खुश्बुलाई एएफसीको अवार्ड

कान्तिपुर संवाददाता

काठमाडौँ — एसियाली फुटबल महासंघ (एएफसी) ले सेल्टर नेपालकी अध्यक्ष खुश्बु ओलीलाई एएफसी ड्रिम अवार्ड २०१८ प्रदान गरेको छ ।

बुधबार मलेसियाको क्वालालम्पुरस्थित एएफसी मुख्यालयमा आयोजित एएफसीको सामाजिक उत्तरदायित्व सम्मेलनमा खुश्बुलाई उक्त अवार्ड प्रदान गरिएको हो । एएफसीले प्रत्येक वर्ष तीन विधाअन्तर्गत कर्पोरेट, नन–गभर्नमेन्ट अर्गनाइजेसन (एनजीओ) र व्यक्तिगततर्फ यो अवार्ड प्रदान गर्दै आएको छ । एएफपीले फुटबलसँगै समाजमा उदाहरणीय कार्य गरेका व्यक्ति र संंस्थालाई यो अवार्ड दिन गर्दछ ।


खुश्बुले व्यक्तिगत विधाअन्तर्गत अवार्ड पाएकी हुन् । अवार्डका लागि अखिल नेपाल फुटबल संघ (एन्फा) ले एएफसीमा सिफारिस गरेको थियो । सडक बालबालिकाका लागि आश्रय दिँदै आएकी खुश्बुलाई एएफसीको सामाजिक उत्तरदायित्व कमिटीका अध्यक्ष अहमद इद एल हर्बीले अवार्ड प्रदान गरे । खुश्बुले अवार्डसँगै १० हजार अमेरिकी डलर प्राप्त गरेकी छन् ।

Yamaha


सेल्टर नेपालले सडक बालबालिकालाई फुटबलको माध्यमबाट विभिन्न कार्यक्रमसमेत जोडेको थियो । सेल्टरको व्यवस्थापनमा सडक बालबालिकाको फुटबल लिगसमेत भएको थियो । सेल्टरले सडक बालिकाकै फुटबल टिम बनाएर स्ट्रिट चाइल्ड वल्र्डकपमा समेत सहभागी गराएको थियो । जुन रुस विश्वकपका क्रममा रुसमै आयोजना भएको थियो ।


कर्पोरेटतर्फको अवार्ड जुरिच मलेसिया तथा वल्र्ड भिजन मलेसिया फाउन्डेसनले पायो भने एनजीओतर्फ इन्डोचाइना स्टारफिस फाउन्डेसन (आईएसएफ) अवार्ड जित्न सफल भयो ।

प्रकाशित : भाद्र २८, २०७५ ०७:३६
ADVERTISEMENT
ADVERTISEMENT
प्रतिक्रिया
पठाउनुहोस्

उपाधि रक्षामा भारत

कान्तिपुर संवाददाता

ढाका — पछिल्लो संस्करणको उपाधि घरेलु मैदानमा जितेको भारतले साफ च्याम्पियनसिप उपाधि रक्षाका लागि माल्दिभ्सको सामना गर्ने भएको छ ।

बुधबार दोस्रो सेमिफाइनलमा भारतले पाकिस्तानलाई ३–१ ले पराजित गर्दै फाइनलमा स्थान बनायो । भारतको जितमा मनवीर सिंहले दुई र सुमित पास्सीले एक गोल गरे ।


निकै प्रतिस्पर्धात्मक खेलमा भारतले दोस्रो हाफमा तीन गोल गरेको हो । पाकिस्तानले पनि पाएको अवसर सदुपयोग गर्न नसक्दा अग्रता लिन सकेन । टोलीका लागि हसान बसिरले गरेको गोल सान्त्वना बन्यो ।


खेलको अन्त्यतिर पाकिस्तानका मोहसेन अली र भारतका लाल छाङते रातो कार्ड खाँदै बाहिरिए । छाङतेले शनिबार हुने फाइनल गुमाउने छन् । भारतको ११ औं फाइनलयात्रा हो । भारतले सात पटक उपाधि जितेको छ । अर्को फाइनलिस्ट माल्दिभ्स पाँचौ पटक फाइनल पुगेको हो । सन् २००८ मा माल्दिभ्सले भारतलाई हराउँदै एकमात्र उपाधि जितेको थियो ।

प्रकाशित : भाद्र २८, २०७५ ०७:३४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT