आईसीसी यू–१९ विश्वकप छनोट एसिया क्षेत्र- बेखबर प्रतिद्वन्द्वी

नेपाल र सिंगापुरबीच खेल जारी
विनोद पाण्डे

काठमाडौं — नेपाल र सिंगापुर परिचित प्रतिद्वन्द्वी हुन् । एसियाली क्रिकेट परिषद् (एसीसी) ले आयोजना गर्ने प्रतियोगितामा यी दुई टोली धेरै आमनेसामने भएका छन् । सिंगापुरमा सोमबार सुरु हुने यू–१९ विश्वकप छनोट एसिया क्षेत्रमा आपसमा भिड्नु अगाडि यी दुवै टोली एक–अर्काबारे बेखबर छन् ।

मलेसिया र अफगानिस्तान प्रतियोगिताका अरू दुई टोली हुन् । डबल राउन्ड रोबिन लिगमा हुने खेलको विजेता राष्ट्र अर्को वर्ष न्युजिल्यान्डमा हुने आईसीसी यू–१९ विश्वकपमा छनोट हुनेछ । मलेसिया र सिंगापुर एसियाली छनोट पार गरेर यस प्रतियोगितामा आएका हुन् । त्यसमा मलेसिया विजेता र सिंगापुर उपविजेता भएका थिए ।

नेपाल र अफगानिस्तानलाई सीधै विश्वकप छनोट खेल्न दिइएको हो । डेढ वर्षअघि बंगलादेशमा भएको यू–१९ विश्वकपमा नेपाल क्वाटरफाइनलसम्म पुगेको थियो । त्यही आधारमा नेपाल र अफगानिस्तानलाई सोझै छनोटमा प्रतिस्पर्धा गर्न दिइएको थियो । गत महिना अफगानिस्तानले आयरल्यान्डसँगै टेस्ट मान्यता पाएपछि खेल्न लागेको यो पहिलो आधिकारिक प्रतियोगिता हो ।

‘हामीलाई सिंगापुरका बारेमा खासै थाहा छैन, त्यही भएर हामी उनीहरूसँग ढुक्क हुन सक्दैनौं,’ नेपालका प्रशिक्षक विनोद दासले भने । उनकै कप्तानीमा नेपाल सन् १९९९ मा सिंगापुरमै एसीसी यू–१९ एसिया कपमा दोस्रो भएर पहिलोपटक विश्वकपमा छानिएको थियो । नेपालले यू–१९ स्तरमा सिंगापुरसँगको सबै खेल जित्दै आएको छ । २००९ यता नेपाल र सिंगापुर यू–१९ मा पहिलोपटक खेल्न लागेका हुन् । पछिल्लोपटक कुवेतमा भेट हुँदा ज्ञानेन्द्र मल्लको अर्धशतक मदतमा नेपालले सिंगापुरमाथि ३ विकेटको जित हात पारेको थियो ।

सिंगापुरको राष्ट्रिय टोली २०१० को एसीसी ट्रफीबाट रेलिगेसनमा परेको थियो । त्यसपछि सिंगापुरले एसीसीका प्रमुख प्रतियोगिता खेल्ने मौका गुमाउँदा नेपालसँगको भेट पातलिएको थियो । नेपालले प्रमुख प्रतियोगितामा प्रतिस्पर्धा गर्दा सिंगापुर एसीसीमा दोस्रो दर्जाको मानिएको च्याम्पियनसिप खेल्न बाध्य थियो ।

गत वर्ष डिसेम्बरमा श्रीलंकामा भएको एसीसी यू–१९ एसिया कप सिंगापुरले खेलेको पछिल्लो अन्तर्राष्ट्रिय प्रतियोगिता थियो । त्यसमा सिंगापुर पाकिस्तानसँग ७९, बंगलादेशससँग ७० र अफगानिस्तानसँग ७३ रनमा अलआउट भई क्रमश: ९, ७ र ९ विकेटको पराजय भोगेको थियो । नेपाल भने दीपेन्द्रसिंह ऐरीको ९० रनका बावजुद २ सय २८ रनको लक्ष्य लिएर आएको श्रीलंकासँग १ रनले पराजित भएको थियो । त्यसपछि भारतसँग ६ विकेटले पराजित भएको नेपालले मलेसियामाथि १ विकेटको जित हात पारेको थियो ।

श्रीलंकामा यू–१९ एसिया कप खेलेका १५ मध्ये १० नेपाली खेलाडी सिंगापुरमा प्रतिस्पर्धा गर्दैछन् । नेपाली यू–१९ बाट खेल्न लागेका कप्तान सन्दीप सुनारसहित दीपेन्द्र, आसिफ शेखले राष्ट्रिय टोलीबाट प्रतिनिधित्व गरिसकेका छन् । गत वर्ष एभरेस्ट प्रिमियर लिगमा शतक प्रहार गरी चर्चामा आएका आसिफले त्यसयता खासै प्रभाव पार्न सकेका छैनन् । भारत भ्रमणमा पनि उनको ब्याटबाट खासै रन निस्किएको थिएन । उनको ओपनिङ ब्याटिङ जोडी सन्दीप सुनार राम्रो फर्ममा छन् ।

प्रतियोगिताको तयारीका लागि नेपालले भारतमा तीन साता प्रशिक्षण गरेको थियो र पाँच अभ्यास खेल खेलेको थियो । ‘हामी पूरा तयार छौं,’ सिंगापुरसँगको पहिलो खेल खेल्नुअगाडि नेपाली प्रशिक्षक दासले भने, ‘हामीले आफ्नो योजनालाई मैदानमा उतारेर सामान्य हिसाबमा खेल्नुपर्छ ।’ सोमबार सिंगापुरसँग खेलेको भोलिपल्ट नेपालले मलेसियासँग खेल्नेछ ।

जुलाई २० मा अफगानिस्तानसँग खेल्ने नेपालले २१ मा फेरि सिंगापुरसँग खेल्नेछ । जुलाई २४ मा मलेसियासँग खेलेपछि नेपालले २५ मा अफगानिस्तानसँग आफ्नो अन्तिम खेल खेल्नेछ ।

प्रकाशित : श्रावण २, २०७४ ०७:२६
प्रतिक्रिया
पठाउनुहोस्

निर्वाचन कार्यालयमा नाम लेखाउनेको भीड

ठाकुरसिंह थारु

बाँके — निर्वाचन आयोगले मतदाता नामावली अद्यावधिक गर्न सुरु गरेपछि फोटोसहितको मतदाता नामावलीमा नाम लेखाउनेको भीड लागेको छ । यसअघि मतदाता नामावलीमा छुट भई स्थानीय तहको निर्वाचनमा मतदान गर्न नपाएकाहरू नाम लेखाउन ओइरिएका हुन् ।

आयोगले छुट मतदाताहरूलाई फोटोसहितको नामावली दर्ताका लागि साउन १ देखि १५ गतेसम्म समय दिएको छ । 

आयोगले जिल्ला निर्वाचन कार्यालयमा पुगेर नाम दर्ता गर्न आग्रह गरेको छ । बाँकेको हकमा नेपालगन्जस्थित क्षेत्रीय निर्वाचन कार्यालयमा नामावली संकलन गर्ने व्यवस्था मिलाइएको छ ।

पहिलो दिन आइतबार नामावली भर्नेको भीड लागेपछि निर्वाचन कार्यालयले ५ वटा टोली खटाएको छ । सुरुमा दुई स्थानमा नामावली भर्ने व्यवस्था मिलाइएको थियो । तर, नाम दर्ता गर्न छुट भएका व्यक्ति थपिँदै गएपछि सहजताका लागि स्थान थपिएको हो ।

पहिलो दिन ३ सय बढी व्यक्तिले नाम दर्ता गराएको निर्वाचन कार्यालयले जनाएको छ । ‘हामीले सोचेभन्दा बढी मतदाता नाम दर्ता गर्न कार्यालयमा आएपछि टोली थपेर दर्ता गरिरहेका छौं । समय अभावका कारण एकै दिन सबैको दर्ता भ्याइएको छैन,’ क्षेत्रीय निर्वाचन अधिकारी वसन्तराज अधिकारीले भने, ‘साउन १५ सम्म नाम दर्ता गर्ने समय छ । निर्वाचन कार्यालयमा आएर दर्ता गराउन सकिन्छ ।’

आयोगले नामावली दर्ताका लागि जिल्ला निर्वाचन कार्यालय तोकेपछि राजनीतिक दलहरूले ग्रामीण क्षेत्रका स्थानीयलाई समस्या हुने बताएका छन् । तर, आयोगले जनशक्ति अभाव र समय नभएको भन्दै गाउँमै पुगेर नाम दर्ता गर्न असमर्थता जनाएको छ । उसले गाउँमै टोली पठाएर नामावली दर्ताका लागि एक महिना समय लाग्ने दाबी गरेको छ । जसका कारण राजनीतिक दलका नेताहरूको गाउँमै पुगेर नाम दर्ता गर्ने आग्रह कार्यान्वयन हुन सकेन ।

स्थानीय तहको निर्वाचनपछि आयोगले प्रदेश र संघको निर्वाचन तयारी थालेको छ । त्यसका लागि मतदाता नामावली अद्यावधिक गर्न लागिएको हो । नामावली अद्यावधिकले स्थानीय तहको निर्वाचन अघि छुटेका मतदाताहरूलाई नाम दर्ता गर्ने अवसर दिएको छ ।

 १८ वर्ष उमेर पुगिसकेका व्यक्तिले फोटोसहितको नामावली दर्ता पाउने छन् । बाँकेमा २ लाख ४६ लाख १ सय ३ मतदाता छन् । आयोगले अद्यावधिक गर्न थालेपछि मतदाताहरूको संख्या थपिनेछ । वैदेशिक रोजगारीमा गएका युवाहरूले नाम दर्ता गर्न छुटाएका थिए । घर फर्किएकाहरूले नाम दर्ता गरिरहेका छन् ।

प्रकाशित : श्रावण २, २०७४ ०७:२६
पूरा पढ्नुहोस्
प्रतिक्रिया
पठाउनुहोस्