आर्मी फाइनलमा

खप्तड गोल्डकप फुटबल
विनोद पाण्डे, डीआर पन्त

काठमाडौँ — त्रिभुवन आर्मी क्लब शनिबार मनाङमाथि ३–१ को जित निकाल्दै मोफसलको सर्वाधिक पुरस्कार राशि रहेको नेपाल आइस सुदूरपश्चिम खप्तड गोल्डकप फुटबलको फाइनल पुगेको छ । डिफेन्डिङ च्याम्पियन लक्ष्मी हुन्डाई मनाङ मस्र्याङ्दी क्लब सेमिफाइनलबाटै बाहिरिएको हो ।

आर्मीका भरत खवास (२१) को गोल बचाउने असफल प्रयासमा मनाङका गोलरक्षक दिनेश थापामगर ।


यस सिजनमा वीरगन्जको विशाल मेमोरियल तथा झापामा सताक्षी गोल्डकप र काँकडभिटा गोल्ड कप जितिसकेको आर्मीले सोमबार हुने फाइनलमा एपीएफ क्लब र आयोजकको सुदूरपश्चिम ११ बीचको विजेतासँग खेल्नेछ । दोस्रो सेमिफाइनल आइतबार हुनेछ ।
यसअघि क्वाटरफाइनलमा रुस्लान थ्री स्टार क्लबलाई २–१ ले हराएको आर्मीले निरन्तर खेल्नुपरेको मनाङलाई पन्छाउन पनि केही मेहनत गर्नुपरेको थियो । मनाङले २४ घण्टाअगाडि मात्र रूपन्देही ११ लाई ४–० ले पराजित गरेको थियो ।
मनाङका प्रशिक्षक छिरिङ लोप्साङले २४ घण्टा नबित्दै अर्को खेल खेल्नुपरेकाले स्वाभाविक खेल्न नसकेको जनाए । ‘यति लामो यात्रा गरेर यहाँ खेल्न आएका हौं, तर आयोजकले खेलतालिका मिलाउन सकेन,’ उनले भने, ‘लगातार दुई दिन खेल्न गाह्रो हुन्छ । त्यसमाथि आर्मीजस्तो फिजिकल्ली र स्पिड टिमसँग खेल्नुपरेको छ । हाम्रा खेलाडीमा लगातार दुई दिन खेल्ने शक्ति खासै मैले देखेको छैन ।’
आयोजक सुदूरपश्चिमले पुस २१ मा च्यासल युवा क्लबसँग खेलेको थियो । टोलीले त्यसपछि आइतबार एकैपल्ट सेमिफाइनल खेल्न लागेको हो । आर्मीका प्रशिक्षक नवीन न्यौपाने पनि यसमा सहमत थिए । ‘मनाङ अघिल्लो दिनमात्र खेलेकाले हामीलाई त्यसको फाइदा थियो । त्यही भएर हामीले उनीहरूलाई दबाब दिएर खेल्ने रणनीति बनाएका थियौं,’ मनाङका पूर्व खेलाडी न्यौपानेले भने, ‘एक गोलले पछाडि पर्दा निश्चय पनि केही दबाब भयो । तर, हामी तुरुन्तै खेलमा फर्कन सक्यौं । बराबरीमा आएपछि हामीलाई खेल्न सजिलो भयो ।’
धनगढी रंगशालामा मनाङले नवौं मिनेटमा हेमन गुरुङको गोलमा अग्रता लियो । विमल रानाको क्रसमा हेमनले गरेको प्रहार डिफ्लेक्ट हुँदै गोल भयो । यसअघि तेस्रो मिनेटमा कप्तान अनिल गुरुङले फ्री हेड तथा सुवास गुरुङले सातौं मिनेटमा खुला अवसर सदुपयोग गर्न नसक्दा मनाङ चुक्चुकाइसकेको थियो । आर्मीले २३ औं मिनेटमै खेल बराबरीमा ल्यायो । कर्नरमा आएको बल हुलमुलबीच कप्तान भरत खवासले गोल गरी आर्मीलाई बराबरीमा ल्याए । यसको आठ मिनेटअघि नै भरतले मनाङका गोलरक्षक दिनेश थापामगरलाई बिट गरे पनि गोल गर्न सकेका थिएनन् । जबकि त्यो समयमा अर्का स्ट्राइकर नवयुग श्रेष्ठ गोल गर्नलाई सजिलो स्थानमा थिए ।
मनाङका रक्षक कमल श्रेष्ठ अघिल्लो खेलमा घाइते भएकाले रक्षापंक्तिमा टोली दबिएर खेल्नुपरेको थियो । कमलको स्थानमा मनाङले मिडफिल्डर भिक्टोरलाई रक्षापंक्तिमा खेलायो । यसको फाइदा उठाउँदै मध्यान्तरको ठीकअघि दिनेश हेन्जनको क्रसमा म्यान अफ द म्याच नवयुगले आर्मीलाई अग्रता दिलाए ।
मध्यान्तरपछि मनाङ आक्रामक खेल्न खोजे पनि आर्मीले रक्षात्मक हिसाबमा खेलेको थियो । मनाङका विशाल राईले दोस्रो हाफमा एउटा अवसर गुमाउन पुगे । काउन्टर अटयाकमा बेला बेलामा आर्मीले विपक्षी पोस्टमा आक्रामण गरेको थियो । ८८ औं मिनेटमा भरतले आफ्नो मध्यभागबाट काउन्टरमा अगाडि बढाएको बलमा नवयुगको प्रहार मनाङका गोलरक्षक दिनेशले फर्काए पनि रिबाउन्डमा सन्तोष तामाङले गोल गरी आर्मीको विजय निश्चित गरे ।
प्रतियोगिता विजेताले ११ लाख ११ हजार १ सय ११ रुपैयाँ नगद जित्नेछ । घरेलु नकआउट प्रतियोगितामा मोफसलमा दिन लागिएको यो सर्वाधिक धनराशि हो । उपविजेताको भागमा ५ लाख ५५हजार पर्नेछ ।

