नेपाल उपविजेता

कान्तिपुर संवाददाता

काठमाडौं — अन्तर्राष्ट्रिय आमन्त्रण पुरुष कबड्डीमा उपविजेता बनेको नेपाली टोली । शनिबार फाइनलमा नेपाल भारतसँग ५९–२१ अंकले पराजित भएको थियो ।

काठमाडौं (कास)– नेपाली टोली अन्तर्राष्ट्रिय आमन्त्रण पुरुष कबड्डी प्रतियोगितामा दोस्रो भएको छ ।

त्रिपुरेश्वरस्थित राखेप कभर्डहलमा शनिबार सम्पन्न फाइनलमा नेपाल छिमेकी भारतसँग ५९–२१ अंकले पराजित भएको हो । भारतका गुरदीप उत्कृष्ट केचर तथा भारतकै विनित शर्मा उत्कृष्ट रेडर चुनिए । 

राउन्ड रोबिन लिगमा भारत विजेता र नेपाल उपविजेता हुँदै फाइनल पुगेका थिए । अखिल नेपाल कबड्डी संघद्वारा आयोजित तीन राष्ट्र सहभागी प्रतियोगिताको राउन्ड रोबिन लिगमा भारतले नेपाल र बंगलादेशलाई हराएको थियो । नेपालले बंगलादेशमाथि जित पाएको थियो ।

राष्ट्रिय खेलकुद परिषद्का सदस्य–सचिव केशवकुमार विष्टले खेलाडीलाई पुरस्कार वितरण गर्दै कबड्डी संघलाई दक्षिण एसियाली कबड्डी च्याम्पियनसिपको तयारी गरे राखेपले सक्दो सहयोग गर्ने प्रतिबद्धता जनाए । 

प्रकाशित : आश्विन ८, २०७४ ०७:१८
प्रतिक्रिया
पठाउनुहोस्

खुला पौडीमा देवेश विजयी

कान्तिपुर संवाददाता

लेखनाथ — एपीएफ क्लबका देवेश मानन्धरले पोखरामा सम्पन्न सातौं खुला पौडीको उपाधि जितेका छन् । फेवातालमा शनिबार भएको २.५ किलोमिटर दूरीको पौडी देवेशले २१ मिनेट ०४.०१ सेकेन्डमा पूरा गर्दै उपाधि जितेका हुन् ।

एपीएफकै शुभम श्रेष्ठ दोस्रो भए । उनले २१ मिनेट ०४.०७ सेकेन्डमा दूरी पार गरेका थिए । तेस्रो भएका आर्मीका रुद्र कटुवालले २१ मिनेट ५०.९६ सेकेन्ड लगाए । पहिलो, दोस्रो र तेस्रोले क्रमश: २५, १५ र १० हजार रुपैयाँ पुरस्कार पाए ।

महिलातर्फ पोल्यान्डकी भेनिसा ज्विक २५ मिनेट ००.३४ सेकेन्डमा निर्धारित दूरी पार गरेर विजेता भइन् । उपास्ती महर्जन र अनुष्का पोखरेल दोस्रो र तेस्रो भए । उनीहरूले क्रमश: २५ मिनट ४७.३१ सेकेन्ड र २६ मिनेट ५६.९२ सेकेन्डमा दूरी तय गरेका थिए । पहिलो, दोस्रो र तेस्रोले ८, ५ र ३ हजार रुपैयाँ पाए ।

कास्कीका खेलाडीबीच भएको स्थानीय प्रतियोगितामा धनमान गुरुङ २७ मिनेट ३१.५० सेकेन्डका साथ विजेता भए । अर्जुन नेपालीले ३१ मिनेट ५०.९९ सेकेन्ड र दीपेन्द्र खड्काले ३६ मिनेट २९.२५ सेकेन्डमा दूरी पार गरेर क्रमश: दोस्रो र तेस्रो भए । शीर्ष तीनका विजेताले ८, ५ र ३ हजार रुपैयाँ पाए । दुई विदेशीसहित १ सय ४० खेलाडी प्रतिस्पर्धी थिए । नेपाल पौडी संघ र कास्की जिल्ला पौडी संघको आयोजनामा ८ वर्षयता माछापुच्छ्रे कप तथा खुला पौडी आयोजना हुँदै आएको छ ।

प्रकाशित : आश्विन ८, २०७४ ०७:१८
पूरा पढ्नुहोस्
प्रतिक्रिया
पठाउनुहोस्