बंगलादेश राम्रो स्थितिमा
कोलम्बो — सकिब अल हसनले आफ्नो पाँचौं टेस्ट शतक र मोसाडेक हुसैनले आफ्नो पहिलो टेस्टमै अर्धशतक बनाएपछि बंगलादेशले श्रीलंकाविरूद्धको टेस्ट नियन्त्रणमा लिएको छ ।
भ्रमणकारी बंगलादेशले ४ सय ६७ रन बनाउँदै पहिलो इनिङ्सका आधारमा १ सय २९ रनको अग्रता लिएको छ ।
पहिलो इनिङ्समा ३ सय ३८ रनमा अलआउट भएको घरेलु टोली श्रीलंकाले पी. सारा ओभल मैदानमा दोस्रो इनिङ्समा विनाक्षति ५४ रन बनाएको छ । टोली अझै बंगलादेशको स्कोरभन्दा ७५ रनले पछाडि छ । ओपनरद्वय दिमुथ करुणारत्ने र उपुल थाराङ्गा दुवै २५ रन बनाई क्रिजमा छन् ।
सकिबले १ सय १६ रन बनाए । उनलाई मोसाडेकले ७५ रन बनाउँदै राम्रो साथ दिए । कप्तान मुस्फिकर रहिमले पनि ५२ रन बनाएपछि आफ्नो १ सयौं टेस्ट खेलिरहेको बंगलादेशले सबैभन्दा प्रभावशाली ब्याटिङ प्रस्तुत गरेको थियो । बंगलादेशले अझ ठूलो अग्रता लिने स्थिति देखिएको थियो । तर देव्रेहाते स्पिनर रंगना हेराथले १३ रनको अन्तरमा अन्तिम ३ विकेट लिएका थिए । हेराथले कुल ८२ रन खर्चेर ४ विकेट लिए ।
हेराथ टेस्ट क्रिकेटमा सबैभन्दा विकेट लिने देव्रेहाते स्पिनर हुन् । खेलकै दौरानले उनले पहिलो श्रेणीमा १ हजार विकेट पूरा गरेका थिए । यस्तो उपलब्धि बनाउने उनी मुथैया मुरलिधरनपछिका दोस्रो श्रीलंकाली बलर हुन् ।
श्रीलंकाली बलरमा देव्रेहाते स्पिनर लक्सन सान्दाकानले पनि राम्रो प्रभाव पारे । उनले १ सय ४० रन खर्चेर ४ विकेट लिए । उनले नै सकिब र मोसाडेकबीच सातौं विकेटमा १ सय ३१ रनको साझेदारीको अन्त्य गरेका थिए । सकिबले यसअघि नै कप्तान मुस्फिकरसँग छैटौं विकेटमा ९२ रन जोडेका थिए ।
प्रकाशित : चैत्र ५, २०७३ ०९:५१