ईपीएलः भैरहवामा युएईका बलर नाविद

भैरहवा ग्ल्याडियटर्सले मंगलबार उसको आधिकारिक फेसबुक पेज मार्फत नाविदलाई लिएको जनाएको छ । ईपीएल मंसिर २२ गतेदेखि सुरु हुनेछ ।

नाविदले युएईबाट ३२ एकदिवसीय अन्तर्राष्ट्रिय र २३ ट्वान्टी-२० अन्तर्राष्ट्रिय खेलिसकेका छन् । युएईलाई एकदिवसीय अन्तर्राष्ट्रिय मान्यता दिलाउन ३१ वर्षे यी खेलाडीको महत्वपूर्ण योगदान रहेको थियो ।

नाविदले गत महिना नमस्ते पोखरा प्रिमियर लिगमा पोखरा पल्टनबाट खेलेका थिए । पोखरालाई उपाधि दिलाउने क्रममा उनले ७ विकेट लिएका थिए ।

तर, उनको उपयोगी व्याटिङ पोखरालाई च्याम्पियन बनाउन अझ प्रभावकारी बनेको थियो । उनले 'पिन्च हिटर' को भूमिकामा खेल्दै हुलास काठमाडौं रोयल्सविरुद्ध इलिमिनेटरमा ३६ र चितवन राइनोज विरुद्धको फाइनलमा २५ रन बनाएका थिए ।

भैरहवा गत सिजनको ईपीएल फाइनलमा विराटनगर वारियर्ससँग १ विकेटले पराजित भएको थियो । शरद भेषावकरको कप्तानीमा रहेको भैरहवाले मंसिर २३ मा पोखरा राइनोज विरुद्ध खेलेर आफ्नो यात्रा प्रारम्भ गर्नेछ ।