भारत बलियो स्थितिमा

एएफपी

राँची — चेतेश्वर पुजाराले संयमित हुँदै बनाएको दोहोरो शतक र रिद्दिमान साहको अर्को शतक मदतले भारत अस्ट्रेलियाविरुद्धको तेस्रो टेस्टको चौथो दिन बलियो स्थितिमा पुगेको छ । भारतले आफ्नो पहिलो इनिङ्स दिनको अन्त्यतिर नौ विकेट गुमाएर ६ सय ३ रनमा पूरा भएको घोषणा गरेको थियो । त्यसयता भारतले अस्ट्रेलियाको दुई विकेट लिएको छ ।

त्यसमा १४ रन बनाएका प्रारम्भिक ब्याट्सम्यान डेविड वार्नरको विकेट सर्वाधिक बहुमूल्य रहेको छ । रवीन्द्र जडेजाले वार्नरको विकेट लिए । लगत्तै उनले नाइटवाचम्यानका रूपमा आएका नथान लायनलाई पनि दुई रनमा आउट पारे । दिनको समाप्तिमा अस्ट्ेरलिया दुई विकेट गुमाएर २३ रनको स्थितिमा छ र घरेलु टिमको तुलनामा अझै १ सय ५२ रनले पछाडि छ ।

भारतको इनिङ्समा जडेजाले नटआउट रहेर ५४ रनको ब्याटिङ पनि गरे । तर दिनको खेल भने पुजारा र साहको नाममा रह्यो । पुजाराले २ सय २ रन बनाए भने साहको ब्याटबाट १ सय १७ रन निस्क्यो ।

उनीहरूले सातौं विकेटका लागि १ सय ९९ रनको साझेदारी गरे । यसक्रममा उनीहरूले अस्ट्रेलियाली बलिङ आक्रमणलाई लगातार निराश पारे । अस्ट्ेरलियाले दिनको सुरुआती दुई इनिङ्समा एउटा पनि विकेट लिन सकेन । भारतका लागि ४७ औं टेस्ट खेलिरहेका पुजाराले दोहोरो शतक बनाएको यो तेस्रोपल्ट हो । साहले भने आफ्नो व्यक्तिगत उच्च स्कोर बनाए । त्यस मदतले भारतले अस्ट्रेलियाली पहिलो इनिङ्समा तयार ४ सय ५१ रनलाई उछिन्न सफल रहेको हो ।

पुजाराले चौथो दिन १ सय ३० रनबाट अगाडि खेल्न सुरु गरेका थिए । उनले कुल २१ चौका प्रहार गरे र ५ सय २५ बलको सामना गरे । बलको संख्या सामना गरेको आधारमा यो टेस्ट क्रिकेटमा कुनै पनि भारतीय ब्याट्सम्यानले सामना गरेको अहिलेसम्मको सर्वाधिक लामो इनिङ्स हो । सन् २०१२ मा इंग्ल्यान्डविरुद्ध २९ वर्षीय ब्याट्सम्यानले सर्वाधिक नटआउट २ सय ६ रन बनाएका थिए । उनलाई उछिन्न सक्ने स्थितिमा पुजारा लायनको बलमा आउट भए ।

प्रकाशित : चैत्र ७, २०७३ ०९:५१
प्रतिक्रिया
पठाउनुहोस्

भलिबल टोलीको बिदाइ

कान्तिपुर संवाददाता

काठमाडौं — माल्दिभ्सको मालेमा बुधबारदेखि हुने सिनियर एसियन सेन्ट्रल जोन च्याम्पियनसिपमा सहभागी हुन जाने नेपाली भलिबल टोलीको आइतबार बिदाइ गरिएको छ । च्याम्पियनसिपमा नेपालले आयोजक माल्दिभ्ससहित तुर्कमेनिस्तान र किर्गिस्तानको सामना गर्नेछ ।

सेटर इम रानामगरको कप्तानीमा रहेको नेपाली टोलीमा मानबहादुर श्रेष्ठ, धनबहादुर भट्ट, कुलबहादुर थापा र दिल सुनार ओपन स्पाइकर छन् । यस्तै क्विक स्पाइकरमा महेन्द्र श्रेष्ठ, भैरव बम र हरि अधिकारी छन् । साइड स्पाइकरमा नरेन्द्र गिरी, राजकुमार निरौला छन् भने सेटरमा दुर्गाप्रसाद महतो र लिबेरोमा ईश्वर थापामगर छन् । टोलीमा चार नयाँ खेलाडीले अन्तर्राष्ट्रिय डेब्यु गर्दैछन् ।

जसमा ओपन स्पाइकर दिल सुनार, क्विक स्पाइकर हरि अधिकारी, सेटर दुर्गाप्रसाद महतो र साइड स्पाइकर राजकुमार निरौला छन् । सुनार, अधिकारी र महतो नेपाल आर्मीका खेलाडी हुन् भने निरौला एपीएफसँग आबद्ध छन् । नेपाली टोलीको प्रशिक्षकमा वीरेन्द्र चौधरी तथा सहायक प्रशिक्षकमा जगदिश भट्ट छन् ।

नेपाली टोलीको व्यवस्थापकको जिम्मेवारी नेपाल भलिबल संघका सचिव डम्बरबहादुर नेपालीले सम्हाल्नेछन् । टोलीसँगै अन्तर्राष्ट्रिय रेफ्री क्यान्डिडेट चन्द्रा बदना राई पनि त्यसतर्फ जानेछिन् । नेपाली टोलीले पहिलो खेल मार्च २३ मा तुर्कमेनिस्तानसँग खेल्नेछ । यस्तै मार्च २४ मा आयोजक माल्दिभ्स र मार्च २७ मा किर्गिस्तानसँग प्रतिस्पर्धा गर्नेछ ।

प्रकाशित : चैत्र ७, २०७३ ०९:५१
पूरा पढ्नुहोस्
प्रतिक्रिया
पठाउनुहोस्