आर्मी र जेभियर विजयी

कान्तिपुर संवाददाता

काठमाडौँ — आर्मी ‘ए’ र जेभियरले प्रथम मनमोहन स्मृति खुला बास्केटबलमा सोमबार जित पाएका छन् । आर्मीले बलर्जलाई ७४–५१ स्कोरले हरायो । आर्मीका सदीश प्रधानले २४ स्कोर जोडे ।

प्रथम मनमोहन स्मृति खुला बास्केटबलमा स्कोर प्रयासमा अगाडि बढेका जेभियरका निकेश मगरलाई रोक्दै आर्मी ‘बी’ (हरियो) का खेलाडी ।

पहिलो क्वाटरमा २६–१४ को अग्रता लिएको आर्मी दोस्रोमा १६–१८ ले पछि पर्‍यो । तेस्रो र चौथो क्वाटरमा अगाडि रहेको आर्मी ‘ए’ ले क्रमश: १६–६ र १६–१३ स्कोर जोड्यो ।

जेभियरले आर्मी ‘बी’ लाई ७४–७२ को साँघुरो अन्तरले पराजित गर्दा निकेश मगरले २३ स्कोर गरेका थिए । सुरुको क्वाटरमा १५–२२ ले पछि परेको जेभियरले दोस्रो र तेस्रो क्वाटरमा अग्रता बनाउँदै जित निकाल्यो । जेभियरले दोस्रोमा २२–१७ र तेस्रोमा २३–१३ स्कोर बनायो । चौथो क्वाटर आर्मीले २०–१४ ले आफ्नो पक्षमा पारे पनि जित हात पार्न सकेन । बूढानीलकण्ठले युनिभर्सललाई ७९–६२ ले पराजित गर्‍यो । विजेताका विराज रानाले १७ स्कोर गरे ।

बूढानीलकण्ठले पहिलोमा १५–८, दोस्रोमा २२–१४, तेस्रोमा १२–१८ र चौथो क्वाटरमा ३०–२० को प्रदर्शन गरेको थियो ।

महिलातर्फ समृद्ध गोरिल्लाजले आयोजक नेकोसमाथि ४८–५ को सहज जित निकाल्दै सेमिफाइनल पक्का गर्‍यो । समृद्धकी मुना महर्जनले १५ स्कोर जोडिन् । ३ टोली रहेको समूह ‘बी’ मा लगातार दोस्रो हारसँगै नेकोस बाहिरिएको छ । नेकोसको बहिगर्मनसँगै साइपाल पनि सेमिफाइनल पुग्यो ।

प्रकाशित : वैशाख ४, २०७५ ०७:५३
प्रतिक्रिया
पठाउनुहोस्

आईएम हर्षको अग्रता

कान्तिपुर संवाददाता

काठमाडौँ — काठमाडौं ओपन अन्तर्राष्ट्रिय जीएम चेस प्रतियोगिताको आठौं चरण सकिँदा भारतीय इन्टरनेसनल मास्टर हर्ष भाराथाकोटी (२४२४) ले ७ अंकसहित एकल अग्रता लिएका छन् । उनले सोमबार आफ्नै देशका ग्रान्ड मास्टर (२५७९) दीपसेन गुप्तालाई हराए ।

काठमाडौं अन्तर्राष्ट्रिय जीएम चेसमा सोमबार आईएम हर्ष भाराथाकोटी (दायाँ) र ग्रान्ड मास्टर दीपसेन गुप्ता । तस्बिर सौजन्य : राखेप

युक्रेनका २५४९ रेटेड ग्रान्ड मास्टर तर्लेभ कन्स्टेन्टिन र अजरबैजानका २५०४ रेटेड ग्रान्ड मास्टर मिर्जोभ अजरबीचको खेल ड्र भयो । दुवै ६.५ अंकसहित दोस्रो स्थानमा छन् । सातौं चरणमा तेर्लेभले भारतका आईएम प्रिन्स बजाजसँग बराबरी खेले भने मिर्जोभले भारतकै निरन्जन नभलगुन्डलाई हराएका थिए ।

इजरायली ग्रान्ड मास्टर (२४९०) ग्रिनफिल्ड अलोनले भारतीय खेलाडी श्रीजित पाटिल र भारतीय आईएम हिमाल गोसाईंले आफ्नै देशका सप्तर्षि गुप्तालाई हराए । दुवै विजेता ६.५ अंक पाएका छन् । त्यस्तै भारतीय ग्रान्ड मास्टर सन्दीपन चन्दाले आईएम पी श्यामनिखिलसँग बराबरी खेले ।

नेपाली उच्च वरीयता (२२६३) का विवेक थिङ ६ अंकसहित संयुक्त तेस्रो स्थानमा छन् । आठौं चरणमा उनले भारतीय शुभम शुक्ला र सातौंमा नेपालकै पुरुषोत्तम चौलागाईंलाई हराएका थिए ।

आठौं चरणमा इन्टरनेशनल मास्टर पद्मिनी राउतलाई हराएका भारतका ग्रान्ड मास्टर श्रीराम झा सातौंमा ग्रान्ड मास्टर दीपसेन गुप्तासँग पराजित भए । श्रीरामको पनि ६ अंक छ ।

रुसका ग्रान्ड मास्टरद्वय फोमिनी अलेक्जेन्डर (२३९१) र भोल्कोभ सर्गेइ (२५९८) ले आठौं चरणमा बराबरी खेले । दुवैसँग समान ६ अंक छ । बेलारुसका ग्रान्ड मास्टर कास्पारोभ सर्गेइ आठौं चरणमा भारतीय जीबी हर्षबर्धनसँग पराजित भए ।

भारतीय कस्तुभ कुण्डुले नेपाली क्यान्डिडेड मास्टर नवीन तण्डुकारलाई हराए । नेपाली फिडे मास्टर रुपेश जैसवालले भने भारतीयका प्रतीक पाटिलसँग बराबरी खेले । रुपेशले सातौंमा भारतीय स्यानतान चन्द्रालाई हराएका थिए । रुपेशसँग साढे ५ अंक छ ।

आठौं चरणमा नेपालीका सुश्रुत दाहाल (१७९२) ले भारतीय आईएम अनुप देशमुख (२२८२) र नेपाल च्याम्पियन मदनकृष्ण कायस्थले भारतका भाग्यश्री पाटिललाई हराए । दुवैको ५.५ अंक छ ।

क्यान्डिडेड मास्टर केशव श्रेष्ठ भारतका शुभ्रदिप्ता दास र बद्रीलाल नेपाली भारतीय फिडे मास्टर सी लक्ष्मीसँग पराजित भए । बंगलादेशी फिडे मास्टर अब्दुल मोहम्मदले भारतका स्यानतानलाई पराजित गरे । रोमानियाकी इन्टरनेसनल मास्टर लामी एलिनाले नेपालका पुण्यमान कर्माचार्यलाई हराइन् ।

प्रकाशित : वैशाख ४, २०७५ ०७:५२
पूरा पढ्नुहोस्
प्रतिक्रिया
पठाउनुहोस्