आर्मी फाइनलमा

अर्जुन राजवंशी

दमक — घरेलु समर्थक र मैदानमा झापा एघारलाई स्तब्ध बनाउँदै विभागीय टोली त्रिभुवन आर्मी क्लब सोमबार दोस्रो सताक्षी गोल्डकप फुटबलको फाइनल पुगेको छ ।

आर्मीले पहिलो सेमिफाइनलमा झापालाई ३–० ले हरायो । जितसँगै आर्मीले कम्तीमा २ लाख ५० हजार रुपैयाँ पुरस्कार सुरक्षित गरेको छ । १३ औं मिनेटमा नवयुग श्रेष्ठले गोल गर्दै आर्मीलाई अग्रता दिलाएका थिए ।

झापाका कप्तान योगेश गुरुङले पेनाल्टी बक्सनजिकै सन्तोष तामाङलाई फाउल गरेपछि आर्मीले फ्रि–किक पायो । सन्तोषको फ्रि–किकमा झापाका गोलकिपर किशोर गिरी अनमार्क हुँदा नवयुगले गोल गरे ।

नवयुगले ३६ औं मिनेटमा दोस्रो गोल गर्दै आर्मीको अग्रता दोब्बर बनाए । उनले जर्ज प्रिन्स कार्कीको पासमा मैदानको मध्यभागबाट एक्लो प्रयासमा लगेको बलमा गोल गरेका हुन् । ७८ औं मिनेटमा आर्मीका बैकल्पिक खेलाडी दीप लामाले गोल गर्दै टिमको जित सुनिश्चित गरे ।उनले पदम तामाङको पासमा गोल गरेका थिए ।

खेलको दोस्रो मिनेटमै म्यान अफ द म्याच नवयुगले गरेको प्रहार क्रसबार नजिकैबाट बाहिरियो । १४ औं मिनेटमा जर्ज प्रिन्सले पनि लक्षित प्रहार गरेनन् । झापाका विशाल राईले ३७ औं मिनेटमा गरेको कडा प्रहार आर्मीका गोलरक्षक विकेश कुथुले पन्च गर्दै जोगाए ।

७१ औं मिनेटमा नवयुगको प्रहार गोलरक्षक किशोरले पन्च गरेर बचाए । ८८ औं मिनेटमा पेनाल्टी बक्सभित्रबाट झापाका पूजन उपरकोटीेले गरेको प्रहार गोलरक्षक विकेशले जोगाए । मंगलबार आयोजक सतासीधाम र मनाङ मस्र्याङदी क्लबबीच दोस्रो सेमिफाइनल हुनेछ ।

प्रकाशित : मंसिर ५, २०७४ ०८:४८
ADVERTISEMENT
प्रतिक्रिया
पठाउनुहोस्

अभिषेक र मायांका अपराजित

कान्तिपुर संवाददाता

काठमाडौं — पश्चिमाञ्चलका अभिषेक बाँस्तोला र पुलिस क्लबकी मायांका राणा १४ औं राष्ट्रिय लनटेनिस प्रतियोगिताको सोमबार पाँचौं चरण सकिँदासम्म अपराजित छन् ।

सातदोबाटोस्थित टेनिस कोर्टमा सोमबार महिला सिंगलमा मायांकाले आफ्नै बहिनी माहिकालाई ६–२, ६–१ को सोझो सेटमा हराइन् । उनले अर्को खेलमा वाकओभर पाइन् । माहिकाले एपीएफकी भगवती बिकलाई ६–३, ६–१ ले हराइन् । पुरुष सिंगलमा अभिषेकले पुलिसका दावा शेर्पालाई ६–०, ६–० र आर्मीका प्रणव खनाललाई ७–५, ६–४ को सेटमा हराए । पश्चिमाञ्चलकै प्रदीप खड्काविरुद्ध भने प्रणव ६–४, ६–० को सोझो सेटमा विजयी भए ।

आर्मीका संरक्षकभूषण वज्राचार्य र पुलिस कमल भण्डारीले दोहोरो जित पाए । संरक्षकले एपीएफका श्रीराम मगरलाई ७–६ (२), ७–६ (५) र पश्चिमाञ्चलका प्रदीप खड्कालाई ६–२, ६–१ ले हराए । कमलले एपीएफका सन्तोष खत्रीलाई ६–१, ६–४ र एपीएफकै श्रीराम मगरलाई ६–०, ७–५ ले हराए । सन्तोषले भने पुलिसका दावालाई ६–३, २–६, ६–३ ले हराए । महिलामा आर्मीकी अभिलाषा विष्टले एपीएफकी विजिशा श्रेष्ठलाई ७–५, ६–३ र एपीएफकी भगवतीलाई ६–१, ६–१ ले हराइन् ।

विजिशा पश्चिमाञ्चलकी गंगा शर्मासँग पनि ६–२, ६–१ ले हारिन् । एपीएफकी एनी माथेमाले भने गंगालाई ७–६ (५), ६–४ ले हराइन् ।

प्रकाशित : मंसिर ५, २०७४ ०८:४८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT