आर्मीले जित्यो सिमरा गोल्डकप

लक्ष्मी साह

बारा — त्रिभुवन आर्मी क्लबले रुस्लान नवौं सिमरा गोल्डकप फुटबलको उपाधि उचालेको छ । सिमरा रंगशालामा शनिबार फाइनल थ्रीस्टार क्लबलाई २–० ले पराजित गर्दै आर्मीले दोस्रोपल्ट सिमरा गोल्डकप जितेको हो । २०७१ सालमा छैंटौं संस्करण च्याम्पियन आर्मीले ५ लाख रुपैयाँ पुरस्कार जितेको छ । 

नवौं रुस्लान सिमरा गोल्डकप च्याम्पियन त्रिभुवन आर्मी क्लब । शनिबार फाइनलमा आर्मीले थ्रीस्टार क्लबलाई २–० ले पराजित गरेको थियो । तस्बिर : लक्ष्मी/कान्तिपुर


उपविजेता थ्रीस्टारले २ लाख ५० हजार रुपैयाँमा चित्त बुझाएको छ । आर्मीलाई उपाधि दिलाउने क्रममा दिनेश हेम्जन र नवयुग श्रेष्ठले गोल गरे । खेलको ५८ औं मिनेटमा दिनेशले आर्मीलाई अग्रता दिलाएका थिए । त्यसमा ७४ औं मिनेटमा नवयुगले गोल थपेका थिए । म्यान अफ द म्याच त्रिभुवन आर्मीका सन्तोष तामाङ घोषित भए ।

Yamaha


विजेतालाई अखिल नेपाल फुटबल संघ (एन्फा) का अध्यक्ष नरेन्द्र श्रेष्ठ, बाराका प्रमुख जिल्ला अधिकारी विजयनारायण मानन्धर, आयोजक क्लबका अध्यक्ष कसिम मियाँलगायतले पुरस्कृत गरे ।
प्रधानसेनापति राजेन्द्र क्षेत्रीसमेत त्रिभुवन आर्मीको खेल हेर्न सिमरा रंगशालामा आइपुगेका थिए । राजधानीबाट सेनाका उच्च अधिकारीसहित आफ्नो टोलीको खेल हेर्न आइपुगेका क्षेत्री पूरै समय खेल हेरेर शनिबारै राजधानी फर्किए ।


विधागत पुरस्कार
सर्वोत्कृष्ट खेलाडी दिनेश हेम्जन (आर्मी)
सर्वाधिक गोलकर्ता दिनेश हेम्जन (३ गोल )
उत्कृष्ट गोलरक्षक विकेश कुथु (आर्मी)
उत्कृष्ट डिफेन्डर विमल पाण्डे (आर्मी)
उत्कृष्ट फरवार्ड जर्ज प्रिन्स कार्की (आर्मी)
उत्कृष्ट मिडफिल्डर नीराजन खड्का (थ्रीस्टार)
फेयर प्ले टिम आयोजक नव जनजागृति क्लब ‘नीलो’

Esewa Pasal

प्रकाशित : फाल्गुन ६, २०७४ ०७:१२
ADVERTISEMENT
प्रतिक्रिया
पठाउनुहोस्
ADVERTISEMENT

तीर्थ र कान्छीमायालाई उपाधि

प्रदीप मेन्याङबो

धरान — नेपाल आइस धरान रनअन्तर्गत छैटौं नेवा च्यारिटी रनको पुरुषतर्फ तीर्थ पुन र महिलातर्फ एपिएफकी कान्छीमाया कोजु च्याम्पियन भएका छन् । धरानमा भारतीय सेनामा कार्यरत बाग्लुङका तीर्थले ह्याट्रिक उपाधि जितेका छन् । कान्छीमाया पहिलोपल्ट धरान रनमा स्पर्धा गरेकी हुन् । 

धरान रनमा महिलातर्फ शीर्ष तीन स्थानमा विजयी कान्छीमाया कोजु, सन्तोषी श्रेष्ठ र फुलमती रानाका साथ प्रशिक्षक रघुराज वन्त ।


८ किलोमिटर दूरी तीर्थले २६ मिनेट ४६ सेकेन्डमा पूरा गरेका थिए । आर्मीका हरि रिमाल २७ मिनेट १२ सेकेन्ड र टीकाराम कटुवालले २७ मिनेट १३ सेकेन्डबाट दोस्रा र तेस्रा भए ।

महिलामा धादिङकी सन्तोषी श्रेष्ठले ३२ मिनेट ३ सेकेन्डबाट दोस्रो भइन् । एपीएफकी फुलमती राना ३२ मिनेट ४६ सेकेन्डबाट तेस्रो भए । दुवैतर्फ विजेताले ४० हजार, उपपिवजेताले ३० हजार र तेस्रोले २० हजार रुपैयाँ पुरस्कार पाए ।

यू–१६ मा ब्वाइजतर्फ प्रकाश कठायत, समिर महरा र नारायण सुब्बा तथा गल्र्सतर्फ सिर्जना राई, अमृता भण्डारी र बन्दना बुढा शीर्ष तीन स्थानमा विजयी भए । उनीहरूले ७ हजार, ५ हजार र ३ हजार रुपैयाँ पुरस्कार पाए । १२ वर्षमुनि ब्वाइजमा जुम्लाका विकास बुढा, बरदान राई र दीपेश राई तथा गल्र्समा अनुजा प्रधान, विपासा राई र समीक्षा राई शीर्ष तीन स्थानमा विजयी हुँदै क्रमश: ७ हजार, ५ हजार र ३ हजार पुरस्कार जित्न सफल भए ।

४० वर्षमाथि भेट्रानको पुरुषतर्फ निर्मल राई, मोहन सुब्बा र राम तामाङ तथा महिलामा रीता राई, गंगा गुरुङ र धनमाया योङहाङ क्रमश: पहिलो, दोस्रो र तेस्रो भए । उनीहरूले ७, ५ र ३ हजार पुरस्कार पाए ।
सुपर भेट्रानमा ६९ वर्षीय धरानकै मनमोहन पालिखे विजेता भए । धरान रनमा ५३ सार पूरा गरेकी सिवानी देव र ५२ साता पूरा गरेका सुप्रभात राईलाई रनर अफ द इयरबाट पुरस्कृत गरियो । तीनपल्ट एभरेस्ट म्याराथनमा स्वर्ण जितेका जुम्लाका पूर्व धावक हरि रोकायलाई सम्मानित गरियो । विजेतालाई पूर्व धावक रोकाय, एथलेटिक्स एसोसिएसनका पूर्व अध्यक्ष रघुराज कोन्त, धरान रनका संस्थापक अध्यक्ष सन्तोष राई, धरान रन समूहका अध्यक्ष रोमु राई लगायतले पुरस्कृत गरे ।

धरान रनमा २ हजार ५ सय धावकधाविकाले प्रतिस्पर्धा गरेका थिए । धरान रनबाट संकलित रकमले १५ विद्यार्थीलाई छात्रवृत्ति दिने लक्ष्य लिएको धरान रनका अध्यक्ष रोमु राईले बताए । यसअघि धरान रनबाट संकलित ४ लाख रुपैयाँको अक्षयकोष स्थापना गरेको छ । दृष्टि नेपालले बनाउँदै गरेको ह्याप्पी होमका लागि १ लाख ७७ हजार रुपैयाँ प्रदान गरेको छ ।

धरान पोजेटिभ समूहका संक्रमित बालबालिकाको शिक्षाका लागि १ लाख ५० हजार रुपैया प्रदान गरेको छ । क्यान्सर पीडितलाई २ लाख रुपैया, शिक्षाका लागि अक्षयकोष खडा २ लाख ५० हजार रुपैयाँ स्थापना गरेको छ । यसपल्ट बाँकी रकम नेवा च्यारिटी स्वास्थ्य कोष बनाउने तयारीसाथ महिला तथा बालबालिकालक्षित गर्दै कोष स्थापना गर्ने संस्थापक अध्यक्ष सन्तोष राईले बताए ।

प्रकाशित : फाल्गुन ६, २०७४ ०७:११
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT