ओसाकालाई पहिलो ग्रान्डस्लाम

एएफपी

न्युयोर्क — जापानकी नाओमी ओसाका अमेरिकी सेरेना विलियम्सलाई यूएस ओपन टेनिसको फाइनलमा सोझो सेटबाट पराजित गर्दै ग्रान्डस्लाम उपाधि जित्ने पहिलो जापानी खेलाडी बनेकी छन् ।

ओसाकाले आदर्श मान्ने सेरेना खेलक्रममा चेयर अम्पायरसँग वादविवादमा उत्रिँदा फाइनल भने खल्लो बन्न पुग्यो । २० वर्षीया ओसाकाले ६–२, ६–४ को जित दर्ता गर्दै सेरेनालाई २४ औं उपाधि जित्नबाट वन्चित गराइन् ।

अम्पायर कार्लोस रामोसले दोस्रो सेटका क्रममा विलियम्सलाई प्रशिक्षण लिएको भन्दै चेतावनी दिएपछि उनी बेखुस देखिएकी थिइन् । विलियम्सले त्यसपछि र्‍याकेट फालेका कारण अम्पायर रामोसले दोस्रो चेतावनीसँगै एक अंक पेनाल्टी लगाएपछि विलियम्स विवादमै उत्रिइन् ।

Yamaha

उनले आँसु झार्दै अम्पायरलाई ‘चोर’ दोषको आरोप लगाइन् र रिसाउँदै माफीसमेत माग्नुपर्ने माग राखिन् । यसलगत्तै रामोसले विलियम्सलाई अपशब्द बोलेको भन्दै एक गेम पेनाल्टी लगाए । नतिजास्वरुप ओसाका ५–३ ले अगाडि रहन पुगिन् । सेरेनाले अर्को गेम जिते पनि परिवर्तनको समय आफ्नो विरोध भने अर्का पदाधिकारीसामुन्ने जारी राखिन् ।

यसका बाबजुत ओसाकाले उत्कृष्ट प्रदर्शन गर्दै राष्ट्रका लागि पहिलो उपाधि जितिन् । ‘अहिले मलाई यो सबै वास्तविक हो जस्तो लागिरहेको छैन । सायद केही दिनमा मैले के गरें भन्ने थाहा पाउँछु होला,’ ओसाकाले भनिन् । उनले कोर्टमा धेरै हल्ला भएको र आफू खेलमा एकीकृत भएका कारण सेरेनाको वादविवादबारे खासै ध्यान नदिएको बताइन् ।

‘मैले उता फर्केर हेर्दा स्कोर ५–३ देखें । त्यो बेलामा म केही अलमलमा परें,’ उनले भनिन्, ‘मलाई खेलमा ध्यान दिनुपर्छ भन्ने लाग्यो । सेरेना एक च्याम्पियन खेलाडी हुन् र उनी कुनै समय पनि खेलमा फर्कन सक्छिन् भन्ने मलाई थाहा थियो ।’

गत सेप्टेम्बरमा छोरी जन्माएपछि विलियम्सको पहिलो ग्रान्डस्लाम जित्ने लक्ष्य पूरा हुन सकेन । उनले समग्रमा २४ औं उपाधि जित्दै मार्गरेट कोर्टको कीर्तिमान बराबरी गर्ने अवसर पनि गुमाइन् । विलियम्सका समर्थनमा रहेका दर्शकले ट्रफी प्रदान गर्ने क्रममा उद्घोषकलाई गिज्याए पनि सेरेनाले ओसाकालाई सम्मान दिन आग्रह गरिन् ।

प्रकाशित : भाद्र २५, २०७५ ०७:५०
प्रतिक्रिया
पठाउनुहोस्
ADVERTISEMENT
ADVERTISEMENT

जोकोभिच र डेल पोट्रो फाइनलमा

यूएस ओपन
एएफपी

न्युयोर्क — डिफेन्डिङ च्याम्पियन तथा विश्व नम्बर एक राफेल नडालले घुँडाको चोटका कारण सेमिफाइनल खेल बीचमै छाडेपछि अर्जेन्टिनाका हुँवा मार्टिन डेल पोट्रो शुक्रबार यूएस ओपन टेनिसको फाइनल पुगेका छन् । उनले उपाधि भिडन्तमा सर्बियाली नोभाक जोकोभिचको सामना गर्नेछन् ।

सन् २००९ मा यस प्रतियोगिताको उपाधि जितेका तेस्रो वरीयताका डेल पोट्रो नाडालले खेल छाड्ने निर्णय लिँदा ७–६ (७/३), ६–२ ले अगाडि थिए । उनले अब दोस्रो उपाधिका लागि दुई पटक उपाधि जितिसकेका जोकोभिचको सामना गर्नेछन् । आठौं पटक फाइनल पुग्ने क्रममा जोकोभिचले जापानका केई निशिकोरीलाई ६–३, ६–४, ६–२ ले पराजित गरे ।

जोकोभिचले डेल पोट्रोविरुद्ध पछिल्लो १० वर्षमा १४ जित र ४ हार बेहोरेका छन् । सन् २००७ र २०१२ को यूएस ओपनमा जोकोभिच सोझो सेटमा विजयी रहेका थिए । ‘हामी पहिलोपल्ट ग्रान्डस्लाम फाइनलमा प्रतिस्पर्धा गर्दै छौं । म उनलाई एक खेलाडी र व्यक्तित्वको रूपमा धेरै सम्मान गर्छु । उनी निकै राम्रा मान्छे हुन्,’ चोटका कारण सन् २०१७ को प्रतियोगिता गुमाएका जोकोभिचले भने, ‘उनलाई विगतमा चोटले धेरै सताएको छ । तर मुख्य खेलमा उनले निकै राम्रो प्रदर्शन गर्छन् ।’

चोटका कारण खेल छाड्नुपरेका नडालले आफू दुखित भए पनि चोट ठूलो नभएको बताए । ‘मलाई यसरी चोट लगेर खेल छाड्नुपर्दा एकदम दु:ख लाग्छ,’ घुँडाको चोटले करिअरभर समस्या भोगेका नाडालले भने । उनले जनवरीमा भएको अस्ट्रेलियन ओपनको क्वाटरफाइनलमा पनि मारिन सिलिचविरुद्ध पाँचौं सेटमा चोटका कारण खेल छाडेका थिए । ‘जब कोर्टमा एक खेलाडी खेल्छन् र अर्को खेलाडी छेउमा स्वास्थ्य परीक्षण गरिरहेको हुन्छ भने त्यो टेनिस खेल हुन सक्दैन,’ नडालले थपे ।

यूएस ओपनको चौथो तथा समग्रमा १८ औं ग्रान्डस्लाम उपाधि पछयाइरहेका नडालले सेमिफाइनलसम्म आइपुग्दा १६ घण्टा कोर्टमा बिताए । क्वाटरफाइनलमा डोमिनिक थिएमलाई पराजित गर्न उनलाई ५ घण्टा लागेको थियो । शुक्रबार पनि उनले दायाँ घुँडामा दुई पटक ब्यान्डेज लगाए । दोस्रो सेटको समाप्तिपछि भने उनले निरन्तरता दिन नसक्ने भन्दै खेल छाडे । ‘यसरी खेल जित्न पक्कै खुसी लाग्दैन । मलाई नडालसँग खेल्न मनपर्छ । उनी खेलमा योद्धा जसरी उत्रन्छन् र उनलाई पीडामा देख्न कठिन हुन्छ,’ दोस्रोपल्ट ग्रान्डस्लाम फाइनल खेल्न लागेका २९ वर्षीय डेल पोट्रोले भने ।

‘फेरि एकपटक फाइनल पुग्नु मेरा लागि धेरै ठूलो सफलता हो,’ नडालविरुद्ध छैटौं जित दर्ता गर्दै डेल पोट्रोले भने, ‘मैले अर्को फाइनल खेल्छु भन्ने अपेक्षा गरेको थिइनँ । सन् २००९ मा नडाल र फेडेररलाई पराजित गर्दै उपाधि जित्दा म सानै थिएँ । अहिले बुढो भएको छु ।’

विम्बल्डन उपाधि जितेका जोकोभिचले ११ औं पटक यूएस ओपन सेमिफाइनल खेल्ने क्रममा निशिकोरीविरुद्ध १७ खेलमा १५ औं जित दर्ता गरे । ३१ वर्षीय जोकोभिचले १४ औं उपाधि पछ्याउने क्रममा सहज जित पाए । उनले यस उपाधि जितेमा सर्वा्धिक ग्रान्डस्लाम उपाधि जित्ने सूचीमा अमेरिकी पिट साम्प्राससँग बराबरी गर्नेछन् ।

प्रकाशित : भाद्र २४, २०७५ ०८:५८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT