नेपाली टिमको संरचना फेरिँदै

एसियन कप २०१९ छनोट
सुबास हुमागार्इं

काठमाडौं — सुरुआती तीन खेलमा २ हार र १ बराबरी । एएफसी एसियन कप २०१९ को छनोटअन्तर्गत समूह ‘एफ’ मा रहेको नेपाल अहिले एक अंक बोकेर तालिकाको पुछारमा छ । नेपालले हालसम्मका तीनै खेलमा ४–४–२ को संरचना अपनाएको थियो ।

दोस्रो चरणमा घरेलु मैदानमा यमनसँग खेलेको गोलरहित बराबरी नेपालको एकमात्र अंक हो । त्यसबाहेक फिलिपिन्ससँग ४–१ र ताजकिस्तानसँग २–१ को पराजयसँगै नेपालको छनोट हुने सम्भावना पातलिंदै गएको छ ।

फिलिपिन्सविरुद्ध पहिलो खेलमा चोट लागेका लेफ्ट–ब्याक रविन श्रेष्ठ लामो समयका लागि बाहिरिएपछि दोस्रो खेलमा विराज महर्जनले उनको स्थान लिएका थिए । त्यसै खेलमा विक्रम लामाले सुरुआतमै रातो कार्ड बेहोरेपछि उनले दोस्रो खेल गुमाए । तर, प्रशिक्षक ग्योतोकु कोजीले त्यसका बावजुद पनि सोही संरचनामा रहेर खेलाइरहे ।

ताजकिस्तानविरुद्ध उसकै घरेलु मैदानमा हुने खेलका लागि भने प्रशिक्षक कोजीले नयाँ संरचना अपनाउने जमर्को गरेका छन् । नेपाली टोली सातदोबाटोस्थित एन्फा कम्प्लेक्समा नियमित प्रशिक्षणमा व्यस्त छ । कोजीले यसपटक ३–४–३ को संरचनामा टोलीलाई उतार्ने तयारी गरेका छन् । कोजीले प्रशिक्षणको सुरुआतबाटै नयाँ संरचनामा खेलाडीहरूलाई अभ्यस्त पार्न पोजिसनअनुसारको विशेष प्रशिक्षण दिइरहेका छन् । यस परिवर्तनले टोलीमा विगतको तुलनामा धेरै सन्तुलन ल्याउने उनको विश्वास छ ।

‘हामी नयाँ संरचनामा खेल्दैछौं । यसमा टिमले सन्तुलन पाउने अपेक्षा गरेको छु । यसैअनुसार हामीले प्रशिक्षण पनि गरिरहेका छौं,’ उनले भने । कोजीको आगमनपछि ४–४–२ खेल्न सुरु गरेको नेपालले त्यसअघि ४–३–३ को संरचनामा खेलेको थियो ।

सन् २०१५ को डिसेम्बरमा साफ च्याम्पियनसिप खेल्दाका बेल्जियन प्रशिक्षक प्याट्रिक अजेम्सले ४–३–३ संरचनामा टोली तयार पारेका थिए । अहिले राष्ट्रिय टोलीमा रहेका अधिकांश खेलाडी उनकै पालादेखि नियमित सदस्य रहँदै आएका छन् । उनले मिडफिल्डमा विक्रम लामा र रोहित चन्दका साथमा हेमन गुरुङ/विशाल राईलाई प्रयोग गरेका थिए । 

यस्तै उनकै पालामा नवयुग श्रेष्ठले आक्रमणको जिम्मेवारी सम्हाल्न सुरु गरे । विमल र अञ्जनलाई विङ्समा खेलाउँदै उनले नै नयाँ संरचनाको सुरुआत गरे । जुन नेपाललाई बंगबन्धु गोल्डकप र दक्षिण एसियाली खेलकुद (साग) मा स्वर्णपदक दिलाउन मुख्य कारक बनेको थियो ।

कोजीको आगमनपछि पुन: ४–४–२ कै रणनीतिमा फर्कियो । उनले प्रशिक्षण दिएको सुरुआती पाँच खेलमा नेपाली टिम अपराजित रह्यो । इतिहासमै पहिलोपटक एएफसीको मान्यताप्राप्त प्रतियोगिता एएफसी सोलिडारिटी कप जित्दा टोलीले लगातार ८ खेलसम्म अपराजित रहेको कीर्तिमान पनि बनायो । एसियन कपको छनोटमा फिलिपिन्सविरुद्धको हार कोजीका लागि पहिलो असफलता थियो । त्यसयताका तीन खेलमा नेपाल जितविहिन छ । त्यसैले पनि नयाँ संरचना आवश्यक देखिएको हो ।

नयाँ संरचना वर्तमान नेपाली टोलीका लागि फलदायी हुने आकलन गर्न सकिन्छ । हाल साइड डिफेन्समा निकै समस्या आइरहेको छ । रविनको चोट र दायाँतर्फ खेल्ने डिफेन्स फर्ममा नहुनुले टोलीलाई कठिनाइ आइरहेको छ । सेन्टरब्याकका तीनै खेलाडी फर्ममा रहेकाले पनि ३–४–३ को संरचनामा सहज हुन सक्छ । नियमित डिफेन्डर अनन्त तामाङसँगै आदित्य चौधरी र देवेन्द्र तामाङ डिफेन्समा देखिने सम्भावना छ । चार सदस्यीय मिडफिल्डलाई रोहित चन्दको उपस्थितिले बलियो बनाउँछ ।

विङ्गरले डिफेन्समा पनि उत्तिकै मिहिनेत गर्नुपर्ने भएकोले सुजल श्रेष्ठ, भरत खवास, कमल श्रेष्ठलगायतका खेलाडी त्यस पोजिसनमा खेल्न सक्छन् । आपंक्तिमा भने विमल घर्तीमगर, अञ्जन विष्ट र नवयुग श्रेष्ठसँगै नयाँ फरवार्ड जर्जप्रिन्स कार्कीले जिम्मेवारी पाउन सक्छन् ।

प्रकाशित : आश्विन १८, २०७४ ०७:५४
प्रतिक्रिया
पठाउनुहोस्

विश्वकप छनोटको उत्कर्ष-संकटमा अर्जेन्टिना

एएफपी

पेरिस — विश्वकप २०१८ को छनोट चरण अहिले उत्कर्षतर्फ छ । लियोनल मेसीको अर्जेन्टिना समस्यामा छ । सिरिया प्ले–अफ खेल्दैछ, उसको विश्वकप खेल्ने सपना अझै तुहिएको छैन ।

अनि युरोपेली च्याम्पियन पोर्चुगलले अझै धेरै गर्नुु छ । विश्वकप छनोट अन्त्यतर्फ पुग्दा कहाँ कस्तो छ त ? एएफपीले तयार पारेको रिपोर्ट :

संकटमा अर्जेन्टिना
ब्राजिलले अर्को वर्षको मार्चमा हुने विश्वकपका लागि आफ्नो स्थान सुरक्षित गरिसकेको छ । तर दक्षिण अमेरिकाबाट स्वत: छनोट हुने तीन टिमको निर्णय हुन अझै बाँकी छ । र, यताको छनोटमा दुई चरणका खेल मात्र बाँकी छन् । दुईपल्टको विश्वकप च्याम्पियन अर्जेन्टिनाले सन् १९७० यता लगातार विश्वकपको अन्तिम चरण खेलेको छ । तर पाँचपल्ट बेलन डे’अर जितेका मेसी र उनका साथीहरूको टिम भने संकटमा छ । तीन वर्ष अगाडि ब्राजिलमा भएको विश्वकपमा फाइनल खेलेको अर्जेन्टिना अहिले पाँचौं स्थानमा छ । अझ कोपा अमेरिका विजेता चिली त छैटौं स्थानमा छ । 

जर्मनी अगाडि बढ्दै, पोर्चुगल र फ्रान्सलाई गाह्रो
आउने विश्वकपको अन्तिम चरण खेल्ने ३२ टिममध्ये १४ टिम त युरोपकै हुनेछन् । तर अहिलेसम्म युरोपबाट बेल्जियमले मात्र रुसमा खेल्ने निधो भइसकेको छ । युरोपेली छनोटमा पनि दुई चरणका खेल बाँकी छन् । विश्वकपको डिफेन्डिङ च्याम्पियन जर्मनीले बिहीबार उत्तरी आयरल्यान्डको सामना गर्नेछ र त्यसमा बराबरी निकाले, उसले पनि रुसको यात्रा तय गर्नेछ । युरोपमा रहेको छनोटका नौ समूह विजेताले विश्वकपमा स्वत: प्रवेश पाउनेछन् । उपविजेताबीच प्ले–अफ हुनेछ । पोर्चुगल र फ्रान्सलाई भने केही गाह्रो छ ।

नजिकको दूरीमा नाइजेरिया र ट्युनिसिया
अफ्रिकाबाट पाँच टिम रुस जानेछन् । तर यहाँ पनि अन्तिम चरण खेल्न कुनै टिमको निर्णय भइसकेको छैन । नाइजेरिया छैटौं विश्वकपको नजिक छ । यस्तै स्थिति अल्जेरियाको पनि छ । अफ्रिकी च्याम्पियन क्यामरुन पनि बलियो स्थितिमा छ भन्दा फरक पर्दैन ।

युद्धग्रस्त सिरिया प्ले–अफ खेल्दै
इरान, जापान, दक्षिण कोरिया र साउदी अरेबियाले अर्को वर्ष विश्वकपमा एसियाको प्रतिनिधित्व गर्नेछन्, यो तय भइसकेको छ । तर पाँचौं टिम कुन हुनेछ त ? सिरिया अथवा अस्ट्रेलिया । युद्धबाट गुज्रिरहेको सिरियाले अहिलेसम्म तय गरेको विश्वकप छनोट यात्रा अविश्वसनीय छ, परीको कथा जस्तो । यही टिमले प्ले–अफमा अस्ट्रेलियाको सामना गर्न लागेको हो । यसको विजेताले थप प्ले–अफ खेल्नेछ र यो रहनेछ, कन्काकेफको चौथो स्थानमा रहेको टिमविरुद्ध । 

मेक्सिको छनोटको बाटोमा
मेक्सिको लगातार सातौंपल्ट विश्वकप छनोटको संघारमा छ । यस्तै बलियो स्थिति कोस्टारिकाको पनि छ । स्वत: छनोट हुने तेस्रो टिमको निर्णय भने जटिल देखिन्छ । चौथोले भने प्ले–अफ खेल्नेछ । अहिले तत्काल पानामा तेस्रोमा छ, मेक्सिको र कोस्टारिका पछि ।

प्रकाशित : आश्विन १८, २०७४ ०७:५४
पूरा पढ्नुहोस्
प्रतिक्रिया
पठाउनुहोस्