आर्मीले जित्यो सिमरा गोल्डकप

लक्ष्मी साह

बारा — त्रिभुवन आर्मी क्लबले रुस्लान नवौं सिमरा गोल्डकप फुटबलको उपाधि उचालेको छ । सिमरा रंगशालामा शनिबार फाइनल थ्रीस्टार क्लबलाई २–० ले पराजित गर्दै आर्मीले दोस्रोपल्ट सिमरा गोल्डकप जितेको हो । २०७१ सालमा छैंटौं संस्करण च्याम्पियन आर्मीले ५ लाख रुपैयाँ पुरस्कार जितेको छ । 

नवौं रुस्लान सिमरा गोल्डकप च्याम्पियन त्रिभुवन आर्मी क्लब । शनिबार फाइनलमा आर्मीले थ्रीस्टार क्लबलाई २–० ले पराजित गरेको थियो । तस्बिर : लक्ष्मी/कान्तिपुर


उपविजेता थ्रीस्टारले २ लाख ५० हजार रुपैयाँमा चित्त बुझाएको छ । आर्मीलाई उपाधि दिलाउने क्रममा दिनेश हेम्जन र नवयुग श्रेष्ठले गोल गरे । खेलको ५८ औं मिनेटमा दिनेशले आर्मीलाई अग्रता दिलाएका थिए । त्यसमा ७४ औं मिनेटमा नवयुगले गोल थपेका थिए । म्यान अफ द म्याच त्रिभुवन आर्मीका सन्तोष तामाङ घोषित भए ।

Yamaha


विजेतालाई अखिल नेपाल फुटबल संघ (एन्फा) का अध्यक्ष नरेन्द्र श्रेष्ठ, बाराका प्रमुख जिल्ला अधिकारी विजयनारायण मानन्धर, आयोजक क्लबका अध्यक्ष कसिम मियाँलगायतले पुरस्कृत गरे ।
प्रधानसेनापति राजेन्द्र क्षेत्रीसमेत त्रिभुवन आर्मीको खेल हेर्न सिमरा रंगशालामा आइपुगेका थिए । राजधानीबाट सेनाका उच्च अधिकारीसहित आफ्नो टोलीको खेल हेर्न आइपुगेका क्षेत्री पूरै समय खेल हेरेर शनिबारै राजधानी फर्किए ।


विधागत पुरस्कार
सर्वोत्कृष्ट खेलाडी दिनेश हेम्जन (आर्मी)
सर्वाधिक गोलकर्ता दिनेश हेम्जन (३ गोल )
उत्कृष्ट गोलरक्षक विकेश कुथु (आर्मी)
उत्कृष्ट डिफेन्डर विमल पाण्डे (आर्मी)
उत्कृष्ट फरवार्ड जर्ज प्रिन्स कार्की (आर्मी)
उत्कृष्ट मिडफिल्डर नीराजन खड्का (थ्रीस्टार)
फेयर प्ले टिम आयोजक नव जनजागृति क्लब ‘नीलो’

Esewa Pasal

प्रकाशित : फाल्गुन ६, २०७४ ०७:१२
ADVERTISEMENT
प्रतिक्रिया
पठाउनुहोस्
ADVERTISEMENT

एपीएफ सेमिफाइनलमा

लक्ष्मी साह

काठमाडौँ — घरेलु मैदानमा नव जनजागृति युवा क्लब सिमरालाई २–० ले हराउँदै सशस्त्र प्रहरीको एपीएफ क्लब शुक्रबार रुस्लान नवौं सिमरा गोल्डकप फुटबलको क्वाटरफाइनल पुगेको छ। 

आयोजक नव जनजागृतिविरुद्ध बल अगाडि बढाउँदै एपीएफका खेलाडी ।

एपीएफले क्वाटरफाइनलमा त्रिभुवन आर्मी क्लबसँगको भेट पक्का गरेको छ। एपीएफको जितमा रवि थिङ र रञ्जन विष्टले गोल गरेका थिए। युवराज खड्कालाई ६२ औं मिनेटमा स्थानान्तरण गरेका रविले गोल गर्दै टोलीलाई अग्रता दिलाए। खेलको ७२ औं मिनटमा नवीन लामाको क्रसमा रविले दर्शनीय गोल गरेका थिए।

अन्तिम इन्ज्युरी समयमा रञ्जनले अर्को गोल थप्दै एपिएफलाई २–० को जित दिलाए। वान भर्सेज वानको स्थिति सदुपयोग गर्दै रञ्जनले गोल गरे। स्थानीय खेलाडी सहभागी नव जनजागृतिले पहिलो हाफमा एपीएफलाई कडा टक्कर दिए पनि नव जनजागृतिले गोल अवसर सिर्जना गर्न सकेन। एपीएफले पनि पाएका अवसर सदुपयोग गर्न नसक्दा अन्तिमसम्म संघर्ष गर्नुपरेको थियो।

खेलको सातौं मिनटमा एपीएफका अञ्जन विष्टको पासमा रञ्जन विष्टले पेनाल्टी क्षेत्रबाट गरेको प्रहार जनजागृतिका गोलरक्षक दिलमणि चौधरीले विफल पारे। १२ औं मिनटमा युवराज खड्काको प्रहार क्रसबार माथिबाट गयो। एपीएफका रुपबहादुर लामाको पासमा युवराजले बक्सभित्रै पाएको अवसर सदुपयोग गर्न सकेनन्।

खेलको १७ औं मिनटमा एपीएफका रञ्जनले अर्को अवसर गुमाए। नवीन लामाको क्रसमा बक्सभित्रैबाट रञ्जनले गरेको शसक्त प्रहार पोस्ट नजिकबाट बाहिरियो। खेलको ४६ औं मिनटमा अञ्जनले पेनाल्टी अवसर गुमाए। जनजागृतिका डिफेन्डर लोकेन्द्रबहादुर कार्कीले अञ्जनलाई पेनाल्टी बक्सभित्र फाउल गरेपछि एपीएफले पेनाल्टी हान्ने अवसर पायो। त्यसमा अञ्जन गोल गर्न चुके। उनको पेनाल्टी प्रहार पोस्ट नजिकबाट बाहिरियो।

नव जनजागृतिले पनि केही अवसर गुमायो। खेलको तेस्रो मिनटमा विवेक चौधरीले पेनाल्टी एरियामा पाएको अवसर खेर फाले। चतुर्धन चौधरीको पासमा विवेकले पेनाल्टी एरियामा पाएको अवसर सदुपयोग गर्न सकेनन्। ३१ औं मिनटमा विवेक चौधरीको क्रसमा पेनाल्टी एरियामा पाएको अर्को अवसर सागर चौधरीले खेर फाले।

वान भर्सेज वानको स्थितिमा विवेकको क्रस बल सागरले सम्हाल्न नसक्दा एपीएफका गोलरक्षक राजु नगरकोटीले बचाउ गरे। ८९ औं मिनेटमा जनजागृतिका विशान्त तामाङले बराबरी गोल गर्ने मौका गुमाएका थिए। सुनील राउतको पासमा पेनाल्टी बक्सभित्रैबाट विशान्तले गरेको प्रहार एपीएफका गोलरक्षकले बचाए। म्यान अफ द म्याच एपीएफका रञ्जन विष्ट घोषित भए। शनिबार आयोजक ‘सेतो’ र मोरङबीच प्रतिस्पर्धा हुनेछ।

प्रकाशित : माघ २७, २०७४ ०७:२६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT