चेल्सीको चार गोल

चेल्सीले सुरुको ६ मिनेटमा दुई गोल गर्दै ब्राइटनको मैदानमा हाबी भएको थियो । इडेन हाजार्डले तेस्रो मिनेटमा चेल्सीको खाता खोले । त्यसको तीन मिनेटपछि विलियनले १८ यार्ड टाढाबाट गोल गरेपछि घरेलु टोलीका लागि खेलमा फर्किनु कठिन बनेको थियो । त्यस बावजुद ब्राइटनले सुन्दर खेल देखाएको थियो ।

चेल्सीका गोरक्षक विली काबालेरोले रक्षक इजेक्विल सेलोटोलाई लडाए पनि रेफ्रीले पेनाल्टी दिएनन् । इजरायली टोमर हेमेदको प्रहारलाई काबालेरोले उत्कृष्ट बचाउ गरे ।

नियमित कप्तान ग्यारी केहिल, नियमित गोलरक्षक थिबाउट कुर्टिस र सेस फाब्रिगासबिनै चेल्सी मैदान उत्रिएको थियो । अझ प्रमुख स्ट्राइकर अल्भारो मोराटा र पेड्रो निलम्बनमा रहेको अवस्थामा चेल्सीले दोस्रो हाफमा पनि गोलको क्रमलाई निरन्तरता दियो ।

हाजार्डले ७७ र भिक्टोर मोसेसले ८९ औं मिनेटमा चेल्सीबाट थप दुई गोल गरे । ब्राइटनले पछिल्ला १३ खेलमा एकमात्र जित हात पारेको छ ।