सन्दीप अफगान प्रिमियर लिगमा

१५ हजार डलर पाउने 
कान्तिपुर संवाददाता

काठमाडौँ — नेपाली युवा स्टार सन्दीप लामिछानेले अफगानिस्तान प्रिमियर लिग (एपीएल) मा खेल्ने भएका छन् । सोमबार यूएईको दुबईमा भएको ड्राफ्टमा सन्दीपलाई ५ मध्ये एक फ्रेन्चाइज टोली नान्गरहरले एसोसिएट खेलाडीका रूपमा लिएको थियो । 

सन्दीपको नाम सिल्भर खेलाडीमा रहे पनि त्यसमा उनीमाथि भाउ लागेको थिएन । त्यसपछि आएको एसोसिएटको सूचीमा उनलाई रायन टेन डेस्काथेपछि दोस्रो नम्बरमा ५ सेकेन्डभित्र लिइएको थियो । एसोसिएट खेलाडीका रूपमा खेल्न लागेकाले सन्दीपले १५ हजार डलर पारिश्रमिक पाउने छन् ।

Yamaha

सन्दीपले आफ्नो एजेन्टमार्फत एपीएलमा दर्ता गरेका थिए । एपीएलको ड्राफ्टमा पर्नका लागि एजेन्ट वा सम्बन्धित देशको बोर्डको सिफारिस लिनुपर्ने हुन्छ । नेपालका कप्तान पारस खडा र अर्का अलराउन्डर सोमपाल कामी पनि सोमबारको ड्राफ्टमा रहेका थिए । तर दुवै खेलाडीमा भाउ लागेन । सन्दीपले चौथो फ्रेन्चाइज लिग खेल्न लागेका हुन् ।

नेदरल्यान्ड्सका डेस्काथेलाई बाल्खले लिएको छ । यूएईका तीव्र बलर मोहम्मद नावेदलाई कान्दहरले, स्कटल्यान्डका कालुम म्याकलोइडलाई पाकटिआले र मोहम्मद अस्घर होटाकलाई काबुलले लिएको हो । अक्टोबर ५ देखि २१ सम्म यूएईको शारजहाँमा हुने एपीएलमा यिनै ५ फ्रेन्चाइज टोलीले प्रतिस्पर्धा गर्दै छन् ।

सन्दीपको टोलीमा वेस्ट इन्डिजका आन्द्रे रसेल आइकन खेलाडीमा रहेका छन् । त्यस्तै अस्ट्रलियाका बेन कटिङसहित मुस्ताफिजुर रहमान, तमिम इकबाल, मोहम्मद हफिज, मिचेल म्याकघालेन जस्ता खेलाडीले सन्दीपसँगै नान्गरहरबाट एपीएलमा खेल्ने छन् । टोलीमा रहेका अफगानी खेलाडीमा मुजिवर रहमानलगायत छन् ।

सन्दीपले यसअघि दिल्ली डेयरडेभिल्सबाट इन्डियन प्रिमियर लिग, मोन्ट्रियल टाइगर्सबाट ग्लोबल ट्वान्टी–२० क्यानडा लिग र हालै सेन्ट किट्स एन्ड नेभिस प्याट्रिएट्सबाट क्यारेबियन प्रिमियर लिगमा खेलेका थिए ।

प्रकाशित : भाद्र २५, २०७५ २१:५०
ADVERTISEMENT
प्रतिक्रिया
पठाउनुहोस्
ADVERTISEMENT

न्यूयोर्कमा आदिवासी चलचित्र महोत्सवको तयारी पुरा

कान्तिपुर संवाददाता

न्यूयोर्क — नेपाल आदिवासी जनजाति महासंघ (फिप्ना) ले यही सेप्टेम्बर १५ र १६ मा आयोजना गर्न लागेको दोश्रो आदिवासी चलचित्र महोत्सव र निफ्फ अवार्ड २०१८ को सम्पूर्ण तयारी पूरा भएको जनाएको छ ।

फिप्नाले न्यूयोर्कको ज्याक्सन हाइटमा अवस्थित मुस्ताङ किदुगको कार्यालयमा पत्रकार सम्मेलन गरी महोत्सवको तयारी पूरा भएको जानकारी दिएको हो ।

महोत्सव संयोजक एवं फिप्नाका वरिष्ठ उपाध्यक्ष राजकुमार विष्टले नेपालको आदिवासी जनजातिहरुको भाषा, धर्म, संस्कार, संस्कृति र रितिरिवाजहरुको संरक्षण, संर्द्धन र प्रवर्द्धन गर्ने उदेश्यले महोत्सवको आयोजना गर्न लागेको बताए । महोत्सवले आदिवासी जनजातिहरुको चलचित्रको विकास र बजार प्रवर्धन गराउन मद्दत पुर्याउने फिप्नाका अध्यक्ष मान रानामगरको भनाई छ । आदिवासी चलचित्रकर्मीहरुलाई मुलधारको चलचित्र क्षेत्रमा स्थापित गराउन सहयोग र प्रोत्साहन गर्न तथा आदिवासीहरुको संस्कार र संस्कृतिलाई लिपीवद्ध गर्न सहयोग पुग्ने आयोजकको विश्वास छ ।

न्यूयोर्कको क्वीन्समा अवस्थित गुल्सन टेरेशमा २ दिनसम्म चल्ने महोत्सवमा आदिवासी जनजातिहरुको भाषा, धर्म, संस्कृति र रितिरिवाजमा आधारित रहेर बनाइएका ९ वटा चलचित्र, ३ वटा छोटो चलचित्र, २ वटा वृत्तचित्र र छनौटमा नपरेका विभिन्न समुदायको छोटो चलचित्रको विशेष प्रदर्शन गरिने आयोजकले जनाएको छ । महासंघले प्रारम्भिक चरणमा चलचित्र छनौटका लागि आदिवासी चलचित्र महासंघ नेपालका अध्यक्ष अमृत सुनुवारको संयोजकत्वमा ५ सदस्यीय प्रारम्भिक छनौट समिति गठन गरेको थियो ।
त्यसमा सुनुवारसहित अनिल बुढा, श्रीजना सुब्बा, अरुण प्रधान, भुपेन्द्र गुरुङ रहेका समितिले पहिलो चरणमा पूर्ण तथा छोटो चलचित्र र वृत्तचित्र गरी ४६ वटा मध्ये २४ वटा छनौट गरेर पठाएको जनाएको छ ।

प्रकाशित : भाद्र २५, २०७५ २१:३३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT