नेपालको पदक निश्चितजस्तै

प्याराग्लाइडिङतर्फ दोस्रो स्थानमा
ध्रुव तुलाधर

काठमाडौँ — नेपालले १८ औं एसियाली खेलकुदमा पहिलो पदक जित्ने लगभग निश्चित जस्तै भएको छ । इन्डोनेसियामा भइरहेको प्रतियोगितामा प्याराग्लाइडिङको क्रस कन्ट्रीतर्फ नेपालको पुरुष टोली उत्कृष्ट प्रदर्शन गर्दै पदकनजिक पुगेको छ ।

पुरुष क्रसकन्ट्रीको पाँचमध्ये चौथो चरण सकिँदा नेपाल अंक तालिकाको दोस्रो स्थानमा उक्लिएको छ ।


पश्चिम जाभास्थित गुनुङ मास पुन्चकमा मंगलबार चौथो चरण सकिँदा नेपालले २७ सय ९८ अंक स्कोर गरेको छ । समग्रमा भने नेपालको ८ हजार ५ सय ९१ अंक स्कोर छ । नेपालभन्दा ७ सय ६८ अंक बढी स्कोर गरेको जापान शीर्षस्थानमा छ । तेस्रो स्थानको दक्षिण कोरियासँग ८ हजार अंक छ । चौथो स्थानको इन्डोनेसियाभन्दा नेपाल झन्डै १ हजार अंक अगाडि छ ।

Yamaha


नेपालले अब पाँचौं तथा अन्तिम चरणमा बिहीबार खेल्नेछ । १८ औं एसियाडमा अहिलेसम्म पदक जित्न नसकेको नेपालले पाराग्लाइडिङबाट पदक जित्ने सम्भावना बलियो बनेको छ । नेपाली टोलीमा विजय गौतम, विमल अधिकारी, सुशील गुरुङ, युकेश गुरुङ र विमल थापा प्रतिस्पर्धा गर्दै छन् ।


एसियाडमा पाराग्लाइडिङ पहिलोपल्ट समावेश खेल हो । टोलीका व्यवस्थापक योगेश भट्टराईले नेपालले आफ्नो लय कायम राखे कम्तीमा कांस्य पदक पक्का रहेको बताए । ‘आजकै (मंगलबार) प्रदर्शनलाई कायम गर्ने हो भने पदक निश्चित जस्तै छ । मौसम खराब नभएको अवस्थामा सबै योजना अनुसार भयो भने हामीले पदक जित्नेछौं,’ उनले भने ।


एसियाडको इतिहास पल्टाउने हो भने पनि प्याराग्लाइडिङमा पदक आउँदा सुखद संयोग जुर्नेछ । नेपालले हालसम्म तीन खेलबाट (तेक्वान्दो, कराँते र बक्सिङ) एसियाडमा पदक ल्याएको छ । यी तीनै खेलमा नेपालले पहिलोपटक सहभागी हुँदा नै पदक ल्याएको थियो । सन् १९९४ एसियाडमा कराँते पहिलोचोटि समावेश हुँदा सीता राईले कांस्य जितेकी थिइन् । त्यसअघि सन् १९८६ मा दक्षिण कोरियाको सोलमा तेक्वान्दो र बक्सिङ पहिलोचोटि समावेश हुँदा दुवै खेलले ४–४ कांस्य हात पारेका थिए ।


पाराग्लाइडिङ जारी एसियाडमा पदकको सम्भावना भएपछि आयोजकले इन्डोनेसियाले समावेश गरेको खेल हो । एक्युरेसी इभेन्टको पुरुष टिम इभेन्टमा इन्डोनेसियाले स्वर्ण जितिसकेको छ । एक्ययुरेसीकै पुरुष एकलमा पनि इन्डोनेसियाका जाफ्रो मेगावान्टोले स्वर्ण हात पारे । महिलातर्फ एक्युरेसी टिम इभेन्टमा घरेलु टोलीले रजत जित्दा एकलमा स्थानीय खेलाडी रिका विजायन्ती कांस्यमा सीमित भइन् ।


क्रस कन्ट्री टिम इभेन्टमा भने इन्डोनेसियाको पुरुष टोली चौथो र महिला टोली तेस्रो स्थानमा छन् । एक्युरेसी इभेन्टमा नेपालले कुनै पदक हात पारेन । सन् २०१९ मा नेपालमा हुने भनिएको दक्षिण एसियाली खेलकुद (साग) मा पनि प्याराग्लाइडिङ समावेश गरिएको छ ।


क्रसकन्ट्रीकै महिला टिम इभेन्टमा नेपाल छैटौं स्थानमा यथावत् छ । चौथो चरणमा २ सय १६ अंक स्कोर गरेको नेपालले समग्रमा ११ सय ६२ अंक जोडेको छ । शीर्षस्थानको दक्षिण कोरियाको ४ हजार ३ सय ३९ अंक छ । महिला टिम इभेन्टमा नेपालका लागि प्रतिभा भुजेल, त्रिशा बोम्जन र सविता तामाङले प्रतिस्पर्धा गरिरहेका छन् ।

प्रकाशित : भाद्र १३, २०७५ ०९:०८
ADVERTISEMENT
प्रतिक्रिया
पठाउनुहोस्
ADVERTISEMENT

यामसाजनले २०० मिटर दौडिएनन्

ध्रुव तुलाधर

जकार्ता — नेपाली धावक यामसाजन सुनार १८ औं एसियाली खेलकुदको २०० मिटर दौडमा प्रतिस्पर्धा नै नगरी स्वदेश फर्किएका छन् ।

उक्त इभेन्टको मंगलबार मुख्य रंगशाला जेरोला बुङकार्नोमा प्रतिस्पर्धा भएको थियो । हिट नम्बर ४ को सूचीमा यामसाजनको नाम थियो । तर लेन नम्बर ५ मा उनी अनुपस्थित रहे ।

उनले नेपाली टिम अफिसियलसामु आफू खेल्न नसक्ने कारण दिएका थिए । शनिबार १०० मिटर प्रतिस्पर्धा गरेका यामसाजनले खुट्टामा समस्या भएकाले २०० मिटर दौडन असमर्थ रहेको कारण पेश गरेका छन् । उनले १०० मिटरको हिट चरणमा ११.३९ सेकेन्डबाट दौड पूरा गरेका थिए । उनी आफ्नो टाइमिङ पनि सुधार्न असफल थिए ।

यामसाजनको २०० मिटरमा भने २१.७५ सेकेन्डको टाइमिङ छ ।

इन्चोन एसियाडसमेत खेलेका उनले १२ औं दक्षिण एसियाली खेलकुदमा २२.३१ सेकेन्डबाट दौड पूरा गरेका थिए । यस इभेन्टमा आठौं साफ खेलकुदमा रामकृष्ण चौधरीले बनाएको २१.९२ सेकेन्डको राष्ट्रिय कीर्तिमान छ ।

२०० मिटर नखेल्ने भएपछि यामसाजनसहित एथलेटिक्स चार खेलाडी स्वेदश फर्किएका छन् । सोमबार अबेर ८०० मिटर दौडमा राष्ट्रिय कीर्तिमान कायम गरेका सोमबहादुर कुमाल, म्याराथन धावकद्वय कृष्णबहादुर बस्नेत र गोपीचन्द्र पार्की फर्केका हुन् । कुमालले धनीराम चौधरीले मद्रास साफ खेलकुदमा कायम गरेको कीर्तिमान तोड्दै १ मिनेट ५०.२५ सेकेन्डको नयाा राष्ट्रिय कीर्तिमान बनाएका थिए । सन् १९९५ को साफमा धनीरामले १ मिनेट ५०.६० सेकेन्डको कीर्तिमान बनाएका थिए ।

एथलेटिक्समा ६ खेलाडीले सहभागिता जनाएकोमा दुई महिला खेलाडीको इभेन्ट बााकी छ । विश्वरुपा बुढाले महिला ५ हजार मिटर दौडमा मंगलबारै प्रतिस्पर्धा गर्नेछिन् । सोमबार ८०० मिटरमा उत्कृष्ट प्रदर्शन गरेकी सरस्वती भट्टराईको १५०० मिटरको प्रतिस्पर्धा बुधबार हुनेछ ।

म्याराथनमा पनि दुवै धावकले दूरी पार गर्न सकेनन् । कृष्णबहादुरले ४० र गोपीचन्द्रले ३० किमिमा दौड त्यागेका थिए । यहााको बाफिलो मौसमले गर्दा मांसपेसीमा समस्या आएर बीचमै दौड त्यागेको बताएका थिए ।

एक अफिसियलले एसियाड खेल्न आउने खेलाडीको मनलाग्दी पारा भएको आरोप लगाए । उनले भने, ‘कोही इन्ट्री नै नगरिएको इभेन्टमा खेल्न चाहन्छ । कोही भएको इभेन्टमा आफ्नो प्रदर्शन सुधार हुादैन जस्तो लागेपछि खेल्न चाहादैनन् । मनलाग्दी गर्छन् ।’

प्रकाशित : भाद्र १२, २०७५ १०:३४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT