थापाथलीलाई उपाधि
काठमाडौँ — ललितपुर स्पोटर्स क्लबलाई फाइनलमा २.५– १.५ अंकले पराजित गर्दै थापाथली चेस पार्कले तुल्सीलाल स्मृति चौथो राष्ट्रिय क्लब टिम बुद्धिचाल प्रतियोगिताको उपाधि जितेको छ ।
शुक्रबार सम्पन्न फाइनल खेलमा थापाथलीका सुशील चौधरीले जनार्दन श्रेष्ठ तथा क्षितिज भण्डारीले बद्रीलाल नेपालीलाई पराजित गरेका थिए ।
फिडेमास्टर विमललाल श्रेष्ठ र आशिष फुयालबीचको खेल बराबरीमा सकिँदा ललितपुरका सजिन महर्जनले राजन पुरीलाई हराए । उपाधिसँगै थापाथलीले एक लाख पचास हजार र उपविजेता ललितपुरले ७५ हजार रुपैयाँ प्राप्त गरे ।
गोल्डेनगेट इन्टरनेसनल कलेजले गजुरमुखी चेस क्लब, इलामलाई ३–१ ले पराजित गर्दै तेस्रो स्थान हासिल गर्यो । गोल्डेनगेटले ५० हजार तथा गजुरमुखीले ३० हजार रुपैयाँ पाए ।
देशभरका २१ क्लब टिमहरूको सहभागिता रहेको प्रतियोगितामा व्यक्तिगत रूपमा उत्कृष्ट प्रदर्शन गरेका खेलाडीहरू राज प्रजापति, मनीष हमाल, मदनकृष्ण कायस्थ, राजेन्द्र वज्राचार्य र सुशील चौधरीले जनही पाँच हजार रुपैयाँ प्राप्त गरे ।
प्रकाशित : भाद्र २, २०७५ ०७:३३
