ईपीएल आजबाट सुरु

कान्तिपुर संवाददाता

काठमाडौं — एभरेस्ट प्रिमियर लिग (ईपीएल) को दोस्रो संस्करण सोमबारदेखि राजधानीमा सुरु हुँदैछ । ६ सहरका फ्रेन्चाइज टोलीको सहभागिता रहने प्रतियोगिताको विजयी टोलीले २१ लाख रुपैयाँ प्राप्त गर्नेछ । ठूलो रकमको प्रतियोगिता भए पनि यसपटक विदेशी खेलाडीको सहभागिताले सबैको नजर त्यसतर्फ तानिएको छ ।


विश्वकप क्रिकेटमा फाइनल पुगेको टोलीका सदस्य रहेका फरवेज महारुफदेखि एसोसिएट क्रिकेटमा उत्कृष्ट ब्याट्सम्यानका रूपमा स्थापित गरिसकेका अनुस्मन रथ प्रतियोगितामा सहभागिता जनाउँदै छन् । प्रतियोगिता सुरु हुनुभन्दा तीन दिनअघि मात्र आईसीसीको मान्यता पाएका कारण अझै ठूला नाम ल्याउन सफल नभएको टोली मालिकहरूको दाबी छ । यद्यपि पहिलो संस्करणमै नाम चलेका स्टारहरूको आगमनले प्रतियोगितामा अझै उत्साह थपेको छ । राष्ट्रिय टोलीमा स्थापित नामसँगै युवा खेलाडीहरूको उपस्थितिले क्रिकेट विकासमा पनि टेवा पुग्ने पक्का छ ।
ईपीएलका प्रबन्ध निर्देशक आमिर अख्तरले नेपाली क्रिकेटको विकासमा यस प्रतियोगिताले ठूलो मदत पुग्ने बताए । ‘हामीले यस प्रतियोगिता आयोजना गर्न निकै मिहिनेत गरेका छौं । यसले खेलाडीदेखि दर्शक र टोली मालिक सबैलाई जित–जितको अवस्थामा पुर्‍याएको छ । नेपालमै अन्तर्राष्ट्रियस्तरको खेलको मजा दर्शकले लिनेछन् । खेलाडीले पनि आफ्नो स्तर उकास्ने राम्रो अवसर पाएका छन्,’ उनले भने । प्रतियोगिताको सम्पूर्ण खेल कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा हुनेछ । 
ललितपुर र काठमाडौं भिड्दै
प्रतियोगिताको उद्घाटन खेलमा सोमबार राष्ट्रिय टोलीका उपकप्तान ज्ञानेन्द्र मल्लको नेतृत्वमा रहेको ललितपुर प्याट्रिएट्स र श्रीलंकाली खेलाडी महारुफको कप्तानीमा रहेको काठमाडौं किङ्स ११ भिड्दैछन् । ललितपुरको टोलीमा इन्डियन प्रिमियर लिग (आईपीएल) मा सहभागिता जनाइसकेका योगेश नागरसँगै भारतीय खेलाडी जयकिशन कोस्लावाला र सुबोध भाटी छन् । राष्ट्रिय टोलीका सदस्य सन्दीप लामिछाने र महबुब आलमले ललितपुरको टोलीलाई थप बलियो बनाउनेछन् । टोलीमा यू–१९ टोलीका पवन सर्राफ र रसिद खान पनि छन् । टोलीको प्रशिक्षकमा राजु बस्न्यात छन् । 
यता काठमाडौंमा कप्तान महारुफसँगै अर्का श्रीलंकाली खेलाडी अक्षु फर्नान्डो पनि छन् । मध्यक्रमका ब्याट्सम्यान फर्नान्डोसँगै भारतीय ब्याट्सम्यान सगर कुमारले टोलीलाई थप बलियो बनाएका छन् । टोलीमा मार्की खेलाडीका रूपमा सोमपाल कामी छन् भने राष्ट्रिय टोलीका सागर पुन पनि छन् । सिद्धान्त लोहनी, जितेन्द्र मुखिया र नरेश बुढाऐरको उपस्थितिले टोली मजबुत देखिएको छ । टोलीको प्रशिक्षक मनोज कटुवाल छन् ।


