युभेन्ट्स रोकिँदा नेपोली शीर्षस्थानमा उक्लियो

रोयटर्स

मिलान — नेपोलीले शत प्रतिशत जितको नतिजालाई निरन्तरता दिँदै इटालियन सिरी एको शीर्षस्थानमा आफ्नो अग्रता बढाएको छ । आइतबार घरेलु मैदानमा काग्लीयारीलाई ३-० ले पराजित गर्दै नेपोलीले शीर्षस्थानमा २ अंकको अग्रता बनायो । नेपोलीको जितमा मारेक ह्यामसिक, ड्रिज मर्टेन्स र कालीदू कुलीबालीले गोल गरे ।

युभेन्ट्स अटलान्टाको घरेलु मैदानमा २-२ को बराबरी रोकिएपछि शत प्रतिशत जितको सिलसिला रोकियो । गोन्जालो हिगुआइन र फेडेरिको बर्नार्डेस्कीको गोलमा २४ मिनेटमा २-० ले अगाडी रहेको युभेन्ट्सले दुवै हाफमा १/१ गोल खायो । घरेलु टोलीका लागि माटिया कालडारा र ब्राएन क्रिस्टन्टेले गोल गरे । नेपोलीको ७ खेलमा २१ अंक छ भने दोस्रो स्थानको युभेन्ट्सले १९ अंक जोडेको छ ।

एएस रोमाले एसी मिलानलाई २-० ले हरायो । रोमको जितमा दुवै गोल दोस्रो हाफमा भएको थियो । ७२ औं मिनेटमा एडीन जेकोले रोमालाई अग्रता दिलाए । पाँच मिनेटपछि एलेसान्ड्रो फ्लोरेन्जीले गोल गर्दै जित पक्का गरे ।

लाजियोले सासुओलोलाई ६-१ ले पराजित गर्दा इन्टर मिलानले बेनेभेटोलाई २-१ ले हरायो ।

प्रकाशित : आश्विन १६, २०७४ १०:४६
प्रतिक्रिया
पठाउनुहोस्

दुर्घटनामा परी साउदी अरेबियामा नेपालीको मृत्यु

काठमाडौं — दुर्घटनामा परी साउदी अरेबियामा काम गर्दै आएका कञ्चनपुरको शुक्लाफाँटा नगरपालिका–१२ मघरघटैया मुक्त कमैया शिविरका ३५ वर्षीय वीरबहादुर रानाको मृत्यु भएको छ ।

साउदी अरेबियाको माहिल भन्ने स्थानमा सवारी दुर्घटनामा परी रानाको शनिबार बिहान मृत्यु भएको हो । राना एक वर्षअघि देखि साउदी अरेबियामा सवारी चालकका रुपमा काम गर्दै आएको नगरपालिका–१२ का वडाध्यक्ष वाले रानाले बताए। 'घरको कमाउने एक्लो व्यक्तिको मृत्यु भएपछि परिवार शोकमा डुबेको छ,' उनले भने ।

वीरबहादुरसँगै काम गर्दै आएका नेपालीले उनको घरमा दुर्घटनामा परी मृत्यु भएको जानकारी दिएको अध्यक्ष रानाले बताए । मृतकको कमाईमा आमा, बुबा, श्रीमती, नाबालक छोरा र दुईजना छोरी आश्रित रहेका थिए । 'मृतको शव स्वदेश ल्याउनका लागि पहल गरिरहेका छौँ,' अध्यक्ष रानाले भने ।

प्रकाशित : आश्विन १६, २०७४ १०:३३
पूरा पढ्नुहोस्
प्रतिक्रिया
पठाउनुहोस्