नेपालको विजयी सुरुआत

आईसीसी यू–१९ विश्वकप छनोट एसिया क्षेत्र
कान्तिपुर संवाददाता

काठमाडौं — आईसीसी एसिया यू–१९ विश्वकप छनोटमा नेपालले सोमबार विजयी सुरुआत लिएको छ, तर यसका लागि टिमले संघर्ष भने गर्नु पर्‍यो । वान डे क्रिकेटमा कुनै बेला झिनो स्कोरको लक्ष्य पनि कठिन सावित हुन सक्छ, नेपालका लागि यस्तै भयो र सिंगापुरलाई ४ विकेटले हराउन दबाबमा खेल्न बाध्य रह्यो ।


 
पहिले ब्याटिङ गरेको सिंगापुरले २९ ओभरमा अलआउट हुन अगाडि ७३ रन मात्र बनाएको थियो । नेपाल सजिलै विजयी रहने अपेक्षा भएपनि त्यस्तो भएन् । नेपाल जितसम्म पुग्दा ६ विकेट गुमाएर ७७ रनको स्थितिमा थियो र खेलले १७.३ ओभर छोएको थियो । पवन सर्राफले विजयी चौका प्रहार गरे ।
 
नेपालका लागि प्रनित थापामगरले सर्वाधिक २३ बनाए । उनले तीन चौका प्रहार गरे । प्रारम्भिक ब्याट्सम्यान जोडी सन्दीप सुनार र आसिफ सेखले राम्रो सुरुआत दिन सकेनन् र बोर्डमा ९ रन मात्र चढ्दा दुवै आउट भइसकेका थिए । पाँचौं क्रममा आएका अनिल शाहले १९ रनको योगदान दिए । रोहित कुमार ११ रन बनाएर नटआउट रहे ।
 
सिंगापुरलाई सस्तोमा समेट्न कप्तान सन्दीप लामिछानेले पाँच विकेट लिए र यसका लागि लेग स्पिनरले ८ ओभरमा २१ रन मात्र दिए । उनलाई साहेब आलमले पनि बलियो साथ दिए र तीन विकेट लिए । उनले छ ओभरमा १२ रन मात्र दिए । सिंगापुरको स्कोर एकै खेलाडी मात्र टिकेको थियो ।
 
आठौं क्रममा ब्याटिङ गर्न आएका बिर्गु अयरले सर्वाधिक ४२ रन बनाए । उनी क्रिजमा आउन अगाडि सिंगापुरको स्कोर ७ विकेट गुमाएर २६ रनको कमजोर स्थितिमा थियो ।
 
प्रतियोगिताको बलियो प्रत्यासी अफगानिस्तानले पनि सोमबारको अर्को खेलमा विजयी सुरुआत लियो । उसले मलेसियालाई आठ विकेटले हरायो । पहिले ब्याटिङ गरेको मलेसियाले २१.५ ओभरमा सबै विकेट गुमाउन अगाडि ५३ रन बनाएको थियो । जवाफमा अफगानिस्तानले ५.५ ओभर मात्र उपयोग गरेर दुई विकेटको क्षतिमा ५४ रन बनायो ।
 
प्रतियोगिता राउन्ड रोबिन लिगको आधारमा हुनेछ र यसको विजेता अर्को वर्ष न्युजिल्यान्डमा हुने आर्यसीसी यू–१९ विश्वकपमा छनोट हुनेछ । मलेसिया र सिंगापुर एसियाली छनोट पार गरेर यस प्रतियोगितामा पुगेका हुन् । नेपाल र अफगानिस्तानलाई सिधै विश्वकप छनोटमा खेल्न दिइएको हो । अफगानिस्तानले टेस्ट मान्यता पाएयता यो उसको पहिलो आधिकारिक प्रतियोगिता हो । 

प्रकाशित : श्रावण २, २०७४ १०:२८
प्रतिक्रिया
पठाउनुहोस्

रोनाल्डोप्रति ध्यान छैन मोउरिन्होको

एएफपी

लस एन्जलस — जोसे मोउरिन्होले क्रिस्टियानो रोनाल्डोलाई ओल्ड ट्राफोड फर्काउने कुनै प्रयास नभएको स्पष्ट पारेका छन् । युनाइटेड प्रि–सिजन टुर निम्ति अमेरिकामा रहेका बखत उनले यस्तो स्पष्टोक्ति दिएका हुन् ।

युनाइटेडले शनिबार टुर सुरु गर्ने क्रममा लस एन्जलस ग्यालेक्सीलाई ५–२ हरायो ।

मोउरिन्होले आउने सिजनका लागि आफ्नो टोली बलियो बनाउने क्रममा भिक्टर लिन्डेलोफ र रोमेलो लुकालुलाई भित्र्याइसकेका छन् । तर उनले युनाइटेडकै लिजेन्ड तथा हाल रियल म्याड्रिडमा आबद्ध रोनाल्डोलाई भित्र्याउने सम्भावना नरहेको बताए । ‘म भित्र्याउन नसकिने खेलाडीको पछि लाग्न सक्दिनँ,’ उनले भने ।

शनिबारको खेलमा इंग्ल्यान्डका स्ट्राइकर मार्कुस रासफोर्डले २ गोल गरे भने मारुअन फेलानी, एन्थोनी मार्सल र हेन्रिक मिखतार्यनले १–१ गोल थपे । एकपक्षीय खेलमा नयाँ स्ट्राइकर लुकाकु दोस्रो हाफमा मैदान प्रवेश गरे तर गोल गर्न सकेनन् ।

उनले छिरेको ४ मिनेटमै एउटा सुनौलो अवसर पाए पनि उपयोग गर्न सकेनन् । उनको प्रहारलाई ग्यालेक्सी गोलरक्षक ब्रायन रोएले रोके । तर मोउरिन्होले लुकाकुको ‘नि:स्वार्थी’ खेलको प्रशंसा गरे । ‘लुकाकु एक निशानाबाज हुन् । उनी विपक्षीलाई आच्छु आच्छु पारेर खेल्न सक्छन्,’ उनले भने, ‘उनी टिम प्लेयर हुन् र गोलै गर्न भनेर स्वार्थी बन्दैनन् । उनी आफ्नोबारे चिन्तित हुन्नन् ।’ रासफोर्डले खेलमा आफ्नो गोल भोक देखाए ।

उनले पहिलो २ मिनेटमै गोल गरे । एरियर लासिटरको गल्तीमा उनले पेनाल्टी एरिया नजिकबाट सटीक फिनिसिङ गरे । उनले २० औं मिनेटमा अर्को गोल थपे । हुवा माटाको पासमा उनले गोल गरेका हुन् । गजबको शारीरिक बनोट भएका १९ वर्षीय रासफोर्ड अझै परिपक्व बन्ने क्रममा रहेको मोउरिन्होले बताए । ‘यो एउटा केटाको प्राकृतिक विकास हो । उनी १३ महिनाअघि यहाँ आएभन्दा ३ सेमि अग्लेका छन् । उनको ज्यानमा मांसपेशी थपिएको छ । उनको गति विशेष छ । हामी त्यो गुमाउन चाहन्नौं,’ उनले भने ।

फेलानीले मध्यान्तरमा ३–० को अग्रता बनाइसकेका थिए । त्यसपछि दोस्रो हाफमा पूरै लाइनअप परिवर्तन गरे । युनाइटेडले ६७ औं मिनेटमा गोल गर्‍यो ।

मार्सलले अन्तिम गोल गरे । पहिलो हाफमा कुनै कोसिसै गर्न नसकेको ग्यालेक्सीले उत्तराद्र्धमा २ सान्त्वना गोल गर्‍यो । दुवै गोल मेक्सिकाली अन्तर्राष्ट्रिय खेलाडी जियोभानी डोस सान्तोसको नाममा रह्यो ।

प्रकाशित : श्रावण २, २०७४ १०:२८
पूरा पढ्नुहोस्
प्रतिक्रिया
पठाउनुहोस्