दीपक सम्मानित
दक्षिण एसियाली खेलकुदमा नेपालबाट सर्वाधिक ४ स्वर्ण पदक जितेका दीपक विष्ट शनिबार गृहनगरमा सम्मानित भए । उनलाई नेपाल आइस दोस्रो सुदूरपश्चिम खप्तड गोल्डकप फुटबलको आयोजकका अध्यक्ष सुरेश हमाल र अखिल नेपाल फुटबल संघका केन्द्रीय सदस्य गणेश चन्दले ताम्रपत्रसहित सम्मान गरे । उनलाई ८ केजीको फुलको माला लगाइदिइएको थियो । दीपकले गृहनगरको सम्मानले आफ्ना लागि छुट्टै अर्थ राख्ने गरेको बताए । तेक्वान्दो खेलाडी विष्टले सन् १९९९ देखि २०१० सम्म गरी दक्षिण एसियाली खेलकुदमा लगातार ४ स्वर्ण जितेका थिए । ओलम्पियन उनले २००२ र २००६ को एसियाली खेलकुदमा कांस्य पनि जितेका थिए ।

प्रकाशित : पुस ३०, २०७४ ०६:४७
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

प्रतिनिधिमा लिग नै नखेलेको क्लब

एन्फा निर्वाचन
भूषण यादव

वीरगन्ज — बारा जिल्ला फुटबल संघको शनिबार सम्पन्न निर्वाचनमा लिग नै नखलेको क्लबलाई सहभागी गराइएको छ । निर्वाचनमा सहभागी भएका ११ क्लबमध्ये शिव शक्तिमान युवा क्लबले लिग नै नखलेको र अस्तित्वमा समेत नरहेको जिल्लाका खेलपदाधिकारीले आरोप लगाएका छन् । 

शक्तिमान क्लबको ठाउँमा शिव शक्तिमान युवा क्लब राखेर फर्जी प्रतिनिधि बनाइएको ती पदाधिकारीले बताए । शक्तिमानले ०७० र ०७३ मा सम्पन्न जिल्ला लिगमा सहभागिता जनाएको भए पनि शनिबार निर्वाचनमा उक्त क्लबलाई प्रतिनिधित्व गराइएन । शक्तिमानले श्याम चौधरी, चन्द्रिका चौधरी र मनोज चौधरीलाई मताधिकारसहित प्रतिनिधि बनाई पठाएको थियो । तर, उनीहरूलाई सहभागी नगराई शिव शक्तिमानको नाम राखी महम्मद शकिल, विजय चौधरी र सोमराज चौधरीको नाम समावेश गरी अधिवेशन गरिएको छ ।
एन्फाले जिल्ला अधिवेशनलाई जारी गरेको निर्देशिका ०७४ अनुसार जिल्ला संघहरूको साधारणसभा तथा कार्यसमिति निर्वाचनका लागि यसअघि ०७० सालको अधिवेशनमा भाग लिई जिल्ला फुटबल संघले आयोजना गरेको कम्तीमा दुईटा जिल्ला लिगमा भाग लिएको क्लबमात्र सहभागी हुन योग्य मानिन्छ । ‘०७० को अधिवेशनमा भाग नलिएको तर जिल्ला फुटबल संघले सञ्चालन गरेको कुनै एक जिल्ला लिगमा विजय भई कम्तीमा दुई जिल्ला लिग फुटबल प्रतियोगितामा सहभागिता जनाएको क्लबले ०७४ को जिल्ला अधिवेशनमा सहभागिता जनाउन पाउने छन्,’ निर्देशिकामा उल्लेख छ । ‘शिव शक्तिमान भन्ने क्लब नै छैन,’ बारा जिल्ला फुटबल संघका पूर्व महासचिव शम्भुसिंह ठकुरी भन्छन्, ‘न त त्यस क्बलले लिग ने खेलेको छ ।’
त्यस्तै संघर्ष युवा क्लबलाई जानकारी नै नदिई अन्य व्यक्तिलाई मताधिकार प्रयोग गर्न दिइएको थियो । कलैयाका जवाहिर अन्सारीलाई फर्जी प्रतिनिधि बनाएर अधिवेशनमा सहभागी गराइएको छ । पूर्व महासचिव ठकुरी यसपालि अध्यक्षका दाबेदार थिए । तर, उनलाई कारबाही गरिएको भन्दै अधिवेशनमा सहभागी गराइएन ।
एन्फा केन्द्रीय सदस्य मोहम्मद समिउल्लाहले जिल्ला अध्यक्ष पद कब्जा गर्न आफूअनुकूल प्रतिनिधि छनोट गरेको आरोप छ । लिग नखेलेका र अस्तित्वमै नरहेका क्लबलाई सहभागी गराई उनी अधिवेशनबाट यसपालि पनि सर्वसम्मत अध्यक्ष भएका छन् । उनी यसअघि पनि अध्यक्ष थिए । १३ सदस्यीय समिति चयन भएको हो ।
एन्फाको केन्द्रीय समिति कब्जा गर्न जिल्लाबाटै आफ्नो प्यानल जिताउन केन्द्रीय पदाधिकारीहरू लागिपरेका छन् । गैरफुटबलरह फुटबलको विकासमा बाधक भइरहेको गुनासो बढ्दो छ । निर्देशिकाभित्र पर्ने तर आफ्ना विपक्षमा रहेका क्लबलाई अधिवेशनमा आमन्त्रण समेत गरिएको छैन । समिउल्लाहले जिल्ला अधिवेशनमा सहभागी हुन आएका २० क्लबको नाममा केन्द्रमा पठाएको बताए । ‘केन्द्रले नै ११क्लबलाई निर्वाचनमा सहभागी हुने निर्णय गरेको हो,’ उनले भने, ‘जुन पनि क्लबले जसलाई पनि प्रतिनिधि तोकेर पठाउन सक्छ ।’
गत शनिबार नै जिल्ला अधिवेशन गर्ने भनिए पनि विवादका कारण स्थगित भएको थियो ।
ताप्लेजुङमा साँवा
ताप्लेजुङ– जिल्ला फुटबल संघ ताप्लेजुङको अध्यक्षमा बालकुमार साँवा निर्वाचित भएका छन् । शनिबार भएको निर्वाचनमा साँवाले ७ मत ल्याएर विजयी भए । उनका प्रतिस्पर्धी मोती पतङाले ४ मत पाए । उपाध्यक्षमा हाङनारायण लिम्बूले १०, नरेन्द्र लिम्बूले ९ र चन्द्र थेवेले ७ मत ल्याएर विजयी भए । कार्यसमिति सदस्यमा सुधीर लिम्बू, विजय लिम्बू, अम्बिका लिम्बू, शैलेन्द्र गुरुङ, सुरेन्द्र निरौला, दिनेश खवास, कमल लिम्बू र विन्दुप्रसाद तामाङ विजयी भएको निर्वाचन अधिकृत बलराम भट्टराईले जानकारी गराए । अधिवेशनमा ११ क्लबको सहभागिता थियो ।

प्रकाशित : पुस ३०, २०७४ ०६:४५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT