उपाधि रक्षामा भारत

कान्तिपुर संवाददाता

ढाका — पछिल्लो संस्करणको उपाधि घरेलु मैदानमा जितेको भारतले साफ च्याम्पियनसिप उपाधि रक्षाका लागि माल्दिभ्सको सामना गर्ने भएको छ ।

बुधबार दोस्रो सेमिफाइनलमा भारतले पाकिस्तानलाई ३–१ ले पराजित गर्दै फाइनलमा स्थान बनायो । भारतको जितमा मनवीर सिंहले दुई र सुमित पास्सीले एक गोल गरे ।


निकै प्रतिस्पर्धात्मक खेलमा भारतले दोस्रो हाफमा तीन गोल गरेको हो । पाकिस्तानले पनि पाएको अवसर सदुपयोग गर्न नसक्दा अग्रता लिन सकेन । टोलीका लागि हसान बसिरले गरेको गोल सान्त्वना बन्यो ।

Yamaha


खेलको अन्त्यतिर पाकिस्तानका मोहसेन अली र भारतका लाल छाङते रातो कार्ड खाँदै बाहिरिए । छाङतेले शनिबार हुने फाइनल गुमाउने छन् । भारतको ११ औं फाइनलयात्रा हो । भारतले सात पटक उपाधि जितेको छ । अर्को फाइनलिस्ट माल्दिभ्स पाँचौ पटक फाइनल पुगेको हो । सन् २००८ मा माल्दिभ्सले भारतलाई हराउँदै एकमात्र उपाधि जितेको थियो ।

Esewa Pasal

प्रकाशित : भाद्र २८, २०७५ ०७:३४
ADVERTISEMENT
प्रतिक्रिया
पठाउनुहोस्
ADVERTISEMENT

नेपाली यू–१९ को हार

कान्तिपुर संवाददाता

काठमाडौँ — नेपाली यू–१९ क्रिकेट टोलीले चार टिमसम्मिलित यू–१९ क्रिकेट प्रतियोगिताको सुरुआत पराजयबाट गरेको छ । नेपाल यू–१९ टोली बुधबार भारत यू–१९ ‘बी’ सँग ४० रनले पराजित भयो ।

चार टिमका कप्तानहरू ट्रफीका साथ पोज दिँदै । तस्बिर : बीसीसीआई

भारतीय क्रिकेट बोर्डको आयोजनामा लखनउको इकाना अन्तर्राष्ट्रिय रंगशालाको दोस्रो मैदानमा भएको खेलमा नेपालले टस जितेपछि ब्याटिङ गरेको भारत यू–१९ ‘बी’ निर्धारित ५० ओभर पूरा खेल्नु एक ओभरअगाडि १ सय ६१ रनमा अलआउट भयो । जवाफमा नेपाल यू–१९ केवल ४१.३ ओभरमा १ सय २१ रनमा अलआउट भयो ।


तल्लोक्रममा कमलसिंह ऐरीले २७ बलमा बनाएको २२ रनमा नेपालको स्कोर हेर्नलायक बनेको थियो । दुई छक्का प्रहार गरेका उनी आउट हुने अन्तिम ब्याट्सम्यान थिए । ओपनरद्वय तृतराज दास र रवि शाह समान ८ रनमै आउट भए । विपिन रावल २ र सन्दीप जोरा ४ रनमै आउट भएपछि नेपाल १६ औं ओभरमा २८–४ को स्थितिमा पुगेको थियो ।


कप्तान आशिफ शेख र भीम सार्कीले पाँचौं विकेटमा ३८ रनको साझेदारी गरी नेपाललाई केही आस देखाए । ४० बलमा ३ चौका प्रहार गरी आशिफ १७ रन बनाई आउट भए । भीमले ३० रन जोडे । उनले ५७ बल खेली ४ चौका प्रहार गरे । पवन सर्राफले १२ रन बनाए । शम्साद आलम शून्य, किशोर महतो ६ रनमा आउट भएसँगै नेपालको हार निश्चित भयो । सागर ढकाल १ रनमा नटआउट रहे । भारत यू–१९ ‘बी’ का सुभाङ हेगदेले १० ओभरमा १ मेडन राख्दै २९ र पंकज यादवले १० ओभरमा १ मेडन राख्दै २२ रन खर्चेर समान ३ विकेट लिए ।


यसअघि नेपाली बलरले भारतीय ब्याट्सम्यानलाई नियन्त्रणमा राखेका थिए । तर ब्याटिङमा त्यसको फाइदा उठाउन सकेन । भारत यू–१९ ‘बी’ बाट कामरन इकवालले सर्वाधिक ५० रन बनाए । ओपनर इकवालले ५६ बल खेली ५ चौका र २ छक्का प्रहार गरी पवनद्वारा बोल्ड भए । त्यसपछि बढी रन हान्नेमा ऋषभ चौहान थिए । उनले १९ रन बनाएका थिए ।


ओपनिङ बलर कमलले ३ विकेट लिए । तीव्र गतिका उनले १० ओभरमा २ मेडन राख्दै ३१ रन खर्चे । पवनले १० ओभरमा ३१ रन नै खर्चेर २ विकेट लिए । किशोर, शम्साद र सागरले १–१ विकेट लिए । नेपालले शुक्रबार भारत यू–१९ ‘ए’ सँग शुक्रबार प्रतियोगिताको दोस्रो खेल खेल्नेछ ।

इकाना अन्तर्राष्ट्रिय रंगशालाको मुख्य मैदानमा भएको दिनको अर्को खेलमा भारत यू–१९ ले अफगानिस्तान यू–१९ लाई १ सय ४० रनले पराजित गरेको छ । प्रभसिमरन सिंहको १ सय ४, पवन शाहको ६७ र आयुष बोदनीको ५२ रनमा भारत यू–१९ ‘ए’ ले पहिला ब्याटिङ गर्दै ८ विकेट गुमाई ३ सय २८ रन बनायो । अफगानिस्तान यू–१९ जवाफमा ४६.५ ओभरमै १ सय ८८ रनमा अलआउट भयो ।

प्रकाशित : भाद्र २८, २०७५ ०७:३३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT