कप्तान गुरुङको अन्तर्राष्ट्रिय फुटबलमा लाग्यो पूर्णविराम [फोटोफिचर]

राष्ट्रिय टिमका १५ औं कप्तान । ५० क्याप । नौ गोल । सोलिडारिटी कप विजेता ।
राजु घिसिङ

काठमाडौं — नेपाली राष्ट्रिय टिमका १५ औं कप्तान अनिल गुरुङले अन्तर्राष्ट्रिय फुटबलबाट मंगलबार सन्यास घोषणा गरेका छन् । उनले एसियन कप २०१९ छनोटमा फिलिपिन्सविरुद्ध एन्फा कम्प्लेक्समा गोलरहित नतिजा निकालेपछि राष्ट्रिय टिमसँगको १० वर्षे करिअरमा पूर्णविराम लगाएका हुन् ।

‘यहाँसम्म आइपुग्ने कहिल्यै सोचेको थिइनँ,’ एन्फाद्वारा आयोजित बिदाईमा भावुक देखिएका ३१ वर्षीय अनिलले भने, ‘बुबाको चाहना भर्ती भएर लाहुरे होस् भन्ने थियो तर म फुटबल खेल्नतिर लागे र यहाँसम्म आइपुगे । फुटबलमा नाम पनि छ दाम पनि छ । परिवारलाई पनि साथ पनि दिए । अहिले म जुन स्थानमा छु, त्यहाँ हेर्दाखेरि बुबा खुसी नै हुनुहुन्छ होला ।’

८ अक्टोबर, २००७ मा मस्कटमा भएको विश्वकप छनोटमा ओमानसँग २–० ले पराजित भएको खेलमार्फत् उनले राष्ट्रिय टिममा डेब्यू गरेका थिए । त्यसमा उनलाई प्रशिक्षक श्याम थापाले पहिलो रोजाईमा खेलाएका थिए । मस्कटबाट सुरु भएको उनको अन्तर्राष्ट्रिय फुटबलको करिअर दस वर्ष चल्यो । फरवार्ड अनिलले ८१ औं मिनेटमा सुजल श्रेष्ठको स्थान लिँदै मंगलबार ५० क्यापको कोसेढुंगा पार गरेका थिए ।

अन्तिम खेलमा उनले आफ्नो प्रभाव भने देखाउन सकेनन् । उनी साफ च्याम्पियनसिप २०१५ मा कप्तान घोषित् भएका थिए र त्यसयता नै पहिलो रोजाईको टिमबाट खेल्न संघर्षरत् रहँदै आएका थिए । उनी केही खेलमा त टिममा पनि परेका थिएनन् । नौ गोल गरेका उनले गत वर्ष सोलिडारिटी कप जितेको नेपाली टिमको पनि नेतृत्व गरेका थिए । ‘सहारा एकेडेमीबाट मलाई यहाँसम्म पुर्‍याउन धेरैले सहयोग गर्नुभएको छ । पविरा, खेलाडी, साथी, कोचहरूलगायत सबैलाई धन्यवाद दिन चाहन्छु । एन्फालाई विशेष धन्यवाद,’उनले भने । ब्रिगेड ब्वाइज, थ्रीस्टार, एनआरटी, मनाङमर्स्याङ्दी र भारतको सिलोङ लाजोङ क्लबबाट खेलेका उनले क्लब फुटबललाई भने निरन्तरता दिने बताए । उनी एनआरटी र लाजोङमा छँदा नेपालकै सर्वाधिक महँगा फुटबलर थिए ।

‘सन्यासबारे पहिले पनि सोचेको थिए तर पछिल्लो समयमा खेल (लिग) नभएपछि घरेलु मैदानमा औपचारिक अन्तर्रास्ट्रिय खेल भइरहेको र यो नै सन्यास लिनलाई मेरो लागि सबभन्दा राम्रो हुन्छ भन्ने लाग्यो,’उनले भने, ‘उमेरअनुसार म योभन्दा बढी खेल्ने खेलाडी हो तर समयले गर्दा यति (५० खेल) नै भयो ।’

जापानमा ट्रेनिङ गरेर जेठमा फर्कंदा नै सन्यास लिने तयारी गरेको उल्लेख गर्दै उनले भने, ‘पहिलो प्रयासमा यू–१६ को क्याम्पसम्म पुगेको थिए । त्यसपछि यू–१९ र यू–२३ टिमबाट खेल्दै राष्ट्रिय टिममा पुगेको थिए । यसरी हेर्दा १२–१३ वर्ष अन्तर्राष्ट्रिय फुटबल खेलेछु । जब जापानमा ट्रेनिङका लागि गएका थियौं तब नै सन्यास लिनुपर्ने समय आयो भन्ने लागेको थियो । जुनियर खेलाडीहरू पनि राम्रा छन्, उनीहरूले पनि अवसर पाउनुपर्छ ।’

पोखराका अनिलले भने, ‘सबै खेलाडीले एक दिन सन्यास लिनैपर्छ । तर मलाई यो दिन पनि आयो भन्न अझै विश्वास लागिरहेको छैन ।’अनिललाई नेपाली फुटबलमा मैदानभित्र मिहिनेत र अनुशासनका पर्याय पनि मानिन्छन् । इंग्ल्यान्डको वोकिङ क्लबमा नौ वर्षअघि गरेको ट्रेनिङ नै करिअरले उचाई लिनुको मुख्य कारण भएको उनले बताए । दर्शकले भरिएको दशरथ रंगशालामा आठ वर्षअघि प्रधानमन्त्री कपको उपाधि जित्दाको क्षणलाई उनी अविस्मरणीय मान्छन् ।

 

प्रकाशित : कार्तिक २८, २०७४ २०:११
प्रतिक्रिया
पठाउनुहोस्

घरमा झापाको जित

अर्जुन राजवंशी

झापा — झापा एघारले दोस्रो सताक्षी गोल्डकप फुटबलको मंगलबार उद्घाटन खेलमा पोखरा ११ लाई ५–० ले पराजित गर्दै सेमिफाइनल तय गरेको छ ।

घरेलु भूमिमा झापा हाबी हुँदा स्ट्राइकर कर्ण लिम्बूले २, गिल्सन कन्दङ्वा, विशाल राई ‘ए’ र विदेशी खेलाडी अजय मार्टिन्सले १–१ गोल गरेका थिए । झापाले पहिलो हाफमै ३ गोल गरेको थियो । मार्टिन्सले १२ औं मिनेटमा टोलीलाई अग्रता दिलाए । विशालको पासमा उनले सेकेन्ड बार च्याप्दै गोल गरेका थिए । १७ औं मिनेटमा कर्णले वान टचमै गोल गरे । कप्तान योगेश गुरुङले दिएको क्रसमा कर्ण पोखरेली गोलकिपर दीप कार्की अगाडि बढेको अवस्थामा गोल गर्न सफल भए ।

त्यसको दुई मिनेटमै विशालले टोलीका लागि तेस्रो गोल गरेका थिए । उनले पेनाल्टी एरिया नजिकबाट प्रहार गरेको बल गोलमा परिणत भयो । ५१ औं मिनेटमा मिडफिल्डर गिल्सन कन्दङ्वाले गोलकिपर दीप बिट हुँदा मैदानको मध्यभागबाट प्रहार गरेको बल गोल हुन पुग्यो । कर्णले ७१ औं मिनेटमा व्यक्तिगत दोस्रो तथा टिमका लागि पाँचौं गोल गरेका थिए ।

पोखराका खेलाडीले पाएका सबै अवसर खेर फाले । पहिलो हाफमा हानेको दर्शनीय प्रहार पोस्ट माथिबाट बाहिरियो । पोखराका किरण थापामगरले ५५ औं मिनेटमा पेनाल्टी एरिया नजिकैबाट गरेको सशक्त प्रहार झापाका गोलरक्षक किशोर गिरी पन्च गरेर बचाए । पोखराले ५८ औं मिनेटमा पाएको पेनाल्टीसमेत खेर फालेको थियो । कप्तान बिष्णु गुरुङको पेनाल्टी प्रहार बाहिरियो । त्यसपछि पोखरा खेलमा फर्कन सकेन ।

झापाका कप्तान योगेश म्यान अफ द म्याच भए । उनले १० हजार रुपैयाँ पुरस्कार पाए । मंसिर ७ सम्म चल्ने प्रतियोगिता विजेताले ५ लाख र उपविजेताले २ लाख ५० हजार रुपैयाँ प्राप्त गर्नेछन् । गोल्डकपमा ‘ए’ डिभिजनका ६, एक विदेशी र आयोजकसहित १० टिमले भाग लिएको आयोजक सताक्षी स्पोर्टिङ क्लबका अध्यक्ष रमेश लावतीले बताए ।

बुधबार एपीएफ र भारत मध्यप्रदेशको डायमन्ड अफ फुटबल एकेडेमीबीच प्रतिस्पर्धा हुनेछ ।

प्रकाशित : कार्तिक २८, २०७४ २०:११
पूरा पढ्नुहोस्
प्रतिक्रिया
पठाउनुहोस्