एसियन कप २०१९ छनोट : नेपाल र फिलिपिन्स भिड्दै

राजु घिसिङ

काठमाडौं — समूह ‘एफ’मा जित हात पार्न बाँकी रहेको एक्लो टिम नेपालले फाइनल चरण पुग्ने सभ्भावना समाप्त भइसके पनि शीर्षस्थानको फिलिपिन्सविरुद्ध मंगलबार जित हात पार्नको लागि खेल्ने योजना बनाएको छ ।

सातदोबाटोस्थित एन्फा कम्प्लेक्समा हुने खेलबारे कप्तान अनिल गुरुङले भने, ‘फिलिपिन्स बलियो छ किनभने हामीभन्दा उच्चस्तरको टिम हो । हामी जित्नकै लागि खेल्नेछौं तर त्यसका लागि धेरै मिहिनेत गर्नुपर्छ ।’ गत वर्ष मनिलामा भएको भेटमा फिलिपिन्सले नेपाललाई ४–१ ले हराएको थियो । त्यसमा मिडफिल्डर विक्रम लामाले बेहोरेको रातो कार्डले पनि असर गरेको थियो ।

‘जे–जस्तो (समीकरण) भएपनि हाम्रो लागि महत्वपूर्ण खेल हो । त्यसैले जितकै लागि खेल्नेछौं,’ अनिलले भने । नेपालले फिफा वरियतामा ५९ स्थानमाथिको टिम फिलिपिन्ससँगको खेलबाटै कप्तान अनिलले अन्तर्राष्ट्रिय फुटबलबाट सन्यास लिने घोषणा गरिसकेका छन् । उनी अन्तिम खेलमा पनि पहिलो रोजाईमा भने खेल्ने छैनन् ।

ट्रेनिङ गर्ने क्रममा घुँडामा चोट लागेकाले डिफेन्डसद्वय देवेन्द्र तामाङ र आदित्य चौधरी टिमबाहिर छन् । त्यसैले प्रशिक्षक ग्योतोकु कोजीले नेपाली टिमको संरचना नै परिवर्तन गरेका छन् । ‘अब ४–४–२ को संरचनामा खेल्दैछौं,’ पछिल्लो खेलमा ३–४–३ को शैलीमा टिम उतारेका उनले भने, ‘पहिला देखिएका कमजोरी हटाएर खेल्न केन्द्रित हुनेछौं ।’

गोलकिपरमा किरण चेम्जोङ यथावत् छन् भने रोहित चन्दलाई मिडफिल्डबाट डिफेन्सको जिम्मेवारी दिइएको छ । उनलाई डिफेन्समा अनन्त तामाङ, विराज महर्जन र कमल श्रेष्ठले साथ दिनेछन् । उनीहरूलाई चेल्सीको एकेडेमीमा प्रशिक्षण गरेका फिलिप जेम्स योङहजब्यान्डको नेतृत्वमा रहेको फिलिपिन्सको अग्रपंक्तिले व्यस्त राख्न सक्छ ।

फिलिपिन्स (८ अंक) भने नेपाललाई हराएर एसियन कपमा पहिलोपल्ट छनोट हुने योजनामा रहेको छ । फिलिपिन्ससँगै यमन (६) र ताजिकिस्तान (६) महादेसीय प्रतियोगितामा छनोट हुने दौडमा छन् । समूहका शीर्ष दुईले एसियन कप खेल्ने अवसर पाउनेछन् । तीन हार र एक बराबरी खेलेको नेपाल (१) को लागि भने फाइनल चरण पुग्ने ढोका बन्द भइसकेको छ ।

फिलिपन्सका प्रशिक्षक थोमस डुलीले नेपाली टिमलाई सजिलो प्रतिद्वन्द्वीको रुपमा नलिएको बताएका छन् । ‘यो महत्वपूर्ण खेल हो, जित्यौं भने हामी एसियन कपमा पहिलोपल्ट छनोट हुनेछौं,’ प्रशिक्षक डुलीले भने, ‘खेल सजिलो हुँदैन । नेपाललाई कमजोर आँक्नु हुँदैन ।’ मनिलामा प्राप्त ४–१ को जितबारे उनले भने, ‘त्यसले केही अर्थ राख्दैन, यो नै सबभन्दा ठूलो खेल हो । कसैलाई कमजोर मान्नु हुँदैन किनभने नेपालले यमनसँग बराबरी गरेको थियो र ताजिकिस्तानसँग १–२ ले हारेको थियो । हरेक खेल फरक हुन्छ ।’

नेपाल र फिलिपिन्स यसअघि आपसमा ५ पल्ट भिडेका थिए । सुरुको भेटमा नेपाल विजयी भएपनि पछिल्ला चारै खेल फिलिपिन्सले सजिलै जितेको छ । त्यसैले पनि नेपाललाई आजको खेल कठिन हुनसक्छ ।

नेपाली टिम
गोलपिकर : किरण चेम्जोङ
डिफेन्स : विराज महर्जन, रोहित चन्द, अनन्त तामाङ, कमल श्रेष्ठ
मिडफिल्ड : सुजल श्रेष्ठ, विक्रम लामा, विशाल राई, भरत खवास
फरवार्ड : विमल घर्तीमगर, अन्जन विष्ट

प्रकाशित : कार्तिक २८, २०७४ १२:५६
प्रतिक्रिया
पठाउनुहोस्

बेलायत मेरो दोश्रो घर : प्रियंका

कान्तिपुर संवाददाता

लन्डन — व्यस्त नायिका प्रियंका कार्की यसपटक दुई दिनका लागिमात्र बेलायत टेकिन् । आफ्नो ‘लिड रोल’ रहेको चलचित्र ‘हयाप्पी डेज’ को रेड कार्पेट प्रिमियर शो भ्याउन उनी हतार हतार बेलायत आएकी थिइन् ।

‘बेलायत अहिले मेरो दोश्रो घर जस्तै भएको छ,' प्रियंकाले भनिन्, ‘फिल्म छायांकन र बेलायतका दर्शक एवं आम नेपालीको माया सद्भावले यूके आवतजावत गर्न प्रेरित गर्दो रहेछ ।’

नेपालका केही प्रोजेक्ट सकेर उनी फेरि छिट्टै यूके आउंदैछिन् ‘लिली बिली’ चलचित्रका लागि । हयाप्पी डेजकै निर्देशक मिलन चाम्सले निर्देशन गर्ने ‘लिली बिली’ छायांकनका लागि फिल्म युनिट अहिले स्कटल्याण्डमा छ ।

आइतबार अल्डरसटस्थित प्रिन्सेस हलमा आयोजित हयाप्पी डेजको रेड कार्पेट प्रिमियर शोमा प्रियंकाले दर्शकप्रति आभार व्यक्त गरिन् । नेपाल बाहिर फिल्म निर्माण आफैंमा चुनौतिपूर्ण भएको बताउंदै उनले सबैको साथ भए नेपाली चलचित्र विश्वव्यापी पुग्ने विश्वास व्यक्त गरिन् । प्रियंकाले फिल्म छायांकनका क्रममा करिब डेढ महिना भोग्नुपरेको बेलायतको चिसो, लोकेशनको बिकटता, यातायात र अन्य व्यवस्थापनका अप्ठेरो स्मरण गर्दै अन्तत: फिल्म रिलिज भएकामा खुशी व्यक्त गरेकी थिइन् ।

बेलायतका नेपाली व्यवसायीले निर्माण गरेकोचलचित्र हयाप्पी डेज को शो शुरु हुनु अघि कलाकारहरु प्रियंका कार्की, धिरेन शाक्य, प्रदीप खड्का र दीया पुन लिमोजिनबाट उत्रंदा दर्शकहरुले न्यानो स्वागत गरेका थिए । उक्त अवसरमा पाइपर धुन बजाइएको थियो ।

कार्यक्रमका प्रमुख अतिथी राजदूत डा. दुर्गाबहादुर सुवेदीले चलचित्र युनिटलाई बधाइ तथा शुभकामना दिए । उनले हयाप्पी डेजबाट मनोरन्जन र सन्देश लिन आग्रह गर्दै नेपाली चलचित्र र कलाकारहरुलाई माया र सम्मान गर्न अनुरोध गरे । नेपाली कलालाई इज्जत र स्नेह, नेपाली संस्कृति, सभ्यता र परम्परा अनि नेपाल र नेपालीलाई माया गरौं भन्दै राजदूतले शो शुभारम्भ गरेका थिए ।

एनआरएनए केन्द्रिय उपाध्यक्ष कुल आचार्यले बेलायतका नेपाली व्यवसायले निर्माण गरेको फिल्मको सफलताको शुभकामना दिंदै गैर आवासीय नेपाली संघ (एनआरएनए) ले नेपाली चलचित्रको विकास तथा प्रवर्धनमा सधैं साथ दिने प्रतिवद्धता व्यक्त गरे ।

उक्त फिल्मका निर्देशक मिलन चाम्सले सहयोगी सबैप्रति आभार व्यक्त गरे ।

प्रस्तुतकर्ता वी पी खनालले स्कटल्याण्ड, वेल्स र इंग्ल्याण्डका रमणीय दृश्यहरु समेटेर ९५ प्रतिशत छायांकन बेलायतमै गरिएको जनाए । उक्त चलचित्रको लगानी अढाइ करोड रुपैयां पुगेको दावी निर्माण पक्षको छ ।

प्रियंका, दयाहाङ राई, सन्जय गुप्ता, विक्की जोशी, मोनिका गुरुङ आदि कलाकारले अभिनय गरेको उक्त चलचित्रले आम नेपालीको बेलायत टेक्ने सपना, यहां आइसकेपछि रातो पासपोर्टको महत्वकांक्षा, आप्रवासीले भोग्नुपर्ने अप्ठेरो जस्ता सामाजिक विषयवस्तुलाई उजागर गरेको छ ।

प्रिमियरमा फिल्मका प्रस्तोता तथा निर्माता वी पी खनाल र अन्य निर्माताहरु हिरल जोशी, भवानी शर्मा, मिलन चाम्स, डा. अशोक बन्साल लगायत सयौं दर्शक सहभागी थिए ।

‘हयाप्पी डेज’ नेपालमा आगामी माघ १२ देखि प्रदर्शन हुनेछ ।

तस्बिरहरु : मिलन तमु

प्रकाशित : कार्तिक २८, २०७४ १२:५६
पूरा पढ्नुहोस्
प्रतिक्रिया
पठाउनुहोस्