प्रदर्शन सुधार्ने लक्ष्य

कान्तिपुर संवाददाता

काठमाडौँ — साफ यू–१५ गर्ल्स फुटबल च्याम्पियनसिप खेल्न भुटान पुगेको नेपाली टोलीले शनिबार पहिलो खेल खेल्दै छ । प्रतियोगिता बिहीबारै सुरु हुनेछ । उद्घाटन खेलको पूर्वसन्ध्यामा आयोजित पत्रकार सम्मेलनमा बोल्दै नेपाली टोलीकी प्रशिक्षक गंगा गुरुङले नेपालले राम्रो तयारी गरेको बताएकी छन् ।

‘हाम्रो तयारी राम्रो भएको छ । अब योजनाअनुसार मैदानमा राम्रो प्रदर्शन गर्ने विश्वास छ,’ प्रशिक्षक गुरुङले थपिन्, ‘हाम्रो समूहका अन्य दुवै टोली राम्रा छन् । हामीले सक्दो प्रयास गरेर नतिजा आफ्नो पक्षमा पार्ने प्रयास गर्नेछौं ।’

Yamaha

टोलीकी कप्तान प्रीति राईले पछिल्लो संस्करणमा पनि खेलेको अनुभव रहेकाले राम्रो नतिजा निकाल्न सक्दो प्रयास गर्ने बताइन् । सन् २०१७ मा आयोजित पहिलो संस्करणमा नेपाली टोली समूहको पुछारमा जितविहीन रहँदै घर फर्केको थियो । त्यसबेला आयोजक बंगलादेशसँग ६–० तथा भारतसँग १०–० ले पराजित नेपालले अन्तिम खेलमा भुटानसँग १–१ को बराबरी खेलेको थियो । चार टोलीसम्मिलित प्रतियोगिताको उपाधि घरेलु टोली बंगलादेशले फाइनलमा भारतलाई १–० ले हराएर जितेको थियो ।

यसपालि दोस्रो संस्करणमा ६ टोलीको सहभागिता छ । नेपाल रहेको समूह ‘बी’ मा बंगलादेश, नेपाल र पाकिस्तान तथा समूह ‘ए’ मा भारत, आयोजक भुटान र श्रीलंका छन् । पहिलो दिन भारत र श्रीलंका तथा बंगलादेश र भुटानबीच प्रतिस्पर्धा हुनेछ ।

नेपालले शनिबार पाकिस्तान र सोमबार बंगलादेशसँग खेल्नेछ । दुवै समूहका शीर्ष दुई टोलीले सेमिफाइनल स्थान बनाउने छन् । फाइनल १८ अगस्टमा हुनेछ ।

प्रकाशित : श्रावण २३, २०७५ २१:१८
ADVERTISEMENT
प्रतिक्रिया
पठाउनुहोस्
ADVERTISEMENT

कांग्रेस महासमिति बैठक अन्योलमा

कान्तिपुर संवाददाता

काठमाडौँ — कांग्रेसको महासमिति बैठक भदौमा नहुने भएको छ । पार्टीले विधान संशोधनका लागि मस्यौदा समिति बनाउन नसक्दा बैठक प्रभावित भएको हो । 

महासमिति बैठकको मुख्य एजेन्डा विधान संशोधन हो । एकात्मक राज्य प्रणालीको पार्टी संरचनालाई संघीय संरचनामा रूपान्तरण गर्न महासमिति बैठकबाट विधान संशोधन गर्ने कांग्रेसको तयारी छ । समिति गठनमै किचलो भएपछि बैठक बस्ने सम्भावना टर्दै गएको हो ।

केन्द्रीय कार्यसमितिको गत चैतको बैठकले महासमिति बैठक भदौ मसान्तमा गर्ने निर्णय लिएको थियो । विधानमा प्रत्येक वर्ष महासमिति बैठक बोलाउनुपर्ने व्यवस्था छ । तर, शेरबहादुर देउवा पार्टी सभापति निर्वाचित भएको साढे दुई वर्ष बित्न लाग्दा एकपटक पनि बैठक बस्न सकेको छैन ।

कांग्रेस प्रवक्ता विश्वप्रकाश शर्माले दसैंअघिसम्म महासमिति बैठक गर्ने तयारी भइरहेको बताए । ‘विधान मस्यौदा समिति गठनमा ढिलाइले भदौ मसान्तभित्र बैठक हुन नसक्ने अवस्था बनेको छ,’ उनले भने, ‘असोज मध्यतिर मिति तोक्ने तयारी भइरहेको छ ।’ सभापति देउवाले चाडपर्वको कारण जनाउँदै अझ पर धकेल्ने प्रयास गरिरहेको संस्थापनइतर पक्षको आरोप छ ।

यसअघि देउवाले वरिष्ठ नेता रामचन्द्र पौडेल पक्षले मस्यौदा समितिमा रहने सदस्यको नाम नदिएका कारण ढिलाइ भएको बताउँदै आएका थिए । पौडेल पक्षले समितिमा रहने चार जनाको नाम १० दिनअघि नै बुझाइसकेको छ, जसमा केन्द्रीय सदस्यहरू दिलेन्द्र बडु, मीनेन्द्र रिजाल, नवीन्द्रराज जोशी र प्रदीप पौडेल छन् ।

सभापति देउवा समिति गठन नगरी विदेश गएको भन्दै संस्थापनइतर नेताहरू असन्तुष्ट छन् । देउवाले आफ्नो कार्यकाल लम्ब्याउन बैठक ढिलो गर्न लागेको उनीहरूको आशंका छ । अबको डेढ वर्षपछि देउवाको चारवर्षे कार्यकाल सकिन्छ ।

विधानले विशेष परिस्थिति देखाएर थप एक वर्ष लम्ब्याउन सक्ने अधिकार दिएको छ । ‘थप एक वर्ष लम्ब्याउन महासमिति बैठक नै ढिलाइ गर्न खोजिएको हो,’ पौडेलपक्षीय एक केन्द्रीय सदस्यले भने, ‘असोजमा गर्ने भनिए पनि चाडपर्व देखाएर अझ पछि धकेल्ने प्रयास भइरहेको छ ।’

प्रकाशित : श्रावण २३, २०७५ २०:४८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT