रियलको जितमा रोनाल्डो नायक, केन पनि चम्किए

कान्तिपुर संवाददाता

म्याड्रिड — फरवार्ड क्रिस्टियानो रोनाल्डोको दुई गोल गरेपछि डिफेन्डिङ च्याम्पियन रियल म्याड्रिडले च्याम्पियन्स लिगमा सुखद् सुरुआत गरेको छ ।

रियलले बुधबार साइप्रसको च्याम्पियन एपोएल निकोसियालाई ३-० ले हरायो । घरेलु लिगमा निलम्बनका कारण विश्राममा रहेका रोनाल्डोले खेलको १२ औं मिनेटमा घरेलु टोलीलाई अग्रता दिलाए । दोस्रो हाफको सुरुआतमा एपोएलका डिफेन्डरले ह्यान्डबल गरेपछि रियलले पेनाल्टी पायो । पेनाल्टीमा रोनाल्डोले कुनै गल्ती गरेनन् । कप्तान सर्जियो रामोसले तेस्रो गोल गर्दै रियलको जित पक्का गरे ।

यसै गरी समूहको अर्को खेलमा इङलिस टोली टोटेनहम हट्स्परले बोरुसिया डर्टमुण्डलाई ३-१ ले पराजित गर्‍यो । वेम्बली मैदानमा भएको खेलमा जर्मन टोली खेलको चौथो मिनेटमै पछाडि पर्‍यो । दक्षिण कोरियाका फरवार्ड ह्युङ मिन सनले स्पर्सलाई अग्रता दिलाए ।

तर, यसै सिजन क्लबमा भित्रिएका यार्मालेन्कोले गोल गर्दै डर्टमुण्डलाई बराबरीमा ल्याए । त्यसको केही मिनेटमै इङ्ल्यान्डका फरवार्ड ह्यारी केनले उत्कृष्ट गोल गर्दै घरेलु टोलीलाई पुन: अगाडि बढाउन सफल रहे । दोस्रो हाफमा केनले अर्को गोल थपेपछि टोटेनहमले ३ अंक हात पार्‍यो।

प्रकाशित : भाद्र २९, २०७४ ०७:२९
ADVERTISEMENT
प्रतिक्रिया
पठाउनुहोस्

कान्तिपुरकर्मी चौधरी सम्मानित

कान्तिपुर संवाददाता

काठमाडौं — राष्ट्रिय उपभोक्ता मञ्चले कान्तिपुरकर्मी राजु चौधरीलाई सम्मान गरेको छ । उपभोक्ता हकहित संरक्षण तथा बजार अनुगमनको क्षेत्रमा छापा सञ्चार माध्यममा समाचारका माध्यमबाट सक्रियतापूर्वक कार्यसम्पदान गरी उपभोक्ता हित अधिकारका लागि विशेष योगदान पुर्‍र्याएको भन्दै चौधरीलाई मञ्चको १२ औं वार्षिकोत्सवको अवसरमा सम्मान गरिएको हो ।

बुधबार आयोजित कार्यक्रममा आपूर्तिमन्त्री शिवकुमार मण्डलले सम्मान गरेका हुन् । यस्तै संस्थागत रूपमा उज्यालो रेडियो नेटवर्कलाई सम्मानित गरिएको छ । 
मञ्चले कृषि विभागका महानिर्देशक डिल्लीराम शर्मा, आपूर्ति मन्त्रालयका उपसचिव उर्मिला केसी, ललितपुर उद्योग वाणिज्य संघका अध्यक्ष सबिन श्रेष्ठ, मञ्चका बर्दिया शाखा अध्यक्ष विष्णु तिमिल्सिना र ललितपुर जिल्ला महिला समितिका अध्यक्ष निना श्रेष्ठलाई पनि सम्मान गरेको छ ।

 

प्रकाशित : भाद्र २९, २०७४ ०७:२९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT