ए डिभिजन लिग : मनाङको तीन गोल

कान्तिपुर संवाददाता

काठमाडौँ — माथिल्लो श्रेणीमा आठ वर्षपछि फर्किएको ब्रिगेड ब्वाइज क्लबले शुक्रबार सहिद स्मारक ‘ए’ डिभिजन लिग २०७५ मा सनसनीपूर्ण सुरुआत गर्‍यो ।

उसले रजत तिवारीको उत्कृष्ट गोलसँगै २८ औं मिनेटमै अग्रता लियो । तर, त्यो गोल डिफेन्डिङ च्याम्पियन मनाङ मस्र्याङदीलाई रोकेर स्तब्ध पार्न पर्याप्त भएन । दोस्रो हाफमा आक्रामक खेल्दै मनाङले तीन गोल गरेर ३ अंकसहित उपाधि रक्षाको अभियान थालेको छ ।

Yamaha

ब्रिगेड ब्वाइज राजधानीको ए डिभिजन लिगबाट २०६८ सालमा स्वयम्भू, युनाइटेड र कोइलापानीसँगै रेलिगेसनमा परेको थियो । चार वर्षपछि बढुवा हासिल गर्दै ब्रिगेड ब्वाइज ए डिभिजनमा फर्किएको थियो । तर, २०७० सालपछि ए डिभिजन लिग यसैपालि पुन: सुचारु भयो । त्यसैले मनाङलाई उपाधि रक्षाको अभियान थाल्न ५ वर्ष प्रतीक्षा गर्नुपर्‍यो भने ब्रिगेड ब्वाइजले पनि फेरि माथिल्लो श्रेणीको लिग खेल्न तीन वर्ष धैर्य गर्नुपर्‍यो ।

मिडफिल्डर रजतले करिब २८ यार्डबाट प्रहार गरेको बलले लोभलाग्दो गोलको रूप लिएपछि ब्रिगेड ब्वाइजले अविश्वसनीय अग्रता लिएको थियो । त्यसमा मनाङका गोलकिपर विशाल राईको केही सीप चलेन । पहिलो हाफमा ललितपुरे टिमले खुलेरै खेल्यो । केही अवसर पनि बनायो । तर गोल थप्न भने सकेन । स्टार खेलाडीले भरिएको र दुई अफ्रिकी फरवार्डको साथ पाएको मनाङले भने सातदोबाटोस्थित एन्फा कम्प्लेक्समा स्वाभाविक खेल देखाउन सकेन । त्यसैले पहिलो हाफमा ब्रिगेड ब्वाइज १–० ले अगाडि रह्यो ।

दोस्रो हाफको पहिलो मिनेटमै मिडफिल्डर हेमन गुरुङ सफल रहे । उनले करिब ३८ यार्डबाट प्रहार गरेको बलले ‘डिफ्लेक्ट’ हुँदै जाली चुम्न पुगेपछि मनाङ १–१ को बराबरीमा पुगेको थियो । त्यसपछि ब्रिगेड ब्वाइजले रक्षात्मक रणनीति अंगाल्यो र मनाङ आक्रामक देखियो । हेमन, विशाल राईले नरन्तर अवसर पनि सिर्जना गरे । तर, अफ्रिकी मूलका फरवार्डद्वय ओलावाले आफिज र एडेलेजा सोमिडेको ‘फिनिसिङ’ सन्तोषजनक रहेन ।

विगतमा पनि सहिद स्मारक ए डिभिजन लिगमा प्रभावशाली प्रदर्शन गरिसकेका फरवार्ड आफिजले ५७ औं मिनेटमा डिफेन्डर प्रवेश कुँवरले क्लियर गरेको बललाई ‘सेकेन्ड बार’ च्याप्दै गोलमा परिणत गरेपछि मनाङले २–१ को अग्रता लियो ।

उनले इन्ज्युरी समयको तेस्रो मिनेटमा व्यक्तिगत दोस्रो गोल गर्दै मनाङको जित पक्का गरे । त्यो गोल ब्रिगेड ब्वाइजमा सब्स्टिच्युट गोलकिपर लक्की कार्कीको गम्भीर भूलमा सम्भव भएको थियो । हेमनको प्रहारमा बल पञ्च गर्दा पहिलो रोजाइका गोलकिपर सागर राय घाइते भएपछि लक्कीले गोलपोस्ट सम्हाल्ने अवसर पाएका थिए ।

‘प्रदर्शन सोचेअनुसार भएन,’ मनाङका प्रशिक्षक सुमन श्रेष्ठले भने, ‘अझै सेट (टिम) नमिलेजस्तो महसुस भयो । मनाङको पहिलो खेल यस्तै भइरहेको छ ।’

प्राविधिक कारण नाइजेरियाली प्रशिक्षक तोपे फुजाको अनुपस्थितिमा ‘टचलाइन’ सम्हाल्ने अवसर पाएका उनले थपे, ‘३–४ गोलले सजिलै जित्ने सोचेको थिएँ तर गाह्रै भयो । सेन्टर मिडफिल्डर चलेनन् । दुवै विदेशी फरवार्डले पनि सोचेजस्तो खेलेनन् । दोस्रो हाफमा ब्रिगेड ब्वाइजले रक्षात्मक खेल्दा हामीलाई सजिलो भयो ।’ विराज महर्जनसहित केही खेलाडी चोटग्रस्त भएकाले डिफेन्समा गाह्रो भएको पनि उनले बताए ।

ब्रिगेड ब्वाइजका प्रशिक्षक उज्जन श्रेष्ठले भने, पराजित भए पनि टिमको प्रशंसा गरे । ‘तीन–चार सिनियर खेलाडी भए पनि अरु सबै यू–१७ हुन् । यस्तो टिमले पनि मनाङसँग राम्रो खेल्यो । दोस्रो हाफमा १० मिनेट रोक्न सकेको भए अझ राम्रो हुन्थ्यो ।’ रक्षात्मक खेलमा जोड दिएका उनले खेलाडीमा अनुभवको कमी देखेको पनि बताए ।

दिनको पहिलो खेलमा हिमालयन शेर्पा र एपीएफ क्लबले गोलरहित बराबरी नतिजा निकाले । दुवै टिमको प्रदर्शन फितलो हुँदा खेल निरासाजनक बनेको थियो । मनाङ र ब्रिगेड ब्वाइजको खेलसँगै यो सिजन पहिलो चरणको खेल पूरा भयो । पहिलो खेल जिते पनि गोलअन्तरका आधारमा संकटा, थ्रीस्टार, पुलिसलाई उछिन्दै मनाङ शीर्षस्थानमा रह्यो । ‘दसैं ब्रेक’ पछि लिगको दोस्रो चरण सुचारु हुनेछ ।

हिमालयन शेर्पा ०–० एपीएफ
ब्रिगेड ब्वाइज १–३ मनाङ

प्रकाशित : आश्विन २६, २०७५ २०:५२
ADVERTISEMENT
प्रतिक्रिया
पठाउनुहोस्
ADVERTISEMENT

गाउँपालिकाबाट शिक्षक ‘लाइसेन्स’

अनिश तिवारी

सिन्धुपाल्चोक — जुगल गाउँपालिकाले शिक्षकहरूलाई अस्थायी ‘लाइसेन्स’ दिने निर्णय गरेको छ । शैक्षिक गतिविधिलाई भरपर्दो बनाउनका लागि जुगल गापाले अस्थायी माध्यमिक र आधारभूत तहको अध्यापन अनुमतिपत्रको व्यवस्था गरेको हो । 

गाउँपालिकामा मात्रै लागू हुनेगरी लामो समयदेखि परीक्षा नभएको हुनाले विज्ञान, गणित, अंग्रेजीजस्ता विषयमा शिक्षक जनशक्ति पाउन गाह्रो भएकाले यस्तो निर्णय गरिएको जुगल गाउँपालिका प्रमुख होमनारायण श्रेष्ठले बताए । जुगलले दुई दिनअगाडि बैठक बसेर प्रक्रियासहित निर्णय गरेको हो ।

‘सरकारको तालिमप्राप्त मात्रैको स्थायी प्रवेशको शैक्षिक प्रावधानलाई सम्मान गर्छौं,’ प्रमुख श्रेष्ठले भने, ‘तर सहज र व्यवस्थित बनाउन लामो छलफलपछि गाउँपालिकाबाट यस्तो निर्णय गरेका हौं ।’ यसअघि विभिन्न नमुना निर्णय गरिसकेको गाउँपालिकाले शिक्षा विशेषज्ञ ल्याएर तालिमप्राप्तलाई गाउँपालिकाले परीक्षा लिने उनले जनाए ।

‘त्यहाँ उत्तीर्ण भएकाले अस्थायी लाइसेन्स पाउनेछन्,’ उनले भने । दुर्गम भेगमा रहेका विद्यालयमा परेको शैक्षिक समस्या र शिक्षकले भोग्नुपरेको निर्णयसम्बन्धी व्यवधानलाई समाधान गर्न यस्तो अभियान ल्याइएको उनको कथन छ ।

शिक्षामा अब्बल बनाउन र विद्यालयलाई नयाँ आयम दिन अभियान सुरु गरिसकेको उनको भनाइ छ । आधारभूत र माध्यमिक तहको परीक्षा गाउँपालिकाले लिइसकेपछि सफल भएकाले गाउँपालिकाबाटै लाइसेन्स पाउनेछन् । यो सरकारी अध्यापन अनुमति पत्र बराबरकै हुने उनले प्रष्ट्याए ।

अस्थायी शिक्षकका लागि सञ्चय कोषको व्यवस्था गरेको गाउँपालिकाले विद्युतीय हाजिरी र मल्टिमिडिया प्रविधिबाट अध्यापन गराइरहेको वडाध्यक्ष सनत अधिकारीले बताए । ‘शिक्षाको सुधारक लागि तत्पर भएर लागिरहेका छौं,’ उनले भने ।

प्रकाशित : आश्विन २६, २०७५ २०:४८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT