हेनरीका लागि स्थिति कठिन हुँदै

अहिले मोनाको आफैं ठूलो संकटमा छ । हेनरीको जिम्मा हो, यही क्लबलाई उकास्ने । तर लागिरहेको छ, यो सजिलो छैन । हुनेवाला पनि छैन । मोनाकोले उनको आगमनको सूचना आफ्नो वेबसाइटमा ठूलो तस्बिर हालेर गरेको थियो । हेनरीले किशोर उमेरमै मोनाकोबाट खेल्न सुरु गरेका थिए । त्यसयता धेरै समय गुज्रिसकेको छ । विश्व फुटबल उनका लागि भाग्यमानी साबित भएको छ ।

खेलाडीका रूपमा उनी उत्कृष्ट थिए नै, खेल्न छाडेपछि उनी उत्तिकै राम्रा फुटबल विश्लेषक पनि भए । अहिले उनी मोनाकोका प्रशिक्षक भएका छन् । यहाँ आउँदा सबैलाई थाहा थियो, उनलाई मोनाकोमा उनले कठिनभन्दा कठिन चुनौतीको सामना गर्नेछन् । आखिरमा उनले क्लब सम्हाल्दा टिमले पछिल्ला दसमधये एक खेलमा मात्र जित निकालेको थियो ।

उनी मोनाकोमा आउन अगाडि लियोनार्डो जार्डिम प्रशिक्षक थिए । उनी बर्खास्तीमा परेपछि हेनरीले अवसर पाएका हुन् । फ्रान्सेली फुटबल पत्रकार जुलियन लुरेन्सले भनेका छन्, ‘अहिले मोनाकोमा भद्रगोलको स्थिति छ । म अनुभव गर्न सक्छु हेनरी अहिले कुन प्रकारको स्थितिबाट गुज्रिरहेका छन् होला ।

सुरुमा उनलाई लागेको थियो होला, यति खराब स्थिति हुने छैन भनेर । तर अहिले साँच्चै नै टिम निकै दयनीय स्थितिमा छ ।’ हेनरी टिममा आएयता मोनाकोले तीन बराबरी खेलेको छ भने तीनमा पराजित रहेको छ । लिग वानको अंक तालिकामा मोनाको पुछारबाट दोस्रो स्थानमा छ । अब उसको सामना हुनेछ, लिग च्याम्पियन पेरिस सेन्ट जर्मेनसँग ।

यो यही टिम हो, जसले पछिल्ला १२ मध्ये सबै १२ खेलमा जित हात पारेको छ । सोमबार राति यो खेल हुँदैछ र यसले सम्भवत: हेनरी र मोनाको दुवैको स्थिति अझ खराब पार्न सक्नेछ । मध्यसाता युरोपेली च्याम्पियन्स लिगमा क्लब ब्रुगको हातबाट ४–० ले पराजित भएपछि यस्तै खराब स्थिति बनेको थियो ।

क्लब इतिहासमै यो सबैभन्दा खराब हार थियो । दुई वर्ष अगाडि मात्र हो, मोनाको आफैं च्याम्पियन्स लिगको सेमिफाइनल पुगेको थियो र त्यतिबेला क्लबका किशोर खेलाडी केयनिल एमबापे ठूला खेलाडी हुने क्रममा थिए । ‘सायद मोनाकोका लागि च्याम्पियन्स लिगबाट बाहिरिनु पनि ठीकै भयो । अब क्लबले लिगमै मात्र आफ्नो ध्यान केन्द्रित गर्न सक्छ,’ लुरेन्सले भने ।