यू–१९ मा चार खेलाडी परिवर्तन

राष्ट्रिय टोलीबाट खेल्दै आएका ब्याट्सम्यान रोहित पौडेलसहित माथिल्लोक्रमका ब्याट्सम्यान रवीन्द्रजंग शाही, देव्रेहाते स्पिनर सूर्य तामाङ र मध्यम गतिका बलर नन्दन यादव यू–१९ टोलीमा समावेश भएका छन् । भारतमा अघिल्लो साता सम्पन्न चार टिमसम्मिलित यू–१९ क्रिकेट प्रतियोगिताबाट किशोर महतो, लोकेश बम, शम्साद आलम र विपिन रावललाई परिवर्तन गर्दै उनीहरूलाई समावेश गरिएको हो ।

आशिफ शेखको कप्तानीमा रहने टोलीका अन्य खेलाडीमा कमलसिंह ऐरी, रवि शाह, रित गौतम, पवन सर्राफ, रशिद खान, भीम शार्की, तृतराज दास, सन्दीप जोरा, सागर ढकाल र अरुण ऐरी छन् । नेपाली टोलीका प्रशिक्षकमा विनोद दास, सहायक प्रशिक्षकमा मनोज कटुवाल, व्यवस्थापकमा शक्ति गौचन र फिजियोमा विक्रम न्यौपाने छन् ।

प्रशिक्षक विनोदसहित सुनोज भट्टराई र राजु खड्का रहेको छनोट समितिले खेलाडी छानेको हो । प्रशिक्षक दासले अरु खेलाडीलाई पनि अवसर दिन खोजेकाले केही परिवर्तन गरिएको बताए । उनले सन् २०१९ मा हुने यू–१९ विश्वकप छनोटको तयारीका लागि सबै खेलाडीलाई अवसर दिँदै नियाल्नु आवश्यक रहेको बताए । यू–१९ एसिया कपका लागि नेपाली टोली बिहीबार बंगलादेश जानेछ ।