आजको खेल
ललितपुर प्याट्रिएट्सविरुद्ध काठमाडौं किङ्स ११ 
बिहान ११:०० बजे
टीयू मैदान, कीर्तिपुर

Yamaha


आ–आफ्नै दाबी


फरवेज महारुफ
कप्तान, काठमाडौं किङ्स ११
म नेपाल आएको दुई दिन मात्र भए पनि टोलीको प्रशिक्षणमा राम्रो समय बित्यो । प्रशिक्षणमा हेर्दा टोली निकै बलियो पाएको छु । म आफ्नो अनुभवका आधारमा टोलीलाई अझै बलियो बनाउने प्रयास गर्नेछु । युवा टोलीमा निकै जोस पाएको छु । विदेशी खेलाडीको प्रदर्शन पनि राम्रो रहने अपेक्षा राखेको छु । हामी सबैको संयुक्त प्रयासलाई मैदानमा उतारेर सक्दो राम्रो नतिजा ल्याउने लक्ष्य छ ।

ज्ञानेन्द्र मल्ल
कप्तान, ललितपुर प्याट्रिएट्स
राष्ट्रिय टोलीको खेलका कारण तयारी सोचेजस्तो राम्रो हुन सकेन । पाएको समयको सक्दो सदुपयोग गरेर टोलीको प्रशिक्षणलाई अगाडि बढायौं । टोलीको आवश्यकताअनुसार विदेशी खेलाडीलाई समावेश गरेका छौं । उनीहरूले राम्रो प्रदर्शन गर्ने अपेक्षा छ । सबै टोली उत्तिकै बलिया छन् र विदेशी खेलाडीका कारण झनै मजबुत भएका छन् । सबै टोलीको उत्तिकै सम्भावना रहेको छ ।

दीपेन्द्र सिंह ऐरी
मार्की खेलाडी, चितवन टाइगर्स
टोलीको तयारी राम्रो भइरहेको छ । राष्ट्रिय टोलीका खेलाडी नहुँदा पनि दुई साता अगाडिदेखि टोलीले तयारी गरिरहेको थियो । आफ्नो प्रदर्शनलाई बढी ध्यान दियौं भने नतिजा अवश्य राम्रो आउँछ । 
 

शरद भेषावकर
कप्तान, भैरहवा ग्ल्याडियटर्स
अक्सनमा सोचेअनुसार टोली गठन गर्न सकेका थियौं । त्यसैले अहिले प्रशिक्षणमा पनि टोली राम्रो देखिएको छ । अब मैदानमा पनि त्यसैअनुसार उत्कृष्ट प्रदर्शन गर्ने लक्ष्य छ । विदेशी खेलाडीको आगमनले लिगलाई अर्को स्तरमा पुर्‍याएको छ । सबैले केही सिक्ने मौका पाउने आशा गरेको छु । 

पारस खड्का
कप्तान, विराटनगर वारियर्स
टोलीले विगत डेढ सातादेखि राम्रो तयारी गरेको छ । प्रतियोगिताले आईसीसीको मान्यता पाएसँगै सबै खेलाडीले राम्रो प्लेटफर्म पाएका छन् । विशेषत: युवा खेलाडीले आफ्नो प्रतिभा देखाएर अगाडि बढ्ने मौका छ । हामीले प्रतियोगिता जित्ने लक्ष्य राखे पनि त्यसलाई हासिल गर्नु उत्तिकै चुनौतीपूर्ण छ । अन्य टोली पनि बलिया छन् त्यसैले नतिजा अहिले आकलन गर्न सकिन्न ।

शक्ति गौचन
कप्तान, पोखरा राइनोज
भाग्य नै भन्नुपर्छ हाम्रा विदेशी खेलाडी पनि समयमै आइदिए । त्यसले गर्दा हाम्रो नेपाली खेलाडीले उनीहरूसँग अभ्यास गर्न पनि पाए । छोटो समयमै टिमको फर्मेसन गर्न पायौं । प्रतियोगितामा सुरुआत कस्तो हुन्छ र प्रतियोगिता दौरान कस्तो लय समात्छौं त्यसमा टिमको प्रदर्शन भर पर्छ । पोखराको टिम भएर पोखरामै हाम्रो अभ्यास भयो । विकेट त्यस्तो स्तरीय नभए पनि हाम्रो अभ्यास राम्रो भएको छ ।

प्रकाशित : पुस ३, २०७४ ०९:०१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

भारतलाई लगातार आठौं सिरिज

एएफपी

विशाखापट्टनम — प्रारम्भिक ब्याट्सम्यान शिखर धवनले आकर्षक रूपमा शतक बनाएपछि श्रीलंकाविरुद्ध वान–डे इन्टरनेसनल सिरिजको निर्णायक खेलमा आइतबार भारतले आठ विकेटको जित हात पारेको छ । यससँगै उसले सिरिज पनि कब्जा गर्‍यो ।

प्रारम्भिक ब्याट्सम्यान शिखर धवनले आकर्षक रूपमा शतक बनाएपछि श्रीलंकाविरुद्ध वान–डे इन्टरनेसनल सिरिजको निर्णायक खेलमा आइतबार भारतले आठ विकेटको जित हात पारेको छ । यससँगै उसले सिरिज पनिकब्जा गर्‍यो ।
दुई सय १६ रनको विजयी लक्ष्य पाएको भारतलाई धवन (नटआउट १ सय रन) र श्रेयस ऐर (६५) ले विशाखापट्टनममा ३२.१ ओभरमा १ सय ३५ रनको साझेदारी गर्दै बलियो अवस्थामा पुर्‍याएका थिए । धवनले ८५ बलमा वान–डेमा आफ्नो १२ औं शतक पूरा गरे । उनले १३ चौका र दुई छक्का प्रहार गरे । सन् २००६ जुन महिनायता भारतले लगातार आठौं वान–डे इन्टरनेसनल सिरिज जितेको हो ।
यसअघि कुलदीप यादव र युवेन्द्र चाहलले तीन–तीन विकेट विकेट लिएपछि श्रीलंका ४४.५ ओभरमा २ सय १५ रनमा सीमित भएको थियो । ‘उनीहरूले एकसाथ राम्रो बलिङ पनि गरेनन् तर जसरी खेले वास्तवमै राम्रो खेले । उनीहरूले हामीलाई अगाडि बनाए,’ आफ्ना स्पिनरबारे भारतका कप्तान रोहित शर्माले भने, ‘युवा स्टारले धेरै ऊर्जा दिए । यो समूह प्रतिवान छ र यो नै त्यसलाई अभ्यास गर्ने सही समय हो ।’
अष्ट्रेलिया सिरिज जित नजिक
पर्थ– अष्ट्रेलिया आइतबार इंग्ल्यान्डविरुद्ध एसेज तेस्रो टेस्टमा जितको नजिक पुगेको छ । अष्ट्रेलियाले आफ्नो पहिलो इनिङ्स नौ विकेट गुमाएर ६ सय ६२ रनमा टुंग्याएपछि इंग्ल्यान्ड २ सय ५९ रनले पछाडि परेको थियो । त्यसयता इंग्ल्यान्डले आफ्नो दोस्रो इनिङ्स सुरु गर्दै चार विकेट गुमाएर १ सय ३२ रनको स्थितिमा छ । वर्षाका कारण खेल निर्धारित समयभन्दा अगाडि नै टुंगेको थियो । इंग्ल्यान्डका लागि डेविड मिलान २८ रजोनी बियरस्ट १४ रन बनाएर खेलिरहेका छन् ।
इंग्ल्यान्ड अझै १ सय २७ रनले पछाडि छ । पाँच टेस्टको सिरिजमा अस्ट्ेरलियालाई २–० को अग्रता प्राप्त छ । वाका मैदानमा भइरहेको अन्तिम एसेज टेस्टमा इंग्ल्यान्डलाई हारबाट जोगिन गाह्रो हुनेछ । तर उसको सहयोगमा वर्षाले भने महत्त्वपूर्ण भूमिका खेल्न सक्नेछ । सिरिजमा कायम रहन इंग्ल्यान्डलाई वर्षाले साथ दिन सक्नेछ । अन्तिम दिन भारी वर्षाको अनुमान गरिएको छ । तर यो लन्च सेसन अगाडि मात्र समस्याका रूपमा रहने अनुमान गरिएको छ । पाहुना टिमको दोस्रो इनिङ्स खराव सुरुआतको सिकार बनेको थियो ।

प्रकाशित : पुस ३, २०७४ ०९:०१
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT