जो कोलले लिए संन्यास
लन्डन — इंग्ल्यान्डका पूर्वमिडफिल्डर जो कोलले मंगलबार आफ्नो खेलजीवनबाट संन्यास लिएका छन् । उनले सात फरक क्लबबाट उत्रिने क्रममा ७ सयभन्दा बढी खेले ।
त्यसमा वेस्ट हयाम र चेल्सी प्रमुख छन् । गत साता ३७ वर्षका भएका कोलले अब आफू प्रशिक्षकको करिअरतिर जाने घोषणा गरे ।
उनले आफ्नो खेलजीवनलाई भने सपना पूरा भएको स्थितिसँग तुलना गरे । उनको अन्तिम क्लब अमेरिकाको युनाइटेड सकर लिगको टेम्प बे रोडिज रहयो । यो दोस्रो डिभिजनको क्लब हो । आफ्नो खेल जीवनमा उनले १ सय ४ गोल गरे । उनले इंग्ल्यान्डका लाग ५६ क्याप जिते र तीन विश्वकपमा सहभागिता जनाए ।
कोलले १९ वर्षको उमेरमा पहिलोपल्ट अन्तर्राष्ट्रिय फुटबलमा डेब्यु गरेका थिए । त्यति बेला उनी वेस्ट ह्यामका लागि खेल्थे र उनलाई इंग्लिस फुटबलको सबैभन्दा प्रतिभाशाली युवा खेलाडीका रूपमा चित्रण गरिएको थियो । उनलाई इंग्लिस फुटबलको स्वर्णिम पुस्ताका खेलाडीमध्ये एक मानिन्छ ।
त्यस पुस्ताका अरू खेलाडीमा डेबिड बेकहयाम, माइकल ओवेन, रियो फर्डिनान्ड, पउल स्कोल्स, माइकल ओवेन, स्टेफेन जेरार्ड, जोन टेरी र फ्रायन्क लाम्पार्ड पर्छन् । संन्यास घोषणा गर्दै उनले भनेका छन्, ‘मैले लगभग २० वर्ष व्यावसायिक फुटबल खेलें, अब संन्यास लिने उपयुक्त समय आएको छ ।’
वेस्ट हयाममा आठ वर्षको उमेरमा पुगेका कोलले त्यसका लागि १ सय ८७ खेल खेल्दै १८ गोल गरे । वेस्ट हयाम रेलिगेसनमा परेपछि उनी चेल्सी गए । कोल खेलाडी छँदा सन् २००४–०५ मा चेल्सीले जोसे मोउरिन्होको नेतृत्वमा ५० वर्षयता पहिलो लिग उपाधि जितेको थियो । उनले लिभरपुलबाट पनि खेले ।
प्रकाशित : कार्तिक २८, २०७५ ०९:३०