नेपाल अपराजित च्याम्पियन

ट्रफी लिंदै नेपाली टिमका कप्तान र उपकप्तान । तस्बिर : सीएटी

नेपालले तीन वर्षअघि मलेसियामा एसीसी यू–१६ प्रिमियरको नामले आयोजित पछिल्लो प्रतियोगिता पनि जितेको थियो । लामो समय देखिको विवाद र त्यसपछि निलम्बनमा रहेको नेपाल क्रिकेट संघको सदस्यता पनि अन्तर्राष्ट्रिय क्रिकेट परिषद् (आईसीसी) ले खारेज गर्ने स्थितिमा पुगेको अवस्थामा नेपाली क्रिकेटले असोजमा एसीसी यू–१९ इस्टर्न रिजन प्रतियोगिता पनि जितेको थियो । त्यसपछि भारतलाई पराजित गर्दै एसीसी यू–१९ एसिया कपको सेमिफाइनल पुगेको थियो ।
नेपालको सुरुआत राम्रो रहेन । ओपनरद्वय कुशल मल्ल र राजन मगर क्रमश: शून्य र ३ रनमा आउट भए । सुवास ऐर २२ र तृतराज दास १९ रनमा आउट हुँदा नेपाल १६ ओभरमा ६६–४ को स्थितिमा पुगेको थियो । रीतको स्थानमा नेपालको कप्तानी गरिरहेका विशालले अर्धशतक बनाउँदै नेपाली इनिङ्स उकासेका थिए ।
उनले सुनील भण्डारी (१५) सँग पाँचौं विकेटमा ४२ रन जोडे । म्यान अफ द म्याच विशालले ७९ बल खेली ४ चौका र १ छक्का प्रहार गरी ६३ रन बनाए । नारायणले २३ बलमा नटआउट ४६ रन जोडेपछि नेपालले अन्तिम ८ ओभरमा ७५ रन जोडेको थियो । उनले ५ चौका र १ छक्का प्रहार गरे । प्रतिश जीसी ६ बलमा १० रन बनाई नटआउट रहे । सिंगापुरका इशान सावनीले २ विकेट लिए ।
साइहर्ष विनुगोपालले ३१ रन बनाए पनि सिंगापुरले नेपाललाई चुनौती दिन सकेन । अर्नाभ वाधवा २१, राउल शर्मा १५ र इशान १२ रनमा आउट भए । नेपालका सूर्य तामाङ र अजयकुमार लुनियाले ३–३ विकेट लिए । सूर्यले ७ ओभरमा १ मेडन राख्दै २० र अजयले ५ ओभरमा १६ रन खर्चे । नारायण र कुशलले १–१ विकेट लिए ।
नेपालका तृतराज दास उत्कृष्ट ब्याट्सम्यानमा चुनिए । उनले प्रतियोगितामा १ सय ६२ रन बनाएका थिए ।

प्रकाशित : पुस ३, २०७४ ०९:०१