घरमा झापाको जित

अर्जुन राजवंशी

झापा — झापा एघारले दोस्रो सताक्षी गोल्डकप फुटबलको मंगलबार उद्घाटन खेलमा पोखरा ११ लाई ५–० ले पराजित गर्दै सेमिफाइनल तय गरेको छ ।

घरेलु भूमिमा झापा हाबी हुँदा स्ट्राइकर कर्ण लिम्बूले २, गिल्सन कन्दङ्वा, विशाल राई ‘ए’ र विदेशी खेलाडी अजय मार्टिन्सले १–१ गोल गरेका थिए । झापाले पहिलो हाफमै ३ गोल गरेको थियो । मार्टिन्सले १२ औं मिनेटमा टोलीलाई अग्रता दिलाए । विशालको पासमा उनले सेकेन्ड बार च्याप्दै गोल गरेका थिए । १७ औं मिनेटमा कर्णले वान टचमै गोल गरे । कप्तान योगेश गुरुङले दिएको क्रसमा कर्ण पोखरेली गोलकिपर दीप कार्की अगाडि बढेको अवस्थामा गोल गर्न सफल भए ।

त्यसको दुई मिनेटमै विशालले टोलीका लागि तेस्रो गोल गरेका थिए । उनले पेनाल्टी एरिया नजिकबाट प्रहार गरेको बल गोलमा परिणत भयो । ५१ औं मिनेटमा मिडफिल्डर गिल्सन कन्दङ्वाले गोलकिपर दीप बिट हुँदा मैदानको मध्यभागबाट प्रहार गरेको बल गोल हुन पुग्यो । कर्णले ७१ औं मिनेटमा व्यक्तिगत दोस्रो तथा टिमका लागि पाँचौं गोल गरेका थिए ।

पोखराका खेलाडीले पाएका सबै अवसर खेर फाले । पहिलो हाफमा हानेको दर्शनीय प्रहार पोस्ट माथिबाट बाहिरियो । पोखराका किरण थापामगरले ५५ औं मिनेटमा पेनाल्टी एरिया नजिकैबाट गरेको सशक्त प्रहार झापाका गोलरक्षक किशोर गिरी पन्च गरेर बचाए । पोखराले ५८ औं मिनेटमा पाएको पेनाल्टीसमेत खेर फालेको थियो । कप्तान बिष्णु गुरुङको पेनाल्टी प्रहार बाहिरियो । त्यसपछि पोखरा खेलमा फर्कन सकेन ।

झापाका कप्तान योगेश म्यान अफ द म्याच भए । उनले १० हजार रुपैयाँ पुरस्कार पाए । मंसिर ७ सम्म चल्ने प्रतियोगिता विजेताले ५ लाख र उपविजेताले २ लाख ५० हजार रुपैयाँ प्राप्त गर्नेछन् । गोल्डकपमा ‘ए’ डिभिजनका ६, एक विदेशी र आयोजकसहित १० टिमले भाग लिएको आयोजक सताक्षी स्पोर्टिङ क्लबका अध्यक्ष रमेश लावतीले बताए ।

बुधबार एपीएफ र भारत मध्यप्रदेशको डायमन्ड अफ फुटबल एकेडेमीबीच प्रतिस्पर्धा हुनेछ ।

प्रकाशित : कार्तिक २८, २०७४ २०:०२
प्रतिक्रिया
पठाउनुहोस्

भोट माग्दै सुटिङस्थलमै पुगे उम्मेदवार

कान्तिपुर संवाददाता

भक्तपुर — हास्य कलाकार हरिवंश आचार्य स्क्रिप्ट हेर्दै थिए । अर्का कलाकार किरण केसी सेक्यूरिटी गार्डको पोशाक लगाएर मोटरसाइकलमा आएका दिपकराज गिरीलाई स्यालुट गर्दै थिए । त्यति नै बेला भोट माग्दै भक्तपुर क्षेत्र नम्बर २ वाम गठबन्धनका उम्मेदवार महेश बस्नेत सुटिङ स्थलमै छिरे । सुटिङ भइरहँदा चर्को आवाजमा माइकिङ गर्दै एक हुल सुटिङ भएतिरै हानिए ।

यही क्षेत्रका अर्का उम्मेदवार दमननाथ ढुंगाना पनि अहिले यही बस्तीमा बस्छन् । अरु बेला पनि कार्यकर्ताको ओहोरदोहोर भएपनि यसरी माइकिङ गर्दै भने कुनै उम्मेदवार आएका थिएनन् । जब चुनाव प्रचार टोली सुटिङस्थलमै छिरेपछि सुटिङ हेरेर बसेका सर्वसाधरण भने फिल्मकै एउटा दृश्य हो की भन्ने आँकलन समेत गर्न भ्याए । तर, त्यो र्‍याली सुटिङको अंश नभई वास्तविक चुनावी प्रचार थियो ।

बालकोटस्थित रोज भिलेजमा मह सञ्चारको सत्रुगते फिल्मको किरण केसीको प्रस्तुतिमा सुटिङ भइरहेको थियो । ‘सुटिङ भइरहेको थियो । चुनाव प्रचार प्रसारमा आएको टिमले एक छिन रमाइलै गर्‍यो,’ केसीले भने । कलाकारहरु भक्तपुर क्षेत्र नम्बर २ को उम्मेदवार नभएपछि भोट मागे । कलाकारहरुले उम्मेदवारसँग चुनावी माहोलको जानकारी लिए । चुनाव प्रचारप्रसारमा हिँडेका कार्यकर्ताहरु कलाकारसँग फोटो खिचाउन समेत भ्याए । चुनाव प्रचार टोलीले गर्दा सुटिङ केही बेर रोकियो ।

भक्तपुरको क्षेत्र नम्बर २ मा यसपाली पूर्व सभामुख दमननाथ ढुंगाना उम्मेदवार भएपछि चुनावी चासो बढेको छ । उनका प्रतिस्पर्धी एमालेबाट बस्नेत छन् । नेमकिपाबाट अनुराधा थापामगर छिन् । ढुंगानाले शनिबारदेखि चित्तपोलबाट घरदैलो सुरु गरेका हुन् । मंगलबार सिपाडोलमा घरदैलो सकाए भने बस्नेतले सोमबारदेखि सूर्यबिनायक नगरपालिका १ बालकोटबाट घरदैलो सुरु गरेका हुन् । मंगलबार बालकोट क्षेत्रमा घरदैलो सकाए । उनीहरुका प्रतिस्पर्धी थापामगरले भने कार्यकर्ता भेटघाटमा व्यस्त छिन् ।

यी तीन जना सहित भक्तपुर क्षेत्र नम्बर २ मा १३ जनाले उम्मेदवारी दिएका छन् । निर्वाचन कार्यालयका अनुसार मालेबाट बसन्तबहादुर खत्री, जनमोर्चाबाट शिवहरी खनाल, एकीकृत राष्ट्रिय प्रजातन्त्र पार्टीबाट ताराकुमारी बास्कोटा, राष्ट्रिय जनमुक्ति पार्टीबाट दिलबहादुर तामाङ, विवेकशिल साझाबाट शशिबिक्रम थापा, नयाँ शक्ति पार्टीबाट राम खाइजु र नेपाल दलित पार्टीबाट कमला बर्देवा उम्मेदवार हुन् । त्यस बाहेक सुरेन्द्र था श्रेष्ठ, कृष्णप्रसाद न्यौपाने, धर्मराज थापाले स्वतन्त्र उम्मेदवारी दिएका छन् ।

प्रकाशित : कार्तिक २८, २०७४ २०:०२
पूरा पढ्नुहोस्
प्रतिक्रिया
पठाउनुहोस्