हेटौंडाका कृष्ण थापा राष्ट्रिय वुद्धिचाल च्याम्पियन

नाइट चेस क्लब काँकडभिट्टाले आयोजना गरेको प्रतियोगितामा थापाले आठाैं चरणमा पूर्व राष्ट्रिय च्याम्पियन क्यान्डिडेट माष्टर नवीन तन्डुकारलाई र नबौ चरणमा झापाका प्रकाश नेपाललाई पराजित गर्दै साढे ७ अंक बटुलेर पहिलो बनेका थिए ।

उपाधिसंगै उनले नगद ५० हजार पाए । उनी तीन वर्ष अघि रसियन कल्चरले आयोजना गरेको प्रतियोगितामा राष्ट्रिय च्याम्पियन बनेका थिए ।

ललितपुरका राजन पुरी ७ अंकसाथ दोस्रो भए । उनले ३० हजार प्राप्त गरे । दमकका राजन सुवेदी, भुपेन्द्र निरौला र सुमन श्रेष्ठ समान ७/७ अंकका साथ तेस्रो, चौथो र पाँचौ स्थान लिदै क्रमश: २० हजार, १५ हजार र १० हजार जिते ।

दमकका प्रकाश नेपाल साढे ६ अंकका साथ छैठौ बने । उनले ८ हजार पाए । वद्रीलाल नेपाली (ललितपुर) र विश्वविजय घिमिरे (मेचीनगर) ले समान साढे ६ अंक पाए । उनीहरुले क्रमश: ७ हजार र ६ हजार नगद पाए ।

पूर्व नेपाल च्याम्पियन सुरवीर लामा (काठमाडौ), फिडे माष्टर मनिष हमाल (काठमाडौ), मनिराज डागी (काठमाडौ), फिडे माष्टर विलमलाल श्रेष्ठ (काठमाडौ), ज्याला इम्वुङ (झापा), नवीन तन्डडुकार (काठमाडौ) र उमेर राई (झापा) ६/६ अंक साथ ‘टप १५’ मा समेटिए ।

प्रतियोगिताका विजेतालाई नेपाल वुद्धिचाल संघका अध्यक्ष एकलाल श्रेष्ठ, टाइटल स्पोन्सर अनिता थापा, नाइट चेस क्लवका अध्यक्ष कृष्णकान्त खनियालगायतले पुरस्कार वितरण गरे । जेठ १२ गतेदेखि सुरु प्रतियोगितामा देशभरका १ सय २० वढी खेलाडी सहभागी थिए ।