स्वर्णिम अवसर

विनोद पाण्डे

काठमाडौँ — नेपाली क्रिकेटले पछिल्लो समय धेरै अवसरको सदुपयोग गरेको छ । ७ महिनाअघि मात्र विश्व क्रिकेट लिग डिभिजन २ खेलिरहेको पृष्ठभूमिमा अहिलेको वान–डे अन्तर्राष्ट्रिय मान्यता परीको कथा जस्तो भइसकेको छ । एसिया कप छनोटले नेपाललाई एउटा अर्को ठूलो अवसर प्रदान गर्नेछ ।

एसिया कपको छनोटको आधार हो मलेसियामा बुधबार सुरु हुने प्रतियोगिता । अर्थात एसिया कप छनोटको विजेताले एसिया कपमा भारत र पाकिस्तानको समूहमा रहेर खेल्न पाउनेछ । नेपाल जस्तै यूएई, हङकङ, मलेसिया, सिंगापुर, ओमानलाई यो अवसर छ । एसिया कप छनोटमा खेल्ने यी राष्ट्रको विजेताले मात्र एसिया कपमा भारत र पाकिस्तानसँग समूह चरणमा खेल्न पाउनेछन् ।


भारत, पाकिस्तानसँग खेल्न पाउने सम्भावनालाई इंगित गर्दै कप्तान पारस खड्का एसिया कप छनोटलाई स्वर्णिम अवसर भन्छन् । ‘यो वर्षैभरि राम्रो क्रिकेट खेल्दै आएका छौं, जसोतसो आफूअनुकूल नतिजा ल्याएका छौं,’ पारस भन्छन्, ‘एसिया कप छनोट जस्तो अवसर बारम्बार आउँदैन, त्यही भएर हामीले आफ्नातर्फबाट सक्दो प्रयास गर्नेछौं । एउटा खेलाडी र एउटा टिमका रूपमा हामी यो प्रतियोगिताको पर्खाइमा छौं । यस्तो अवसर सदुपयोग गर्नु महत्त्वपूर्ण हुन्छ ।’

Yamaha


२०१५ मा यूएईमा पपुवा न्यु गिनीसँग विश्व क्रिकेट लिग च्याम्पियनसिपमा खेल्नुअघि पाकिस्तानसँग अभ्यास (मान्यता नपाएको) खेल खेल्न पाउनु नेपाली क्रिकेटको ठूलो फड्कोका रूपमा थियो । एसिया कप छनोटले नेपाललाई एसिया कपबाट भारत र पाकिस्तानसँग वान–डे अन्तर्राष्ट्रिय खेल्ने सपनालाई यथार्थ बनाइदिन सक्छ । नेपाल अहिले वान–डे अन्तर्राष्ट्रिय मान्यता प्राप्त राष्ट्र भए पनि भारत र पाकिस्तान जस्ता ठूलो राष्ट्रको संरचनाको लिकबाट धेरै बाहिर छ । त्यसैले एसिया कप छनोट जस्ता प्रतियोगिताले मात्र नेपालको भारत, पाकिस्तान, श्रीलंका र बंगलादेशसँग पुल जोड्न सक्छ ।


एसिया कप छनोट सुरु हुनुअघि नै एसिया कपको खेल तालिका आइसकेको छ । समूह ‘बी’ मा श्रीलंका, बंगलादेश र अफगानिस्तान छन् । समूह ‘ए’ मा भारत र पाकिस्तान छन् । एसिया कप छनोटमा खेल्ने नेपाल, यूएई, हङकङ, ओमान, सिंगापुर र आयोजक मलेसियाको विजेता समूह ‘ए’ मा भारत र पाकिस्तानसँगै रहेर प्रतिस्पर्धा गर्नेछन् ।


विश्व क्रिकेट लिग च्याम्पियनसिपमा सहभागी ८ टोलीमा सातौं स्थानमा रहेपछि नेपाल डिभिजन २ मा झरेको थियो । फेब्रुअरीमा डिभिजन २ खेलेको नेपालले त्यसको अर्को महिना जिम्बावेमा विश्वकप छनोट खेल्दै आठौं स्थान हात पारी वान–डे अन्तर्राष्ट्रिय टोली बनेको थियो । त्यस हिसाबमा नेपाललाई दाबेदार राखिएको उनी स्विकार्छन् ।


‘वान–डे अन्तर्राष्ट्रिय राष्ट्र भएकाले हामीमाथि जिम्मेवारी छ । राम्रो प्रदर्शन गर्न अलिकति दबाब पनि छ । जुन क्रिकेट पछिल्लो समय खेलेका छौं, त्यसलाई निरन्तरता दिन जरुरी छ । वरीयताका हिसाबमा हामी दाबेदार हुन सक्छौं तर जुनै पनि प्रतियोगिता र खेल सुरुदेखि खेल्नुपर्छ यो बिर्सन हुन्न,’ पारस भन्छन् ।


जिम्बावेमा विश्वकप छनोट खेलेयता नेपालले पहिलो पटक प्रतियोगिता खेल्न लागेको हो । गत महिना एमस्ट्राडममा नेदरल्यान्ड्ससँग दुई खेलको शृंखला खेल्दै नेपाल वान–डे अन्तर्राष्ट्रिय क्लबमा प्रवेश गरेको थियो । दोस्रो खेलमा १ रनको रोमाञ्चक जित हात पार्दै नेपालले वान–डे अन्तर्राष्ट्रिय जितको स्वाद चाखेको थियो । पारस एसिया कपसम्म पुग्न आफ्नो स्तर अझ माथि लैजानुपर्ने बताउँछन् ।


लामो समयपछि नेपालसहित यूएई र हङकङले एसियाली प्रतियोगितामा खेल्दै छन् । नेपाल जस्तै यूएई पनि वान–डे अन्तर्राष्ट्रिय मान्यता राष्ट्र हो । हङकङलाई उछिन्दै नेपाल वान–डे अन्तर्राष्ट्रिय राष्ट्र बनेको थियो । यी तिनै राष्ट्रलाई नै एसिया कप छनोटको प्रमुख दाबेदारका रूपमा हेरिएको छ । प्रशिक्षक जगत टमाटा डिभिजन २ देखि नेपालले लगातार राम्रो खेलिरहे पनि अहिलेको चुनौती फरक रहेको स्विकार्छन् ।


‘विश्व क्रिकेट लिग सकिए पनि एसिया कप छनोट त्यस्तै संरचनामा छ । त्यसैले यो चुनौतीपूर्ण छ । एसियन कन्डिसनमा सबै टोली बराबर हैसियतका छन् । तर नेपाल टिम त्यसका लागि तयार छ,’ पारसले भने, ‘यो प्रतियोगितामा खेल्ने सबै टिमले सबै टिमका खेलाडीलाई चिनेको पनि छैन । यूएई, हङकङ, मलेसिया, सिंगापुर, ओमानका सबै खेलाडीले हामीलाई चिन्दैनन्, हामी पनि उनीहरूलाई चिन्दैनौं । त्यसैले रणनीतिक हिसाबमा अगाडि बढ्न जरुरी छ । उनीहरूले पनि हामीलाई त्यही हिसाबमा हेर्छन् होला ।’

नेपालले १९९६ देखि नै एसीसी ट्रफी खेल्दै आएको थियो । विगतमा एसिया कपको छनोटको आधार यही एसीसी ट्रफी हुने गथ्र्यो । २००२ को एसीसी ट्रफीको फाइनल पुगेर पनि नेपालले भारत र पाकिस्तानको लडाइँका कारण एसिया कप खेल्न पाएको थिएन । २०१२ यता एसीसी ट्रफी भएको छैन । पछिल्लो पटकको एसीसी ट्रफीमा फाइनल खेल ‘टाई’ भएसँगै नेपाल र यूएई संयुक्त विजेता भएका थिए । एसिया कप छनोट दाबेदार नेपाल र यूएईसहित अन्य राष्ट्रलाई ठूलो अवसर लिएर आएको छ, एसिया कप खेल्नलाई ।

Esewa Pasal

प्रकाशित : भाद्र १२, २०७५ ०८:०१
ADVERTISEMENT
प्रतिक्रिया
पठाउनुहोस्
ADVERTISEMENT

१८ औं एसियाली खेलकुद: सोमबहादुरको राष्ट्रिय कीर्तिमान

कान्तिपुर संवाददाता

जकार्ता — १८ औं एसियाली खेलकुद भइरहेको मुख्य रंगशाला जेरोला बुङकार्नोको ट्रयाकमा सोमबार पुरुष ८०० मिटरमा नेपालका धावक सोमबहादुर कुमालले राष्ट्रिय कीर्तिमान कायम गरेका छन् ।

उनले निर्धारित दूरी १ मिनेट ५०.२५ सेकेन्डमा पूरा गरे । यसअघि सन् १९९५ को मद्रास साफ खेलकुदमा धनीराम चौधरीले १ मिनेट ५०.६० को कीर्तिमान कायम गरेका थिए ।

राष्ट्रिय कीर्तिमान कायम गरे पनि ८ सय मिटर दौडमा सोमबहादुर हिट चरण पार गर्न सकेनन् । १ मिनेट ४८.६४ भन्दा माथि दूरी पार गर्ने ८ धावक अघिल्लो चरणमा प्रवेश गरेका थिए । सहभागी २७ धावकमध्ये सोमबहादुर १३ औं स्थानमा रहे । १२ औं दक्षिण एसियाली खेलकुदमा छैटौं स्थानमा रहँदा सोमबहादुरले १ मिनेट ५५.०२ सेकेन्डको टाइमिङ बनाएका थिए ।


सोमबारै धाविका सरस्वती भट्टराईले महिला ८०० मिटर दौडमा सिजनको उत्कृष्ट प्रदर्शन गरेकी छन् । उनले २ मिनेट १२.८५ सेकेन्डमा दूरी पार गरिन् । २० धाविकाले प्रतिस्पर्धा गर्दा सरस्वती १३ औं स्थानमा रहेकी थिइन् । उनी थोरैले फाइनल चरण पुग्नबाट वञ्चित भइन् । २ मिनेट १०.५० सेकेन्डसम्म दौड पूरा गर्ने खेलाडी फाइनल चरणलाई छानिएका थिए ।


सन् २०१६ को रियो ओलम्पिक खेलेकी सरस्वतीको भारतको भुवनेश्वरमा गत वर्ष सम्पन्न एसियन च्याम्पियनसिपमा बनाएको २ मिनेट १३.९९ सेकेन्ड उनको उत्कृष्ट टाइमिङ हो ।

१२ औं दक्षिण एसियाली खेलकुदमा ८०० मिटरको दूरी २ मिनेट १४.३५ सेकेन्डमा पूरा गर्दा उनी पाँचौं स्थानमा रहेकी थिइन् । दक्षिण एसियाली राष्ट्रबाट दुई श्रीलंकन धाविकामात्र फाइनल चरण पुगेका छन् । बंगलादेश, पाकिस्तान र माल्दिभ्सका खेलाडी सरस्वतीभन्दा पछाडि रहे ।


एथलेटिक्सका प्रशिक्षक आमिरी यादवले सरस्वतीको प्रदर्शन राम्रो भएको बताए । उनले भने, ‘सरस्वतीले राम्रो प्रदर्शन गरिन् । सिजनको उनको यो उत्कृष्ट प्रदर्शन हो । तयारीअनुसार हामीले यो नतिजालाई राम्रो मान्नुपर्छ ।’


महिला ८०० मिटरको राष्ट्रिय कीर्तिमान भने राजकुमारी पाण्डेको नाममा छ । उनले सन् १९८९ को चौथो साफ गेम्स, इस्लामाबादमा २ मिनेट ११.०५ को राष्ट्रिय कीर्तिमान बनाएकी थिइन् ।


विश्वरूपाको विश्वास
नेपाली धाविका विश्वरूपा बुढाले मंगलबार महिला ५ हजार मिटर दौडमा प्रतिस्पर्धा गर्नेछिन् । उनले लक्ष्य राष्ट्रिय कीर्तिमान भए पनि आफ्नो व्यक्तिगत प्रदर्शन सुधार्न सफल हुने विश्वास व्यक्त गरिन् ।


उनले १० हजार मिटर दौडमा भाग लिन पाइनन् । शनिबार भएको उक्त इभेन्टमा उनी ट्रयाकमा पुगेर फर्कनुपरेको थियो । इन्ट्री लिस्टमै नभएपछि विश्वरूपाले दौडिन नपाएकी हुन् । सोमबार रंगशालामा भेटिँदा उनले खेल्न नपाएकोमा कुनै गुनासो नरहेको बताइन् । उनले भनिन्, ‘इन्ट्री छ होला भनेर खेल्न गएकी थिएँ । तर लेट इन्ट्रीका कारण नामै रहेनछ । फर्केर आउनुपर्‍यो ।’


विश्वरूपाले १० हजार मिटरलाई आफ्नो खासै तयारी नभएको पनि बताइन् । उनले आफूले ५ हजार मिटरकै लागि भनेर तयारी गरेको र त्यसमै व्यक्तिगत उत्कृष्ट प्रदर्शन गर्ने दाबी गरिन् ।


एसियाका तीव्र धावक
एसियाडमा पुरुष १०० मिटरको स्वर्ण चिनियाँ धावक सु विङटियनले जितेका छन् । एसियाकै तीव्र गतिका धावक बनेका उनले ९.९२ सेकेन्डमा दौड पूरा गर्दै नयाँ एसियन गेम्सको कीर्तिमान कायम गरेका छन् । १०.०० सेकेन्डमा दौड पूरा गरेका कतारका टोसिन ओगुनोडेले रजत र जापानका यामागाताले कांस्य जिते । उनको पनि टाइम १०.०० सेकेन्ड रहेको थियो ।

प्रकाशित : भाद्र १२, २०७५ ०८:००
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT