साफ च्याम्पियनसिपः अन्योल र अनिश्चितताको रोमाञ्च

हिमेशरत्न बज्राचार्य

ढाका — फुटबलमा न त जितको उन्मादले काम गर्छ, न हारको निरासाले । साफ च्याम्पियनसिप २०१८ को समूह ‘ए’ मा दुई खेल जितेर न त बंगलादेश ढुक्क हुन सकेको छ । न दुई खेल हारेको भुटानले चाँडै घर फर्कने मनसाय बनाएको छ । यही हो, फुटबलको रोमाञ्च ।

शुक्रबार विश्रामको दिन पौडी पोखरीमा नेपाली फुटबल टोलीका खेलाडी । तस्बिर : कान्तिपुर

त्यसमाथि भुटानी प्रशिक्षक ट्रेभर मोर्गनले स्पष्ट भनेका छन्, जति बेला भुटानले पाकिस्तानको सामना गर्नेछ, त्यति बेला आफ्नो टिमको प्रदर्शनमा कुनै कन्ज्युस्याइँ र कमी हुने छैन ।

र, यो भनाइले समूहका चारै टिमलाई रोमाञ्चित तुल्याउने छ । धेरै उत्साहित पनि । शनिबार बंगबन्धु रंगशालामा हुने पहिलो खेलमा भुटानले पाकिस्तानको सामना गर्नेछ । लगत्तै हुने अर्को खेलमा नेपाल भिड्ने छ आयोजक बंगलादेशसँग । चारै टिमसँग प्रतियोगिताको सेमिफाइनल पुग्ने सम्भावना कायम छ । चारै टिम सेमिफाइनल पुग्ने समीकरणबाट पनि बाहिरिन सक्छन् । यसले अन्योल र अनिश्चितता थपिएको छ । यसले रोमाञ्च पनि उत्पन्न गराएको छ ।

Yamaha

बंगलादेश समूहको शीर्ष स्थानमा छ पूरा ६ अंकसहित । उसको पछाडि नेपाल र पाकिस्तान छन् समान ३ अंकमा । भुटानसँग भने शून्य । नेपालको मात्र सम्भावनाबारे चर्चा गर्ने हो भने नेपाल जितेर पनि सेमिफाइनल पुग्नसक्छ, हारेर पनि सेमिफाइनल पुग्नसक्छ । खासमा समीकरण जटिल छ । नेपालको स्पष्ट स्थिति के हुने हो, त्यो पहिलो खेलले तय गर्नेछ । यस्तोमा दिनको दोस्रो खेल खेल्ने अवसर पाएको नेपालसामु त्यसै अनुकूल रणनीति बनाउने अवसर भने छ ।

सबैभन्दा पहिलो स्थिति, पाकिस्तान जितेको खण्डमा नेपालले बंगलादेशलाई हराउनै पर्नेछ । त्यति बेला तीनै टिमको समान ६ अंक हुनेछ । यस्तोमा गोलअन्तर समीकरण आउनेछ । त्यही खेलमा भुटान जिते, नेपाललाई जित त पर्याप्त हुन्छ नै ।

बराबरीमा पनि उत्तिकै पर्याप्त हुनसक्छ । हारमा भने फेरि गोलअन्तरको समीकरण आउने छ । यति बेला बंगलादेशको पूरा ९ अंक हुनेछ । बाँकी ३ टिम ३–३ अंकको स्थितिमा हुनेछन् ।

त्यसैले नेपालको सम्भावना धेरै हदसम्म पाकिस्तान र भुटानबीचको खेलले तय गर्नेछ । भनिन्छ, फुटबलमा सबै खेलका पटकथा लेखिन्छन् मात्र होइन, आफैं निर्माण पनि हुन सक्छ ।

स्पष्ट भाषामा भन्दा पाकिस्तान र भुटानबीचको खेलको नतिजाले धेरैभन्दा धेरै स्थितिमा नेपाल र बंगलादेशबीचको खेलको नतिजा पनि प्रभावित पार्नेछ । यस्तो हुनैपर्छ भन्ने पनि छैन । फुटबलको इतिहास राम्रै बुझ्नेले यो तथ्य पनि राम्रैसँग बुझ्ने छन् ।

