लक्ष्य एसिया कप

कान्तिपुर संवाददाता

काठमाडौँ — नेपालले वान–डे अन्तर्राष्ट्रिय खेल्छ भन्ने सपना थियो, तर म नै प्रशिक्षक भएको समयमा खेल्छ भन्ने थिएन । यसमा नेपालीदेखि विदेशी सबै प्रशिक्षक, यत्रो वर्षदेखि खेल्दै आएका खेलाडी सबैको योगदान छ । म प्रशिक्षक भएको समयमा खेल्यो, त्यसमा खुशी लाग्नु स्वाभाविक हो ।

नेपाली प्रशिक्षकको पालामा पहिलो वान–डे अन्तर्राष्ट्रिय खेल्नु अनि जित हात पार्नु ठूलो उपलब्धि नै हो जस्तो लाग्छ ।

निश्चय पनि एसिया कप छनोट आउँदै छ । युरोप भ्रमण र नेदरल्यान्ड्ससँग खेल्नु नै हाम्रो तयारी हो । चुनौती छ । यो चुनौती पार गरेर एसिया कपमा भारत र पाकिस्तानसँग खेल्ने हाम्रा खेलाडीको पनि सपना छ । उनीहरूको मिहिनेत पनि त्यहीअनुसार छ । अब २–४ दिन आराम गरेर एसिया कप तयारी सुरु गरिहाल्छौं । तयारीका क्रममा हामी श्रीलंकामा अभ्यास खेल्न सक्छौं ।

हामीले त्यो प्रस्ताव आईसीसीलाई दिएका छौं । १–२ दिनमा आईसीसीले त्यसको निश्चित गरेपछि हाम्रो प्रशिक्षण सुरु हुनेछ । विदेशी ब्याटिङ परामर्श प्रशिक्षक पनि ल्याउनेबारे छलफल भएको थियो, तर आईसीसीले अन्तिम निर्णय दिएको छैन ।

Yamaha

एसिया कप खेल्नु धेरै ठूलो चुनौती र अवसर हो । हामीले त्यहीअनुसार प्रदर्शन पनि गरेका छौं । खेलाडी पनि त्यो जोस छ, मुख्य भनेको टिममा सन्तुलन छ । जुनियर र सिनियर खेलाडीको सन्तुलन मिलेको छ । यसले टिमभित्र पनि प्रतिस्पर्धाको भावना जगाएको छ । मैले केही गर्नुपर्छ भन्ने खेलाडीलाई अनुभूति गराएको छ । यही विश्वासले गर्दा हामीले प्रदर्शन दिन सकेका छौं ।

नेदरल्यान्ड्सको हाइपर्फोमेन्स म्यानेजरले नेपालमा आएर आफ्नो टोलीले खेल्ने इच्छा देखाएको थियो । तर त्यो हामीले भन्दा पनि आईसीसीले हेर्ने विषय हो यो, किन भने नेपाल क्रिकेट संघ निलम्बनमा रहेको अवस्था छ । आईसीसीले पनि आयोजना त गर्ने तर यसको जिम्मेवारी कसले लिने भनेर सोध्छ, त्यही भएर अहिले यो हाम्रो हातमा छैन । ४–५ महिनामा क्रिकेट संघको विवाद समाधन भएर आउँछ भने निश्चय पनि हामीले यस्तो शृंखला घरेलु मैदानमै खेल्न पाउँछौं ।

नेदरल्यान्ड्समा हाम्रो प्रदर्शन राम्रो भएको मान्छु म । हामीले पहिलो खेलमा बलिङ राम्रो गर्‍यांै तर राम्रो सुरुआत गरे पनि ब्याटिङ पतन हुँदा हार्न पुग्यौं । नेदरल्यान्ड्स विश्व क्रिकेट लिग च्याम्पियनसिपको च्याम्पियन टिम हो । दुई वर्षअगाडि हामीले उनीहरूलाई त्यही हराएका थियौं । त्यसैले पहिलो खेल अलि कति बिग्रिए पनि उनीहरूलाई हराउँछौं भन्ने आशा थियो । यही विश्वासले पनि खेल जितेका हौं ।

बलिङ र उत्कृष्ट फिल्डिङ पनि हाम्रो जितको कारण थियो । आगामी दिनमा अझ यस्तो एक्सपोजर पाउने हो भने हाम्रा खेलाडी अझ माथि जाने छन् । यस्तै म्याच खेल्ने हो भने हाम्रो प्रदर्शनमा पनि सुधार आउँछ । हाम्रा खेलाडीमा क्षमता छ, तर एक्सपोजर कम छ । यही हिसाबले अगाडि बढ्यौं भने धेरै त भन्दिनँ ८–१० वर्षभित्र नेपाल पनि टेस्ट खेल्ने राष्ट्र बन्नेछ ।

Esewa Pasal

प्रकाशित : श्रावण २२, २०७५ ०८:०२
प्रतिक्रिया
पठाउनुहोस्
ADVERTISEMENT
ADVERTISEMENT

खेल पूर्वाधार अधुरै

प्रतियोगिता प्रभावित हुने आशंका
ठाकुरसिंह थारु

नेपालगन्ज — आठौं राष्ट्रिय खेलकुद प्रतियोगिता हुन चार महिना बाँकी छ । तर, त्यसका लागि आवश्यक भौतिक पूर्वाधार निर्माण धेरै बाँकी छन् । अधिकांश खेलस्थल अधुरा छन् । पूर्वाधार पूरा नभएको खण्डमा राष्ट्रिय प्रतियोगिता प्रभावित हुने खतरा बढेको छ ।

केन्द्रले समयमै बजेट निकासा नगर्दा निर्माण कार्यले गति लिन सकेको छैन । यसले यहाँ हुने प्रतियोगिता प्रभावित हुने आशंका बढाएको छ ।

‘आठौं राष्ट्रिय खेलकुद प्रतियोगिता सफलताका लागि हामी तीव्र गतिमा लागिपरेका छौं तर सबै कुरा पैसामै ठोकिन्छ,’ क्षेत्रीय खेलकुद विकास समितिका अध्यक्ष भीम ओलीले भने, ‘समयमै भौतिक पूर्वाधार निर्माण गर्न नसकिने हो भने राष्ट्रिय प्रतियोगिता प्रभावित हुनसक्छ ।’

मंसिर २१ देखि २८ सम्म हुने प्रतियोगितालाई आवश्यक १३ ठूला आयोजना निर्माणाधीन छन् । ती सबै आयोजनालाई पूरा बजेट आएको छैन । कोहलपुरमा अन्तर्राष्ट्रिय क्रिकेट मैदान निर्माण भइरहेको छ । ९० लाख रुपैयाँ खर्च भइसकेको मैदानमा पिच निर्माणका लागि थप १० लाख छुटयाइएको छ । यति रकमले एकछेउको काम पनि पूरा नहुने अध्यक्ष ओली बताउँछन् ।

नेपालगन्ज रंगशालाको ट्रयाक र फिल्ड निर्माणका लागि साढे ६ करोड रुपैयाँ खर्च भइसकेको छ । दर्शक र भीआईपी प्यारापिट निर्माणका लागि २१ करोड लाग्ने अनुमान गरिएको छ । त्यसका लागि पनि राष्ट्रिय खेल परिषद् (राखेप) ले बजेट निकासा गरेको छैन । नेपालगन्जको काराकाँदोमा जुडो एकेडेमी निर्माण भइरहेको छ । त्यसलाई २३ लाख रुपैयाँ निकासा भएको छ । उक्त रकम एकेडेमी निर्माणमा अपुग हुने जनाइएको छ ।

नेपालगन्जमा भारोत्तोलन प्रतियोगिता भवनका लागि ५५ लाख खर्च भइसकेको र अझ ३० लाख रुपैयाँ माथिल्लो तलाका लागि आवश्यक देखिएको छ । सुटिङ रेन्जका लागि एक करोड आवश्यक पर्नेमा ४५ लाख रुपैयाँमात्रै बजेट आएको अध्यक्ष ओलीले बताए । पौडी पोखरीका लागि १५ करोडको काम भइरहेको छ । करिब अन्तिम चरणमा रहेको निर्माणका लागि थप रकम आवश्यक पर्नेछ । बाँकेको खजुरामा शुक्र भलिबल स्टेडियम निर्माण भइरहेको छ । २ करोड रुपैयाँको लागतमा निर्माण भइरहेको स्टेडियमका लागि ८८ लाख रुपैयाँ निकासा भएको छ ।

कबड्डी प्रतियोगितालाई बर्दियाको बाँसगढीमा हल निर्माण भइरहेको छ । १ करोड ७५ लाखमा निर्माण हुने भनिएको कभर्डहलका लागि जम्मा १५ लाख निकासा भएको छ । बर्दियाको ठाकुरबाबा गाउँपालिका भुरिगाउँमा खोखो कभर्डहल निर्माण जारी छ । १ करोड ७५ लाखमा निर्माण हुने हलका लागि १५ लाखमात्रै बजेट निकासा भएको क्षेत्रीय खेलकुद विकास समितिले जनाएको छ ।

बर्दियाको गुलरियामा कभर्डहल निर्माण गर्न १ करोड २० लाख रुपैयाँ बजेट तोकिएको छ । तर त्यसका लागि पनि १५ लाख बजेट निकासा भएको छ । देउखुरीको लमहीमा क्रिकेट मैदान निर्माण भइरहेको छ । ६० लाख खर्च भइसकेको र थप १५ लाख छुट्याइएको छ । तर, त्यति बजेटले भने क्रिकेट मैदान निर्माण हुन नसक्ने जनाइएको छ ।

दाङको बेलझुण्डीमा रंगशाला निर्माण भइरहेको छ । २५ करोड लागतमा निर्माण भइरहेको रंगशालाका लागि बजेट निकासा हुन सकेको छैन । दाङको तुल्सीपुरमा कराँते कभर्डहल निर्माणका लागि एक करोड लागत लाग्नेछ । तर, त्यसका लागि २५ लाख रुपैयाँ मात्रै निकासा भएको छ ।

आठौं राष्ट्रिय खेलकुद प्रतियोगिताको लोगो र मस्कट हात्तीको छावा राखिएको छ । प्रतियोगिताको नारा र गीत यसअघि नै सार्वजनिक भइसकेको छ । प्रतियोगिताको नारा ‘आठौं खेलकुद हाम्रो प्रदेशमा, पसिना र पौरख आफ्नै देशमा’ तय गरिएको छ । उक्त नारा सदस्यसचिव केशवकुमार विष्टले लेखेका हुन् । प्रतियोगिताको गीत नारायण खतिवडाले लेखेका छन् ।

प्रदेश ५ मा बाँके र बर्दिया राष्ट्रिय निकुन्ज रहेकाले पर्यटन प्रवद्र्धनका लागि मस्कट हात्तीको छावा तय गरिएको हो । उनले लोगोमा शान्तिका दूत गौतम बुद्ध, शान्तिको प्रतीक परेवा, बर्दियाको राष्ट्रिय निकुन्ज ठाकुरद्वारालाई प्रतिविम्बित गरिएको छ । लोगोमा सात प्रदेश झल्काइएको छ ।

राष्ट्रियताको पहिचानका लागि चन्द्रसूर्यअंकित झण्डा पनि समेटिएको छ । ३५ खेलमा प्रतिस्पर्धा हुने प्रतियोगिताका लागि करिब डेढ अर्ब रुपैयाँ बजेट खर्च हुने अनुमान गरिएको छ ।

प्रकाशित : श्रावण २२, २०७५ ०७:५८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT