कोन्टेद्वारा कोस्टाको बखान

एएफपी

स्टोक — चेल्सी व्यवस्थापक एन्टोनियो कोन्टेले आफ्ना स्ट्राइकर डिएगो कोस्टलाई टिमकै उदाहरणका रूपमा बखान गरेका छन् । स्टोक सिटीमाथि २–१ को जितसँगै प्रिमियर लिगमा १३ अंकले अग्रता लिएपछि उनले यस्तो टिप्पणी गरेका हुन् ।

गत जनवरीमा कोन्टेसँगै झगडा परेको खबरबीच निकै सन्की स्वभावका कोस्टा टिममा परेका थिएनन् । तर त्यो अनुभवले पनि उनको झगडालु स्वभावमा कमी आएको छैन । उनी शनिबार खेलको १६ औं मिनेटमा विपक्षी खेलाडीलाई जिस्क्याएको आरोपमा पहेंलो कार्ड खान पुगे । खेल दौरान उनी स्टोक खेलाडीसँग पटक–पटक भनाभनको अवस्थाामा पुगे, तर मैदानमा भने अडिइरहे ।

कोन्टेले कोस्टाको पेलाइमा नपर्ने बानीको प्रशंसा गरे । ‘सुरुमै पहेंलो कार्ड पाएपछि खेल्न सजिलो हुँदैन,’ कोन्टेले भने,‘कुनै खेलाडीलाई उत्तेजित तुल्याएर अर्को फल निम्त्याउन खोज्नु साधारण कुरा हो । डिएगो अनुशासित बन्दै गएका छन् ।’

‘उनले टिमका लागि खेलिरहेको छु भन्ने देखाइरहेका छन् । म खेलाडीबाट यस्तै व्यवहारको अपेक्षा गर्छु । यो सिजन म उनीसँग खुसी छु ।’

चेल्सीले ८७ औं मिनेटमा सेन्टर ब्याक ग्यारी केहिलले गरेको गोलबाट जित हात पार्‍यो । विलियनले १३ औं मिनेटमा फ्रिकिकमार्फत गोल गरी चेल्सीले लिएको अग्रता खेल सकिन ७ मिनेट बाँकी हुँदा स्टोकका जोनाथन वाल्टरले पेनाल्टीमा गोल गरी भंग गरे । वाल्टरलाई लडाएर पेनाल्टी दिलाउने केहिलले नै गोल गरी टिमलाई हारबाट बचाए । चेल्सीले दोस्रो हाफमा आक्रामक खेल्यो ।

मार्कोस एलोन्सो र कोस्टाले गरेका प्रहार बारमा लागेर फर्किए । पेड्रोले गरेको प्रहार स्टोक गोलरक्षक लि ग्रान्टले रोके । यो चेल्सीको लगातार पाँचौं जित हो । उसको अविजित यात्रा १२ खेल पुगिसकेको छ । स्टोकले ८ खेलको अविजित जित शृंखला टुंग्याएको छ । कोन्टेको विश्वासमा चेल्सीले बाँकी १० खेलबाट मात्रै ७ अंक लिएमा गणितीय रूपमा टिमले उपाधि जित्नेछ । ‘सिजनको यो विन्दुमा आएर राम्रो गुण र संगठन भएको टिमलाई हराउनु सजिलो थिएन,’ उनले भने,‘खेलको सुरुदेखि अन्त्यसम्म हामीले मिहिनेत गरेर खेल्यौं ।’

स्टोकका व्यवस्थापक मार्क ह्युजले आफ्ना खेलाडीले कोस्टालाई उत्तेजित तुल्याउने गरी निसाना नबनाएको दाबी गरे । ‘हामीले त्यसो गरेको होइन । हामी प्रतिस्पर्धात्मक खेल चाहन्थ्यौं, जुन भयो,’ उनले भने । उनले कोस्टाको व्यवहार उनी आफैंका लागि घातक हुने बताए ।

‘उनी गजबका स्ट्राइकर हुन् । तर कहिलेकाहीं नसुहाउँदो व्यवहार देखाउँछन्,’ उनले भने । ह्युज आफैं आफ्नो जमानाका नामी सेन्टर फरवार्ड हुन् ।

ह्युजले म्याचविनर काहिल वाल्टरलाई लडाइसकेपछि पनि मैदानमा रहनु भाग्यको कुरा भएको बताए । ‘यो रेडकार्डको विषय थियो,’ उनले भने ।

म्यानचेस्टरको अपराजित यात्रा

मिडल्स्ब्रो (एएफपी)– मरोउने फेलानीले प्रिमियर लिगमा १५ महिनापछि गरेको गोल सहयोगमा म्यानचेस्टर युनाइटेडले रेलिगेसनको चुनौतीबाट गुज्रिएको मिडल्स्ब्रोलाई ३–१ ले पन्छाउँदै आइतबार लिगमा अपराजित खेल संख्यालाई १८ पुर्‍याएको छ ।

जेसे लिन्गार्डले सनसनीपूर्ण रूपमा दोस्रो गोल गरे भने युनाइटेडका पूर्वकिपर भिक्टर भाल्डेसको गम्भीर भूलमा एन्टोनियो भ्यालेन्सियाले अन्तिम समयमा तेस्रो गोल गरेका थिए । यसले युनाइटेड १९ साता छैटौं स्थानमा रहेपछि माथि उक्लिएको छ ।

यो सफलताले युनाइटेडलाई प्रिमियर लिगमा ६ सयौं जित दिलायो र यसले शीर्षस्थानमा रहेको चेल्सीसँग १७ अंक नजिक पनि पुर्‍यायो । शीर्ष चारमा रहेर अर्को सिजनको च्याम्पियन्स लिगमा छनोट हुने दौडमा रहेको युनाइटेड नजिकका प्रतिद्वन्द्वी आर्सनल र सातौं स्थानमा रहेको एभरटनभन्दा दुई अंकले अगाडि छ । मिडल्स्ब्रोका लागि सब्स्टिच्युट रुडी गेस्टेडले गोल गरेका थिए ।

लिगमा ११ खेलयता जितविहीन रहेको मिडल्स्ब्रो पुछारबाट दोस्रोमा छ र सुरक्षित स्थानको टिमसँग पाँच अंक दूरीमा छ । एइटोर कारान्काले बाहिरिएपछि कार्यवाहक व्यवस्थापक बनेका स्टिभ आग्नेउले पहिलो खेलमै हार बेहोरेका हुन् ।

प्रकाशित : चैत्र ७, २०७३ १०:००
प्रतिक्रिया
पठाउनुहोस्

रियलको महत्त्वपूर्ण जित

एएफपी

म्याड्रिड — रियल म्याड्रिड व्यवस्थापक जिनेदिन जिदानले एथलेटिक बिलबाओमाथि उत्तराद्र्धको गोलबाट जित हासिल गरेपछि आफ्नो टिमको प्रशंसा गरेका छन् । ब्राजिली मिडफिल्डर कासिमिरो शनिबारको खेलमा अप्रत्याशित नायक सावित भएका थिए ।

कासिमिरोले खेल सकिन २२ मिनेट छँदा नजिकको दूरीबाट विजयी गोल गरेका हुन् । यो नतिजाले ला लिगा तालिकामा बार्सिलोनाभन्दा म्याड्रिड ५ अंकले अगाडि छ । ‘हामीले धेरै दबाब थेग्नुपर्छ, तर हामी राम्रो खेलिछाड्छौं,’ जिदानले भने, ‘यो खेल एकदमै महत्त्वपूर्ण थियो ।’

करिम बेन्जेमाले पहिलो हाफमा क्रिस्टियानो रोनाल्डोको क्रसमा गोल गरी टिमलाई अग्रता दिए । बिलबाओका एरिज एडुरिजले बराबरी गोल गरे । बार्सिलोनाले आइतबार
क्याम्प नोउमा भ्यालेन्सियालाई हराए अंक अन्तरलाई २ मा झार्न सक्छ ।

बिलबाओले घरेलु खेलमा बनाएको १९ खेलको अविजित शृंखला तोडिएको छ । टिम हाल सातौं स्थानमा छ । ‘हामीले खेलमा आधिपत्य जमायौं,’ एडुरिजले सञ्चारकर्मीसँग भने, ‘हामीले उनीहरूलाई निरन्तर दबाब दियौं तर पाएको अवसरलाई उनीहरूले सदुपयोग गरे ।’

म्याड्रिड सुरुको १० मिनेटमै दबाबमा पर्‍यो । म्याड्रिडले मौका कुरिरहेको थियो । उसले गरेको पहिलो गोल अफसाइड भयो । रोनाल्डोको प्रहारलाई बिलबाओका गोलरक्षकले विफल पारे । सर्जियो रामोसले पनि मौका गुमाए । उनले टोनी क्रुसको फ्रिकिकमा पोस्टबाहिर हेड गरे । म्याड्रिडले काउन्टर अट्याकमा ध्यान दिएको थियो ।

म्याड्रिड २५ औं मिनेटमा गोल गर्न सफल भयो । कासिमिरोले दिएको पासमा रोनाल्डोले अफसाइड ट्रयाप बिट गर्दै बेन्जेमाका लागि एकदमै सटीक लो क्रस निकालिदिए । बेन्जेमाले एथलेटिकोविरुद्ध आफ्नो व्यक्तिगत छैटौं गोल गरे ।

दोस्रो हाफमा म्याड्रिड फेरि दबाबमा आयो । केलर नाभास र रामोसबीच समझदारी नहुँदा टिमले झन्डै आत्मघाती गोल खानुपरेको थियो । नाभासले पछिल्ला साता गम्भीर खाले गल्ती गर्ने स्वभाव प्रकट गरिरहेका छन् । तर उनले इनाकी विलियम्सको खतरनाक प्रहार रोकेर टिमलाई गुन पनि लगाए ।

खेलमा विलियम्सको दायाँ साइडतर्फ तुफानी गति निकै डरलाग्दो थियो । उनकै क्रसमा राउस गार्सियाले हेड पास गर्दा एडुरिजले गोल गर्ने मौका पाएका थिए । बिलबाओको बराबरी ३ मिनेटभन्दा बढी टिकेन । क्रुसको पासलाई रोनाल्डोले फ्लिक गरे, जसबाट ६ यार्डभित्र एक्लै परेका कासिमिरोले गोलमा परिणत गरे ।

प्रकाशित : चैत्र ७, २०७३ १०:००
पूरा पढ्नुहोस्
प्रतिक्रिया
पठाउनुहोस्