प्रतिद्वन्द्वीका रूपमा बंगलादेश
बंगलादेशविरुद्धको खेलसम्म पुग्नु अगाडि सबैभन्दा पहिले नेपालले खेलेका यसअघिका दुई खेलबारे नै चर्चा गरौं । खेलको स्तर मान्ने हो भने पाकिस्तानी फुटबलमा कुनै दम नै छैन । प्राविधिक रूपमा पाकिस्तानी खेलाडी निकै कमजोर देखिन्छन् ।

आखिरमा पाकिस्तानी प्रशिक्षक जोस एन्टोनियोले पनि मानेका छन्, पाकिस्तानी फुटबलमा धेरै समस्या छन् । खेलाडी पनि आफ्नै एकपछि अर्को समस्याबाट गुज्रिरहेका छन् । आखिरमा साढे दुई वर्षको प्रतिबन्धबाट अन्तर्राष्ट्रिय फुटबलमा फर्केको हो पाकिस्तान ।

पाकिस्तानले यसपल्टको साफ च्याम्पियनसिपबाट केही अपेक्षा राखेको थिएन । तर यही टिमविरुद्ध नेपाल हार्छ भने त्यो टिमले आफ्नै खुट्टामा बन्चरो हानेको न हो । भुटानविरुद्धको खेल भने नेपालका लागि जस नभएको खेल हो ।

जिते पनि जस हुन्न, हारेमा झन ठूलो आलोचना । धन्न, नेपालले भुटानमाथि ४ गोल अन्तरको जित निकाल्न सक्यो । आखिरमा अब यही ४ गोलले समूह लिग चरणको समाप्तिमा नेपाललाई फाइदा गर्न सक्छ ।

बंगलादेश भने पाकिस्तान र भुटानभन्दा ठ्याक्कै फरक छ । भलै उसले पनि दुई जितमा अपेक्षाअनुसार प्रदर्शन गर्न सकेको छैन । साफ च्याम्पियनसिपअगाडि दक्षिण कोरियामा गएर अभ्यास गरेको बंगलादेशले हालैको एसियाली खेलकुदको पुरुष फुटबलमा पनि राम्रो गरेको थियो । तर अहिले साफ च्याम्पियनसिपका उसको अग्रपंक्ति धारिलो देखिएको छैन । बंगलादेशी मिडियाकै गाइँगुइँ सुन्ने हो भने बंगलादेशको प्रदर्शन त नेपाल अगाडि फितलो छ ।

तर प्रशिक्षक जेमी डे भने फरक सोच राख्छन् । उनको भनाइमा टिमले विस्तारै लय समात्ने हो । जति बेला जुन प्रकारको खेल चाहिने हो, त्यसैअनुसार खेल पस्कन आफ्नो टिम माहिर छ ।

यता नेपालका प्रशिक्षक बालगोपाल महर्जनदेखि किरण लिम्बु, अनन्त तामाङ, सुनील बल सबैले एउटै रट लगाइरहेका छन्, हामी बंगलादेशलाई हराउन सक्षम छौं । यसको कारण हो, नेपालले भुटानलाई हराएयता एउटा गति लिएको छ, जुन बंगलादेशविरुद्धको खेलमा पनि रोकिने छैन ।

बंगलादेशी फुटबलबारे राम्रै जानकार प्रशिक्षक महर्जनले भनेका छन्, ‘हाम्रो तुलनामा बंगलादेशी फुटबल धेरै अगाडि छ भन्ने होइन । हामीले यसअघि पनि बंगलादेशलाई हराएका थियौं, अहिले पनि हराउन सक्छौं ।’ साफ च्याम्पियनसिपकै प्रसङ्गमै पनि नेपालले बंगलादेशविरुद्ध ५ खेल खेलेकामा २ नेपालले जितेको छ, तीन उनीहरूले जितेका छन् । यसमा सबैभन्दा ठूलो तथ्य के भने पछिल्ला २ खेल नेपालले लगातार जितेको छ । साफ च्याम्पियनसिपमै अन्तिम पटक नेपालले सन् २०१३ मा बंगलादेशलाई काठमाडौंमा हराएको थियो ।

सबै सम्भावना खुला
यी त भए, सबै कागजी विश्लेषण । खासमा समूह ‘ए’ मा सबै प्रकारको सम्भावना खुला छ, यो नै यो समूहको वास्तविक स्थिति हो । नेपाल र बंगलादेशबीचको खेलको अन्तिम ह्विसल नबजेसम्म पनि यस्तै हुन्छ भनेर ठोकुवा गर्न सकिन्न ।

पाकिस्तानी प्रशिक्षक एन्टोनियोले त्यसैले भनेका छन्, किन कसको सम्भावना बढी छ भनेर चर्चा गर्ने, यो मैदानमा निर्णय हुने हो, त्यसैले मैदानकै खेलका लागि कुरौं । कुरा सही छ । अन्योल र अनिश्चिताले यो समूहलाई साँच्चै रोमाञ्चक मात्र होइन, सनसनीपूर्ण पनि बनाएको छ ।

प्रकाशित : भाद्र २३, २०७५ ०८:०२
ADVERTISEMENT
प्रतिक्रिया
पठाउनुहोस्
ADVERTISEMENT

‘नेपाली क्रिकेटको पोस्टमार्टम जरुरी’

विनोद पाण्डे

काठमाडौँ — नेपालले मलेसियामा बिहीबार सम्पन्न एसिया कप छनोट प्रतियोगितामा निकै निराशाजनक प्रदर्शन गर्‍यो । उपाधि दाबेदारको हिसाबमा मलेसिया भ्रमण गरेको नेपाल ६ राष्ट्रसम्मिलित प्रतियोगितामा चौथो भयो ।

वान–डे अन्तर्राष्ट्रिय मान्यताप्राप्त ताजा राष्ट्र नेपाललाई हङकङ, यूएईसहित ओमानले पनि हरायो । मलेसिया र सिंगापुरजस्ता कमजोर आँकिएका टोलीसँग पनि नेपालको प्रदर्शन सन्तोषजनक थिएन । मलेसियामा सम्पन्न प्रतियोगिता विजेताले एसिया कपमा खेल्न पाउँथ्यो । नेपालले त्यो मौका गुमाउँदा कप्तान पारस खड्का निकै थक्थकाए ।

नेपाली क्रिकेट टोली शुक्रबार मलेसियाबाट फर्किंदा उनले हारको सम्पूर्ण जिम्मेवारी आफूसहित वरिष्ठ खेलाडीले लिएका जनाए । उनै पारसले त्रिभुवन अन्तर्राष्ट्रिय विमानस्थलमा सञ्चारकर्मीसँग एसिया कप छनोटमा गरेको प्रदर्शन र नेपाली क्रिकेटबारे राखेका धारणा :

एउटा टिमको रूपमा हामीले राम्रो प्रदर्शन गर्न सकेनौं । हामी आफैं यो स्विकार्छौ । एउटा कप्तान, एउटा खेलाडीका रूपमा मैले पनि राम्रो खेल्न सकिनँ । टिमका रूपमा पनि हामी आफ्नो स्तरमा रहेनौं । प्रतियोगिताभर हामीले भने जस्तो केही गर्न सकेनौं ।

जुन हिसाबमा तयारी भएको थियो, टिम राम्रै लयमा थियो । यो महत्त्वपूर्ण प्रतियोगिता थियो त्यो हामी सबैलाई थाहा छ । हाम्रो लागि ठूलो अवसर थियो । जुन प्रदर्शन देखाएका छौं, त्यसबाट हामी आफैं निरास छौं ।

ब्याटिङ हाम्रो पहिलादेखिकै समस्या हो । हामीले आफ्नो क्षमताअनुसार ४० प्रतिशत पनि खेल्न सकेनौं । विगतको जस्तो खेल्न सकेको भए नतिजा अर्कै आउँथ्यो होला । एउटा खेलाडीको रूपमा हामीले यो कमजोर प्रदर्शनको जिम्मेवारी लिनुपर्छ, दोष अरुलाई लगाउन मिल्दैन । किन भने नराम्रो खेलेको हामीले नै हो ।

नराम्रो खेलेपछि नराम्रो नतिजा आउनु स्वभाविक नै हो । हामीले जितेका मलेसिया र सिंगापुरसँगको खेलमा पनि राम्रो प्रदर्शन देखाउन सकेनौं । मैले राम्रो खेलेको भए पनि नतिजा सुध्रिन्थ्यो होला । शरद (भेषावकर) भएको भए पनि कथा अर्कै हुनसक्थ्यो होला । तर व्यक्तिगततर्फ भन्दा पनि टिममा केन्द्रित हुन जरुरी छ ।

ब्याटिङ परामर्शदातालाई पनि जम्न ५–६ महिना लाग्छ । हामीले त भ्रमणहरूमा मात्र ल्याइरहेका छौं । त्यसैले अहिलेको नतिजामा उहाँहरूलाई दोष दिन मिल्दैन । हामीले जे जति क्रिकेट खेलिरहेका छौं आफ्नो सहमतिमा, आफूले जे बुझेका छौं, प्रशिक्षकले जे सिकाउनुभएको छ त्यो अनुसार खेलिरहेका छौं ।

अब भविष्यका लागि योजना बनाउनैपर्छ । हारेर आएर भनेको होइन, तर टिमलाई राम्रो वातावरण चाहिएको छ । ट्वान्टी–२० छनोट प्रतियोगिताहरू आइरहेका छन्, त्यसमा विशेषज्ञ प्रशिक्षक तोक्नु जरुरी छ । ४–५ दिनअघि ब्याटिङ परामर्शदाता ल्याएर हुँदैन । एउटा खेलाडीलाई परिवर्तन ल्याउन उहाँलाई पनि कम्तीमा ३ महिना लाग्छ ।

हामीले त्यहाँको स्थिति हेरेर नै खेलिरहेका थियौं, टिमले हार्दा अलिकति फरक देखिएको हुनसक्छ । भएको उत्कृष्ट खेलाडी नै नेपाली टोलीमा थिए । तर नराम्रो प्रदर्शन गरेपछि फरक हिसाबमा हेरिनु स्वभाविक नै हुन्छ । नेपाली क्रिकेटप्रति उच्च आकांक्षा छन्, जुन स्वभाविक नै हो ।

नेपाली प्रशंसकले जहिले पनि हामीलाई नजिकबाट नियालेर समर्थन गर्दै माया गर्नुहुन्छ र हारेको बेला गाली पनि गर्नुहुन्छ । हामी त्यसलाई स्वीकार्न पनि तयार छौं । पुनर्विचार गर्ने बेला आएको छ । व्यक्तिगत रुपमा र टिमको हिसाबमा पनि । ट्रेनिङ मेथोड के कसरी गर्ने, आगामी दिनमा टिमलाई कसरी इम्प्रुभ गराउन सकिन्छ त्यसमा हेर्नुपर्ने हुन्छ ।

जहिले पनि प्रतियोगिता खेल्न गयो । राम्रो भयो भने दुई दिन रमाइलो गर्‍यो बस्यो । भएन भने भएनौं भन्छौं त्यत्तिकैमा सकिन्छ । त्यसैले अब नेपाली क्रिकेटको पोस्टमार्टमजस्तै गर्न जरुरी छ व्यक्तिगत र टिमका रूपमा पनि ।

अहिले हामीले खेल्नै नसकेको हो । रणनीतिक रूपमा पनि हामी चुकेको हुन सक्छौं । आशा छ आगामी दिनमा राम्रो प्रदर्शन लिएर आउने छौं । अझ राम्रो गर्न आईसीसीसमक्ष राम्रो प्रस्ताव गर्न सक्नुपर्छ ।

नेपालले मलेसियामा नकारात्मक क्रिकेट खेलेको होइन । नेपाली क्रिकेटको पछिल्लो १० वर्षको तथ्यांक निकाल्नुभयो भने सधैं यस्तै नै जस्तो छ । तर यो जस्तो महत्त्वपूर्ण प्रतियोगितामा हामीले एउटा टिमका रूपमा खेल्न सकेनौं । डट बल नेपाली क्रिकेटका लागि घात बनिरहेको छ । एउटा खेलाडीका रूपमा सबैले पुस गरिरहेका छन् ।

राम्रै खेल्नैपर्छ भनेर व्यक्तिगत खेलाडीलाई दबाब थियो कि । त्यो अर्को प्रश्न हुनसक्छ । निश्चय पनि डट बल हाम्रो समस्या हो, त्यसलाई सम्बोधन गर्नुपर्छ । पहिला ब्याटिङ कमजोर भन्थ्यौं, तर अहिले बलिङ पनि त्योअनुरुप रहेन । हामीले सोचेजस्तो भएन । यो स्तरमा १–२ जना खेलाडीमा भर परेर म्याच जितिन्न ।

हामी एउटा स्तरमा गएर रोकिएको पो हौं कि । डट बल प्रतिशत, शट मेकिङ, डिसिजन मेकिङ त्यसमा हाम्रो परिपक्वता आएको छैन । यो स्थितिलाई कसरी हटाउन सकिन्छ भनेर हामी आफैंले आफैंलाई पनि प्रश्न गरिरहेका छौं । राम्रो नतिजा ल्याउनु छ भने यो तरिकाले चाहिँ अगाडि बढ्दैन, हामीलाई पनि यो अनुभव भइसक्यो ।

मलाई याद छ सन् २०१५ को विश्वकप छनोटअगाडि हाम्रो तयारी निकै राम्रो थियो । तर प्रतियोगिता निकै निराशाजनक भयो । यो पटक सबैको चासो किन थियो भने एसिया कप थियो, छनोट भए भारत र पाकिस्तानसँग खेल्न पाइन्थ्यो । एसिया कपमा पुग्न नसक्दा जति दु:ख प्रशंसकलाई लागेको छ, त्यति दु:ख हामी खेलाडीलाई पनि लागेको छ ।

किनभने हामीले यस्तो राम्रो अवसर गुमाएका छौं । हरेक दिन सिक्न लागि हुन्छ भने जस्तै अब यसैमा अल्झेर बसिरहनु जरुरी छैन । मौकाहरू अझै छन्, त्यसैले टिमलाई एकजुट बनाएर अगाडि लाने अवसर पनि हो । यो धेरै युवा टोली हो । यसलाई कसरी अगाडि बढाउनुपर्ने भन्ने जिम्मेवारी हामी सबैमा छ ।

अब विश्व ट्वान्टी–२० छनोटलाई अर्को महिनादेखि सुरुआती चरणका खेल खेल्नुपर्छ । खेलाडीहरू त यिनै र अर्को १० जना हुन् । बेन्च स्ट्रेन्थ बनाउन जरुरी छ । प्रतिस्पर्धा धेरै बढेको छ खेलाडीलाई टिममा पर्न । ३–४ वर्ष ५० ओभरको खेलपछि हामी ट्वान्टी–२० को ओभरमा फर्किदैं छौं, हामी यसमा भिज्नुपर्छ पहिला ।

निश्चित खेलाडीलाई एकदिने र ट्वान्टी–२० को भनेर छुटयाउन पनि जरुरी छ । यो सबैका साथै आगामी ८–९ महिनाको कार्यक्रम हामीले बनाएका छौं । त्यो हामी एसीसी र आईसीसीमा पठाउने छौं । त्यहाँबाट स्वीकृतिपछि त्यसलाई प्रयोग गर्नेछौं ।

अर्को छनोट आउँदा हुनसक्छ नेपाली टोलीमा अर्को कप्तान आइसक्नेछ । म त्यसमा सहयोग नै गर्नेछु । १–२ जना कप्तानका रूपमा देखिएका पनि छन् ।

प्रकाशित : भाद्र २३, २०७५ ०७:५९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT