थानमा रहनेले ३ हजार पाउने छन् ।

ह्विलचेयर दौडमा पुरस्कार दोब्बर बनाइएको छ । यसमा महिला र पुरुष दुवैमा पहिलो हुनेले २० हजार, दोस्रोले १० हजार र तेस्राले ५ हजार प्राप्त गर्नेछन् । अधिकृत वा सोभन्दा माथिल्लो पदका कर्मचारीमा मात्र सहभागी हुन पाउने कर्पोरेट–मिडियाका विजेताले काठमाडौं–सिंगापुर–काठमाडौं, दोस्रोले काठमाडौं–पोखरा–काठमाडौं र तेस्राले माउन्टेन फ्लाइटको टिकट पाउने छन् । माघ १५ देखि नै नाम दर्ता सुरु भइसकेको र यो फागुन १ सम्म चल्ने जनाइएको छ ।

हाफ म्याराथनमा राष्ट्रिय कीर्तिमान बनाउने धावकलाई प्रोत्साहनस्वरुप २५ हजार दिइने बताइएको छ । ‘निर्माण भइरहेका र विभिन्न समस्याका कारण यसपालि दौडको कोर्स पनि परिवर्तन गरिएको छ,’ कान्तिपुर–हिरो हाफ म्याराथनका कोर्स निर्देशक सुशील नरसिह राणाले बताए ।

कान्तिपुर पब्लिकेशन्सको थापाथलीस्थित सेन्ट्रल बिजनेस पार्कबाट दौड सुरु हुनेछ । त्यसपछि माइतीघर, बबरमहल, बिजुलीबजार, नयाँ बानेश्वर, तीनकुने, कोटेश्वर, जडिबुटी, गठ्ठाघर, सानोठिमी, भक्तपुरको सल्लाघारी चोक हँुदै कटुन्जे नजिक पुगी फर्केर सल्लाघारी चोक, ठिमी, गठ्ठाघर, जडिबुटी, कोटेश्वर, तीनकुने, नयाँ बानेश्वर, बिजुलीबजार, बबरमहल, माइतीघर हुँदै सेन्ट्रल बिजेनस पार्कमा आएर दौड टुंगिनेछ ।

प्रकाशित : माघ १८, २०७३ १८:२१
प्रतिक्रिया
पठाउनुहोस्

८ वर्ष जेल बसेपछि निर्दोष

जेलमुक्त हुँदा फूलमाला
सुदीप कैनी

गोरखा — ‘१३ दिनअघि अदालतले फैसला गरिदिएको भए, हजुरआमाको मुख देख्न पाउने थिएँ,’ मंगलबार कारागारबाट छुट्दै गर्दा केराबारी–३ का २५ वर्षीय नारायण ढकालले भने । न्यायालयले उनीबिरुद्धको मुद्दामा ढिलासुस्ती मात्रै गरेन ।

८ वर्ष जेल बसिसकेपछि उनलाई निर्दोष भएको ठहर गर्‍यो । उनी जेलबाट छुट्दै गर्दा घरमा हजुरआमाको १३ पुण्यतिथि थियो । ९८ वर्षीय हजुरआमाको मुख हेर्न नपाएकोमा उनलाई थकथकी लागेको छ । 

कर्तव्य ज्यान मुद्दामा गोरखा जिल्ला अदालत र पुनरावेदन अदालत पोखराबाट सर्वस्वसहित जन्मकैदको सजाय पाएका ढकाललाई मंगलबार सर्वोच्च अदालतले निर्दोष भन्दै सफाई दिएको हो । 

सर्वोच्चको सफाईपछि उनले ७ वर्ष ९ महिनामा कारागारबाट मुक्ति पाएका जिल्ला अदालतका श्रेस्तेदार गोविन्द्र घिमिरेले बताए । सर्वोच्चका न्यायाधीश गोपाल पराजुली र देवेन्द्रगोपाल श्रेष्ठको इजलाशले जिल्ला र पुनरावेदनको फैसलालाई उल्टाउदै ढकाललाई सफाई दिएको हो । 

फैसलामा भनिएको छ, ‘सर्वस्वसहित जन्मकैदको सजाय फौजदारी न्यायको सिद्दान्त र अदालतबाट प्रतिपादित कानुनी सिद्दान्तहरुको समेत प्रतिकुल रहेकाले अभियोग दाबीबाट सफाय दिइएको छ ।’ सर्वोच्चले निर्दोष सावित गरेपनि ढकालले भने जेल सजाय भोगिसकेका छन् ।

२०६६ बैशाख १४ गते केराबारी–५ कि मिरा रेग्मीको रहस्यमय तरिकाले मृत्यु भएपछि हत्या अभियोगमा ढकाल जेल चलान भएका थिए । मिराको हत्या प्रेम सम्बन्धका कारण ढकालले गरेको आशंकामा मुद्दा अघि बढेको थियो । मिराको मृत्यु हुँदा उनको गर्भमा बच्चा थियो । उक्त बच्चा स्वीकार गर्नुको सट्टा मिरालाई भीरबाट थकलेर हत्या गरेको भन्दै प्रहरीले बैशाख २१ गते ढकाललाई हिरासतमा लिएको थियो । 

तत्कालिन जिल्ला न्यायाधीश प्रभा बस्नेतले २०६७ फागुन ३० गते उक्त मुद्दामा ढकाललाई सर्वस्व सहित जन्मकैदको सजायको फैसला गरेकी थिइन । ‘गाउँमा घटना हुँदा म एसएलसी दिएर काठमाडौं गएको थिएँ’, उनले भने, ‘जिल्लाको फैसलामा न्याय नपाएपछि पुनरावेदन गएँ, पुनरावेदनले पनि जिल्लाकै फैसला सदर गर्‍यो ।’ २०६८ चैत ३० मा पुनरावेदन पोखराले फैसला सुनाएको थियो । 

‘ढिलै भए पनि न्याय पाएँ । न्याप पाउन धेरै कुनुपर्‍यो’, उनले भने । 

प्रहरीले यातना दिएर जबरजस्ती हत्या स्वीकार गर्न लगाएको उनले गुनासो गरे । ‘

मिराको मृत्युपछि उनकी साथीले नारायणसँग प्रेम सम्बन्ध रहेको बताएपछि परिवारले प्रहरीमा जाहेरी दिएका थिए । 

बिना कारण कारागार बस्नुपर्दा पढाई अघि बढाउन नसकेको उनले बताए । ‘कारागार भित्र बसेर पढ्ने बातावरण पाइनँ’, ढकालले भने । 

सर्वोच्वको फैसलापछि उनलाई थुनामुक्त गरिएको घिमिरेले बताए । थुनामा रहँदा ढकाल गोरखा कारागारका नाइकेसमेत भएका थिए । निर्दोष साबित भएपछि कारागारका कैदीबन्दीले उनलाई अबिर खादा लगाएर बिदाई गरेका हुन् । ८ वर्षपछि निर्दोष साबित भएपनि जेल बसेको क्षतिपूर्ति पाउने कानुनी प्रावधान नेपालमा नभएको कानुन व्यवसायीहरुले बताए ।

 

प्रकाशित : माघ १८, २०७३ १८:२१
पूरा पढ्नुहोस्
प्रतिक्रिया
पठाउनुहोस्