अमिर च्याम्पियन

कान्तिपुर संवाददाता

काठमाडौं — अमिर ब्लोनले शुक्रबार दोस्रो धनलक्ष्मी स्मृति राष्ट्रिय स्क्वासको जुनियर यू–१९ ब्वाइज सिंगल्समा स्वर्ण जितेका छन् । फाइनलमा अमिरले दीपक थापालाई ११–९, ८–११, १२–१०, १७–१५ को सेटमा हराए ।


पुरुष सिंगलमा अरहान्तकेशर सिंह र अमृत थापामगर फेरि उपाधिका लागि भिड्ने छन् । गत वर्ष अरहान्तले अमृतलाई हराएर उपाधि जितेका थिए । भेट्रान ५५ वर्षमाथि पुरुष सिंगलमा इन्द्रबहादुर कार्कीले प्रेम सिंहलाई १२–१०, ७–११, १०–१२, ११–७, ११–४ ले हराउँदै फाइनल पक्का गरे । उपाधिका लागि इन्द्रले किशोर महर्जनविरुद्ध खेल्नेछन् । मास्टर्सको पुरुष सिंगल्समा प्रज्ज्वलप्रकाश प्रधानले सुदीप– बहादुर सिंह फाइनल खेल्ने छन् ।

सस्मनले जिते दुई पदक
काठमाडौं (कास)– नेपाली खेलाडी सस्मन बस्नेतले आईटीएफ कोरियन ओपन अन्तर्राष्ट्रिय तथा एसियन तेक्वान्दो च्याम्पियनसिपमा दुई पदक जितेका छन् ।
दक्षिण कोरियाको इन्चोन नामडोङ जिम्न्याजियममा शुक्रबार जुनियर ब्ल्याकबेल्ट प्याटर्नतर्फ सेमिफाइनलमा रसियन खेलाडीसँग पराजित भएपछि सस्मनले कांस्य पदकमै चित्त बुझाएका थिए । त्यस्तै उनले जुनियर ब्ल्याक बेल्ट ७० केजी तौल समूहमा भने रजत जितेका थिए । उनी फाइनलमा किर्गिस्तानीसँग पराजित भए ।
टिम म्यानेजर केदार बुढाथोकीले जनाएअनुसार एसियन च्याम्पियनसिपतर्फ ब्ल्याकबेल्ट इन्डिभिज्युयल स्पाइरिङको ५८ केजीका प्रतिस्पर्धी गयाजी खड्काले भने चोटका कारण बीचमै खेल त्याग्नुपरेको छ । पहिलो चरणको खेलमा जापानी खेलाडीसँग प्रतिस्पर्धा गर्दा गयाजीले देब्रे कुहिनामा चोट बोकेका थिए ।

खेलमन्त्रीको ध्यानाकर्षण
काठमाडौं (कास)– नेपाल राष्ट्रिय तथा अन्तर्राष्ट्रिय खेलाडी संघले शुक्रबार नवनियुक्त युवा तथा खेलकुदमन्त्री राजेन्द्रकुमार केसीलाई भेटेर खेलकुद र खेलाडीको हितका विषयमा ध्यानाकर्षण गराएको छ । संघका अध्यक्ष दीपक श्रेष्ठको नेतृत्वमा गएको टोलीले मन्त्री केसीलाई दक्षिण एसियाली खेलकुद (साग) जस्ता प्रतियोगिता नहुँदा प्रत्येक संस्करणमा एउटा पुस्ता नै पलायन हुने खतरा भएकाले १३ औं सागको तयारी तत्काल सुरु गर्नुपर्नेसहित खेलाडीका विविध कठिनाईबारे ज्ञापनपत्र बुझाएका थिए । मन्त्रीले त्यस विषयमा छलफल गर्ने बताए ।

प्रकाशित : श्रावण २१, २०७४ ०८:४७
ADVERTISEMENT
प्रतिक्रिया
पठाउनुहोस्

विश्व एथलेटिक्स च्याम्पियनसिप : कीर्तिमानको लक्ष्यमा भूमिराज

नवीन पोखरेल

लन्डन — नेपाली धावक भूमिराज राई १६ औं विश्व एथलेटिक्स च्याम्पियनसिपमा भाग लिन नेपाली धावक लन्डन आइपुगेका छन् । च्याम्पियनसिप शुक्रबार यहाँ सुरु भएको छ ।

धावक भूमिराज र नेपाल एथलेटिक्स संघका महासचिव सुनील राजवंशी लन्डन आएका हुन् । भूमिले ६ अगस्टमा हुने म्याराथन (४२.१९५ किमि) मा प्रतिस्पर्धा गर्नेछन् । ‘तयारी राम्रो छ, आशा छ आफ्नो रेकर्ड तोड्ने छु,’ भूमिले लन्डन उत्रिएपछि कान्तिपुरसँग भने । दशकयताको करिअरमा नेपालमा पाँच पटक राष्ट्रिय च्याम्पियन भइसकेका भूमिको व्यक्तिगत उत्कृष्ट समय २ घण्टा २० मिनेट ४४ सेकेन्डको छ । उनी नेपाल पुलिस क्लबसँग आबद्ध छन् । म्याराथनमा ५४ देशका १ सय ७ खेलाडीले प्रतिस्पर्धा गर्दै छन् । 
महासचिव राजवंशीले भूमिलाई क्वालिफाइङ टाइम बिट गराएर अर्को विश्व च्याम्पियनसिपमा नेपालको प्रतिनिधित्व गराउने आफूहरूको लक्ष्य रहेको सुनाए । 

हरेक दुई वर्षमा हुने विश्व एथलेटिक्स च्याम्पियनसिप यसपटक लन्डन ओलम्पिक स्टेडियममा भइरहेको छ । त्यसमा कुल ४८ इभेन्ट हुनेछन् । स्पर्धा १३ अगस्टसम्म चल्नेछ । यसैबीच, नेपाली खेलाडी र पदाधिकारीको सम्मानमा लन्डनस्थित माया पबमा आइतबार एक कार्यक्रम गरिने भएको छ । युवाद्वय सन्तोष राई र सिद्धार्थविक्रम क्षेत्रीले स्वागत तथा सम्मान कार्यक्रम तय गरेका छन् । 

 

प्रकाशित : श्रावण २१, २०७४ ०८:४७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT