‘हाइअल्टिच्युड’ खेलस्थलका लागि अध्ययन

प्रकाश बराल

बागलुङ — ढोरपाटन शिकार आरक्ष नजिकैको ठूलो मैदानमा ‘हाइअल्टिच्युड ट्रेनिङ सेन्टर’ निर्माण गरिने भएको छ । युवा तथा खेलकुद मन्त्रालय र राष्ट्रिय खेलकुद परिषद्ले उक्त क्षेत्रमा सबै प्रकारका खेलकुदको प्रशिक्षण गर्न मिल्ने गरेर केन्द्र बनाउन अध्ययन थालेको हो ।

जिल्ला खेलकुद विकास समिति र पश्चिमाञ्चल खेलकुद विकास समितिका पदाधिकारी समेतको सहभागितामा परिषदले प्रारम्भिक अध्ययन गरेको छ ।

Yamaha


कम्तीमा एक सय रोपनी जमिन उपलब्ध गराउने कामका लागि मन्त्रालय र परिषद्ले जिल्ला खेलकुद विकास समितिलाई आग्रह गरेको छ । त्यसका लागि समितिले अध्ययन गरेर सरोकारवालासँग छलफल गरिसकेको अध्यक्ष धनबहादुर परियारले बताए । अवलोकनका लागि परिषदले इन्जिनियर प्रनिश ताम्राकारको नेतृत्वमा प्राविधिक पनि खटाएको थियो । ‘हामीले पहिलो अध्ययनमा आवश्यक जग्गा उपलब्ध गर्न दुई ठाउँ छनोट गरिसकेका छौं,’ अध्यक्ष परियारले भने, ‘आवश्यक पूर्वाधार बनाउन सकियो भने नेपालकै उत्कृष्ट खेलगन्तव्य हुनेछ ।’ यहाँ अन्तर्राष्ट्रिय मापदण्डअनुसारको फुटबल मैदान र सुविधासम्पन्न कभर्डहल निर्माण गर्ने मन्त्रालयको योजना छ ।

कभर्डहलमा ‘इन्डोर’ खेलहरू सञ्चालन हुनेछन् भने मैदानमा क्रिकेट, फुटबल र अन्य खेलको अभ्यास र राष्ट्रिय प्रतियोगिता गर्न सकिन्छ । विस्तृत अध्ययनका लागि मन्त्रालयले चालु वर्ष ३० लाख रुपैयाँको बजेट पनि विनियोजन गरेको छ । केही वर्षअघि महावीर पुनले पनि यो क्षेत्रको अध्ययन गरेर शीतकालीन ओलम्पिकका लागि मैदान निर्माण गर्न सकिने प्रतिवेदन सरकारलाई पेश गरेका थिए । समितिले पनि उत्तरगंगा नजिकैको एक स्थान र छेन्टुङको अर्को मैदानलाई सिफारिस गरेको हो ।

केही भाग आरक्षभित्र पर्छ भने केही स्थान सार्वजनिक जमिन छन् । ‘राष्ट्रिय महत्त्वकै काम गर्ने हो भने सार्वजनिक जमिन उपयोग गर्न सकिन्छ,’ पश्चिमाञ्चल खेलकुद विकास समितिका कार्यवाहक अध्यक्ष सम्पन्न श्रेष्ठले भने, ‘यो मैदान बनाउन सक्दा देशकै पहिचान बढ्नेछ ।’ ढोरपाटनमा अहिलेसम्म शिकारका लागि विदेशी शिकारी आउने गर्छन् । खेल मैदान बनाएमा संसारभरका खेलाडीले अभ्यासका लागि आउने वातावरण बन्ने उनले बताए ।

जग्गा छनोट गरेपछि मैदानका लागि डीपीआर बनाउने काम सुरु हुने जिल्ला खेलकुद अध्यक्ष परियारले बताए । त्यसका लागि प्राविधिक रूपमा माटो परीक्षण गर्ने काम समेत गरिने छ । ढोरपाटन सालझण्डी सडक निर्माणाधीन भएकाले ढोरपाटन पुग्न अझै सहज छैन । यो सडक छिटो निर्माण गरेर सहज आउजाउ बनाएपछि निर्माणले गति लिने उनले बताए । यो क्षेत्रलाई संघीय सरकारले पर्यटकीय गन्तव्य निर्माण गर्ने सूचीमा पनि सूचीकृत गरेको छ । हाल आन्तरिक पर्यटक समेत बढ्न थालेकाले सहज सडक र होटल निर्माण भएमा आकर्षक खेल र पर्यटकको गन्तव्य हुने उनले बताए ।

हाल ढोरपाटन नगरपालिका क्षेत्रमा पर्ने यो भागको विकासका लागि नगरपालिका तहबाट पनि पहल थालिएको छ । उक्त स्थानका धार्मिक र पर्यटकीय गन्तव्यको पुनर्निर्माण, मर्मत र व्यवस्थापनका लागि नगरपालिकाले १ करोड बढी लगानी गरिसकेको प्रमुख देवकुमार नेपालीले बताए । यहाँ निर्माण गरिने उत्तरगंगा जलविद्युत आयोजनाले पनि यो क्षेत्रको महत्त्व अझै बढाउने उनले बताए ।

प्रकाशित : कार्तिक २२, २०७५ ११:२७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

पीपीएलले बढायो क्रिकेट क्रेज

कान्तिपुर संवाददाता

लेखनाथ — पोखरा पस्र्याङका अशोक पौडेल धान काटेपछिको खेतमा ब्याट लिएर क्रिकेट खेलेको अझैं सम्झन्छन् । उच्च शिक्षाका लागि जर्मनी पुगेका उनले नेपाली क्रिकेटलाई पछयाउन छोडेनन् ।

तीन वर्षपछि घरबिदामा आउँदा क्रिकेट हेर्ने मेसो मिल्यो । गृहमैदानमा चलिरहेको पोखरा प्रिमियर लिग (पीपीएल) हेर्न छुटाउने कुरै भएन । आºनै सहरमा चलिरहेको खेल हेर्न उनी हरेक दिन पोखरा
रंगशाला पुगे ।

‘सुरुको दिनमा दर्शकले एउटा प्यारापिट मात्रै भरिएको थियो,’ उनले भने, ‘तेस्रो दिनसम्म चारवटै प्यारापिट भरिए ।’ खेतमा नाम लिँदै क्रिकेट खेलेका पारस खड्कालाई आँखै अघि देख्दा उनी मख्ख छन् । अहिले युवा खेलाडी सन्दीप लामिछाने उनको मन पर्ने खेलाडी हुन् । क्रिकेटप्रति पोखरेली दर्शकको क्रेज पीपीएलले बढाएको उनी बताउँछन् । भन्छन्, ‘प्रतियोगिता निरन्तर हुने हो भने फुटबलको जस्तै ‘क्रेज’ क्रिकेटको पनि हुनेछ ।’ पीपीएलको व्यवस्थापकीय पक्षले पनि उनलाई लोभ्यायो ।

पोखरा छोरेपाटनकी हिमाल शर्मालाई पनि पीपीएलको उत्कृष्ट लागेको पक्ष यहाँको व्यवस्थापन नै हो । आयोजकले दर्शक, खेलाडीलाई प्रदान गरेको आतिथ्यता देखेर उनी प्रभावित भइन् । ‘यत्तिको स्तरीय खेल हुन्छ जस्तो लागेको थिएन,’ उनले भनिन्, ‘पहिलो भएपछि आशा गरेभन्दा राम्रो भयो ।’ जनप्रिय बहुमुखी क्याम्पसमा स्नातक तेस्रो वर्षमा अध्ययनरत उनी लगातार पाँच दिनदेखि रंगशालामा पीपीएल हेर्न आइरहेकी छन् ।

नेपाल आईसीसीमा छनोट भएपछि क्रिकेटप्रतिको चासो बढेको उनले सुनाइन् । ‘पहिले अन्तर्राष्ट्रिय टुर्नामेन्टहरूहेरिरहन्थें,’ कान्तिपुरसँग उनले भनिन्, ‘नेपाल आईसीसीमा छानिएपछि अलि बढी चासो बढ्यो ।’ क्रिकेट मैदानबाट देखिने हिमशृंखलाको रमणीय दृश्यले पनि दर्शकलाई पीपीएलसम्म तानेको उनले बताइन् । ‘पीपीएलले यहाँको स्थानीय खेलाडीलाई उत्प्रेरणा मिल्छ,’ उनी भन्छिन्, ‘क्रिकेटमा आइडिया नभएकालाई पनि हेर्न प्रोत्साहन मिल्छ ।’

पोखरा अमरसिंहका किशोर शर्मा जागिरे हुन् । फुर्सद मिलाएर पीपीएल हेर्न पुग्छन् । उनले चार दिन मैदानमा आएर क्रिकेट हेरे । अरु बेला युटयुबमै प्रत्यक्ष प्रसारण हेरे । विदेशी खेलाडीसहितकोप्रतियोगिता पोखरामै बसेर हेर्न पाउँदा आनन्दित भएको उनी बताउँछन् । क्रिकेट क्रेज बढाउन आयोजकले दर्शकलाई टिकटको व्यवस्था नगर्नुलाई उनी सकारात्मक मान्छन् ।

‘पोखरामा अरु ठाउँभन्दा क्रिकेटको क्रेज कम थियो,’ उनले भने, ‘प्रतियोगिताले गर्दा क्रिकेटलाई माया गर्ने दर्शकको उपस्थिति राम्रै देखियो ।’ पोखरामा भएका अन्य प्रतियोगिताभन्दा पीपीएलको व्यवस्थापन राम्रो भएको उनको अनुभव छ ।

पोखरा कुँडहरका कुशल सिग्देल पीपीएल हेर्दा अन्तर्राष्ट्रिय प्रतियोगिताकै झल्को लागेको बताउँछन् । ‘क्रिकेटलाई त्यति साह्रै फलो गर्दिनँ तर आºनै सहरमा भएकाले लगातार एक सातादेखि आएर खेल हेरिरहेको छु,’ उनले सुनाए । पोखरामाअन्तर्राष्ट्रियस्स्तरको क्रिकेट मैदान बन्न सके सबैको चासो क्रिकेटमा बढ्दै जाने उनको तर्क छ ।

पोखराबाट मात्रै होइन, नजिकका सहर दमौली, खैरेनीटार, स्याङजा, कुश्मा, बागलुङबाट पनि पीपीएल हेर्न दर्शक आए । पीपीएलले चितवन र बुटवलबाट पनि दर्शकलाई पोखरासम्म तान्यो । चितवन टाँडीका गौरव मल्ल अन्य पाँच साथीसहित मोटरसाइकल लिएर पोखरा आइपुगे ।

उनीहरूले खेल अवधिभर चितवन राइनोजको समर्थन गरे । ‘फेसबुकमा पोखरा क्रिकेट मैदानको फोटो देखेपछि नआइरहन सकेनौं,’ उनले भने, ‘पीपीएल हेर्न आउँदा पोखरा घुम्ने उद्देश्य पनि पूरा भयो ।’ उनीहरूमध्ये चारजना पहिले नै पोखरा घुमिसके पनि बाँकी दुई पहिलोपल्ट आएको उनले जनाए ।

पश्चिमाञ्चल होटल संघका अध्यक्ष विकल तुलाचनले आन्तरिक पर्यटक बढी आउने मौसममा पीपीएलले थप पाहुना तानेको बताउँछन् । ‘अहिले आन्तरिक पर्यटकले होटल भरिभराउ छन्,’ उनले भने, ‘पीपीएल हेर्न टाढा–टाढाबाट आएका दर्शकले पनि होटलको व्यापारलाई सघाएका छन् ।’

आयोजक क्विन्स इभेन्ट्सका प्रबन्ध निर्देशक छुम्बी लामा अपेक्षाअनुरुप नै दर्शकको आगमन भएकोमा सन्तुष्ट छन् । ‘हाम्रो उद्देश्य पोखरामा क्रिकेट क्रेज बढाउनु नै थियो,’ कान्तिपुरसँग उनले भने, ‘एकहदसम्म त्यो प्रयास सफल भएको छ ।’ पीपीएलले पोखरेली क्रिकेटमा दूरगामी असर पुग्ने उनको ठम्याइ छ । भन्छन्, ‘अहिले दर्शकको क्रेज बढेको मात्रै देखिन्छ तर पोखरेली क्रिकेटको भविष्यमा यसले धेरै ठूलो परिवर्तन ल्याउनेवाला छ ।’

जिल्ला क्रिकेट संघ कास्कीका अध्यक्ष सञ्जयकान्त सिग्देल पीपीएलको सिधा प्रभाव स्थानीय खेलाडीमा पर्ने बताउँछन् । ‘मुख्य त यहाँका खेलाडीले राष्ट्रिय र विदेशी खेलाडीको खेल अवलोकन गर्न पाएका छन्,’ उनी भन्छन्, ‘उनीहरूको खेलकौशल हेरेरै धेरै सिक्न सकिन्छ ।’ नयाँ खेलाडीलाई क्रिकेटमा भविष्य देख्न पनि पीपीएलले सहयोग पुर्‍याउने उनको आस छ ।

प्रकाशित : कार्तिक २२, २०७५ ११:२६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT