मनाङलाई पेनाल्टीको साथ

कान्तिपुर संवाददाता

काठमाडौँ — अन्जन विष्टको पेनाल्टी गोलको सहयोगमा मनाङ मस्र्याङदीले जावलाखेल युथमाथि १–० को जित निकाल्दै सहिद स्मारक ‘ए’ डिभिजन लिगमा बुधबार शतप्रतिशत जित कायमै राखेको छ ।

शहिद स्मारक लिगमा बुधबार हिमालयन शेर्पाका विजय श्रेष्ठ र च्यासलका छिरिङ गुरुङ (नीलो) बलका लागि भिड्दै । तस्बिर : हेमन्त श्रेष्ठ/कान्तिपुर

मनाङको चिरपरिचित प्रतिद्वन्द्वी थ्रीस्टारले पनि लिगको छैटौं चरणमा सरस्वतीमाथि २–१ को कठिन जित निकाल्यो ।

Yamaha

सातदोबाटोस्थित एन्फा कम्प्लेक्समा भएको खेलमा अन्जनले ६२ औं मिनेटमा पेनाल्टीमा गोल गर्दै मनाङलाई ३ अंक दिलाएका थिए । हल्चोक मैदानमा भिक्टर एमोबीको गोलसँगै चौथो मिनेटमै सरस्वतीले अविश्वसनीय अग्रता लिएको थियो ।

तर, रन्जित धिमाल र नीराजन खड्काले गोल गर्दै थ्रीस्टारलाई जित दिलाएका थिए । सातदोबाटोमा भएको अर्को खेलमा च्यासल युथले हिमालयन शेर्पामाथि २–१ को सफलता हात पार्‍यो । च्यासलको यो लिगमा दोस्रो जित हो भने हिमालयन शेर्पाले लगातार दोस्रो हार बेहोरेको हो ।

कीर्तिमान सातपल्टको च्याम्पियन मनाङ अधिकतम १८ अंकसहित शीर्षस्थानमा छ । उसले थ्रीस्टार र संकटामाथि ३ अंकको अग्रता लिएको छ । आर्मीले बिहीबार फ्रेन्ड्समाथि जित हात पार्न सके उसले मनाङसँगको दूरी २ अंकमा छोटयाउने छ ।

रेलिगेसन नहुने लिगमा १४ टिम सहभागी छन् । यसमा जावलाखेल ११ औं स्थानमा छ । सरस्वती ६ अंकसहित नवौंमा छ भने च्यासल ७ अंक बनाएर सातौं स्थानमा उक्लियो । हिमालयन शेर्पा १० अंकसहित छैटौंमा छ ।

मनाङले आक्रामक खेल पस्किएको थियो र त्यसमा जावलाखेलका गोलकिपर टकेन्द्र थापाले केही उत्कृष्ट बचाउ गर्दै उसलाई निरास पारिदिएका थिए । सातौं मिनेटमै फ्रि–किकमा विशाल राईले प्रहार बल टकेन्द्रले रोकेका थिए र त्यस रिबाउन्डमा अन्जनले प्रहार गरेको बललाई पनि उनले असफल बनाइदिए ।

उनले एडेलाजा सोमिडेको प्रयास पनि असफल पारे । कप्तान विराज महर्जन निलम्बनमा रहेको अवस्थामा ‘आर्मब्यान्ड’ लगाएका विशाल राईको सटिक पासमा हेमन गुरुङले गरेको प्रहारमा पनि टकेन्द्र बाधक बनिदिए ।

‘हामीले उच्च दबाब दिएर १५–२० मिनेटभित्रै गोल गर्ने योजना बनाएका थियौं । तर, यसले काम गरेन,’ मनाङका प्रशिक्षक सुमन श्रेष्ठले भने, ‘मिडफिल्डबाट फरवार्डलाई बल दिएको साथ राम्रो रहेन । यस्तो प्रदर्शन गरेर टिमले उपाधि जित्न सक्दैन ।’

जावलाखेलका प्रशिक्षक राजकुमार केसीले डिफेन्सले धैर्य गुमाउँदा पराजित हुनुपरेको बताए । ‘रक्षात्मक खेल्दै काउन्टरमा गोल गर्ने हाम्रो रणनीति थियो तर यसमा खेलाडीको फिटनेस स्तर कमजोर देखियो,’ उनले भने ।

अर्को खेलमा हिमालयन शेर्पालाई १५ औं मिनेटमै त्रिदेव गुरुङले अग्रता दिलाए । तर सन्तोष साहुखलले उत्कृष्ट रूपमा दुई डिफेन्स र गोलकिपर किशोर गिरीलाई उछिन्दै गोल गरेपछि च्यासल बराबरीको अवस्थामा पुगेको थियो । सब्स्टिच्युट सुनील खड्काको प्रहार क्लियर गर्ने क्रममा शेर्पाका निरज बस्नेतले आत्मघाती गोल गरेका थिए । ७३ औं मिनेटमा भएको उक्त गोलसँगै च्यासलको जित सुनिश्चित बन्यो ।

लिगमा दोस्रो पहेँलो कार्ड बेहोरेपछि साहुखलले सातौं चरणमा फ्रेन्डसविरुद्ध हुने खेल गुमाउने छन् ।
हल्चोकमा भिक्टर एमोबीले आफ्नो पूर्व क्लबविरुद्ध गोल गर्दै सरस्वतीलाई चौथो मिनेटमै अग्रता दिलाएका थिए । तर, डिफेन्डर रन्जित धिमालले १७ औं मिनेटमा पेनाल्टीमार्फत गोल गर्दै थ्रीस्टारलाई १–१ मा पुर्‍याए । त्यसपछि नीराजनले ३६ औं मिनेटमा गरेको गोल निर्णायक बन्यो ।

प्रकाशित : मंसिर २०, २०७५ ०९:५०
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

शक्तिको ईपीएलपछि संन्यास

पूरा नेपालकै भनेको त होइन तर आफ्नो जिल्ला, प्रदेशको मैले अग्रसरता लिएँ भने राम्रै योगदान हुनसक्छ । नेपाली क्रिकेटको विकासमा लागौं भनेर नै मैले यो निर्णय गरेको हुँ
विनोद पाण्डे

काठमाडौँ — शक्ति गौचनले टीभीएस एभरेस्ट प्रिमियर लिग (ईपीएल) पछि संन्यास लिने भएका छन् । पोखरा राइनोजका मार्की खेलाडी उनले ईपीएल आफ्नो अन्तिम प्रतियोगिता हुने बताए । ३४ वर्षे शक्तिले आफू पूर्ण रूपमा क्रिकेटको विकासमा केन्द्रित हुन खोजेको जनाए । 


जुलाईमा नेदरल्यान्ड्समा भएको वान–डे अन्तर्राष्ट्रिय खेलबाट शक्तिले विदेशी भूमिमा आफ्नो खेलजीवन टुंग्याइसकेका छन् । उनले नेपालमा हुने अन्तर्राष्ट्रिय खेलबाटै पूर्ण रूपमा संन्यास लिने चाहना राखेका थिए । तर नेपाल क्रिकेट संघ (क्यान) निलम्बनको अवस्थामा उनले ईपीएललाई नै आफ्नो अन्तिम प्रमुख प्रतियोगिता बनाउन लागेका हुन् ।

सन् २००१ मा बंगलादेशमा भएको एसीसी यू–१७ एसिया कपदेखि शक्तिले अन्तर्राष्ट्रिय क्रिकेट खेल्न सुरु गरेका थिए । अर्को वर्ष सिंगापुरमा एसीसी ट्रफीबाट उनले राष्ट्रिय टोलीमा ‘डेब्यू’ गरेका हुन् । ब्याटिङ अलराउन्डका रूपमा आफ्नो खेलजीवन अगाडि बढाएका शक्ति नेपालबाट १हजार रन बनाउने पहिलो खेलाडी हुन् ।

पछि उनी बलरको भूमिकामा मात्र रहे । देव्रेहाते स्पिन बलिङबाट उनी नेपालका प्रमुख बलर बने । पछिल्लो समय उनले राष्ट्रिय टोली र फ्रेन्चाइज क्रिकेटमा कम मौका पाउँदै आएका थिए ।

‘मैले संन्यासका लागि लगभग सोच बनाइसकेको छु । फ्रेन्चाइजी क्रिकेट यो मेरो अन्तिम नै हुन्छ । अन्तर्राष्ट्रिय क्रिकेटबाट मैले संन्यास लिइसकेको छु,’ शक्तिले कान्तिपुरसँग भने, ‘मेरो विचारमा अन्तर्राष्ट्रियभन्दा पनि फ्रेन्चाइजी क्रिकेट उच्चस्तरको हो । अन्तर्राष्ट्रिय क्रिकेटमा खेल्दाभन्दा यस्ता प्रतियोगितामा धेरै मिहिनेत गर्नुपर्छ । यस्ता क्रिकेटमा मैले धेरै मिहिनेत गर्दिनँ भने म अन्तर्राष्ट्रिय क्रिकेटलाई योग्य हुन्न । त्यसैले मिहिनेतको हिसाबमा पनि यो मेरो अन्तिम प्रतियोगिता हो ।’ उनकै शब्दमा :

अनसिन डेभलपमेन्ट अफिसर
नेपाल क्रिकेट संघ (क्यान) अहिले विघटनको अवस्थामा छ । विकास गतिविधि शून्यको स्थितिमा छ । यस्तो अवस्थामा कोही त हुनुपर्‍यो, जसले विकास गतिविधिको नेतृत्व लिनुपर्‍यो । पूरा नेपालकै भनेको त होइन, तर आफ्नो जिल्ला, प्रदेशको मैले अग्रसरता लिएँ भने राम्रै योगदान हुनसक्छ । नेपाली क्रिकेटको विकासमा लागौं भनेर नै मैले यो निर्णय गरेको हुँ ।

अहिले म आफूलाई आफ्नो राष्ट्रको अनसिन डेभलपमेन्ट अफिसरका रूपमा राख्छु । मैले आफैंलाई यो जिम्मेवारी दिएको छु कि मैले जिम्मेवारी निभाउनुपर्छ भनेर । मैले यसको सुरुआत गरिसकेको छु । मैले अहिले पनि खेलिरहें भने यो क्षेत्रमा शतप्रतिशत समय दिन सक्दिनँ । यसो गर्दा नेपालमा क्रिकेट विकासको जुन सपना देखेको छु, त्यसमा ढिलाइ हुनेछ ।

होराइजनका प्रशिक्षक
म बुटवलमा होराइजन स्कुलको प्रशिक्षक पनि हुँ । होराइजनले क्लब प्रतियोगिता खेल्ने गरेको छ । होराइजनमा ठूलो खेलाडी त आउँदैनन् । लिनुपर्‍यो भने पैसा तिर्नैपर्छ । एउटा क्रिकेट प्रशिक्षकको भूमिका मैले होराइजनबाटै खेल्नुपर्ने अभिभारा छ । होराइजनले जहिले पनि चाहन्छ राम्रो प्रदर्शन होस् भनेर । स्थिति र समयअनुसार म खेल्न सक्छु । तर मैले पूर्ण रूपमा क्रिकेट विकासका लागि लाग्ने निधो गरेको छु ।

अन्तिम खेलको चाहना
मैले नेपालमै खेलेर अन्तर्राष्ट्रिय क्रिकेट टुंगाउने निधो गरेको थिएँ । मैले राष्ट्रिय टोलीबाट खेल्दै नेपालमै बिदाइ पाउने आस गरेको छैन । भयो भने मैले देशका लागि के गरेछु भन्ने छु । तर ९९ प्रतिशत मैले त्यस्तो विदाइको आशा गरेको छैन । नेदरल्यान्ड्समा मैले जुन वान–डे अन्तर्राष्ट्रिय खेलें त्यो नै अन्तिम हुनेछ । शुभचिन्तक, प्रशंसक, परिवारका सदस्यले मैले राष्ट्रिय टोलीबाट अन्तिम खेल नेपालमै खेलोस् भन्ने चाहन्छन् होला । तर मैले त्यो सम्भावना देखेको छैन । कसैले मेरो यो चाहनालाई पूरा गरिदिन्छ भने म उसलाई हृदयदेखि नै धन्यवाद दिनेछु ।

तर नेपालमा अहिले अन्तर्राष्ट्रियखेल हुने सम्भावना पनि छैन । कसैले मेरा लागि गर्ला भन्ने पनि छैन । जसले गर्छत्यो एक प्रतिशतको मान्छे हुनेछ । त्यो अचम्मैको हुनेछ ।

मार्की खेलाडी
तयारी धेरै त गरिएको छैन, तर एउटा खेलाडीका रूपमा म तयार छु । ईपीएलका लागि भनेर नेट्समा अझै अभ्यास गर्न पाएका छैनौं । त्यही पनि सिजनको हिसाबमा खेलाडीहरू अहिले लयमै छन् । विदेशी खेलाडी आएका छन् ।

उनीहरूले कन्डिसन बुझ्दै छन् । घरेलु क्रिकेटरहरूको बलियो र कमजोर पक्षबारे मार्की खेलाडीको हिसाबमा मैले प्रशिक्षकलाई बुझाउनुपर्ने हुन्छ । विदेशी प्रशिक्षक भएकाले उनलाई एकै पटक सबै थाहा हुँदैन । प्रतिद्वन्द्वी टोलीको पनि जानकारी दिनुपर्छ । विदेशी खेलाडीलाई नेपालको कन्डिसनबारे जानकारी गराउनुपर्ने हुन्छ ।

टिममा जिम्मेवारी
अहिले मलाई टिमले बलिङ युनिट लिडरको जिम्मा दिएको छ । बलिङ युनिटलाई प्रतिद्वन्द्वीअगाडि हिट गर्दा उनीहरूको बलियो पक्षलाई कसरी कमजोर बनाउन सकिन्छ त्यो टिमलाई जानकारी गराउनु मेरो भूमिका हो । टिम कम्पोजिसन राम्रो देखिएको छ । ब्याटिङ पक्ष राम्रो देखिएको छ । तीनै जना विदेशी खेलाडी ब्याटिङमा पोख्त छन् । बलिङ टिम पनि अनुभवी छ । बलिङमा घरेलु खेलाडी भएकाले यो कन्डिसनमा कसरी बलिङ गर्ने हामीलाई थाहा छ ।

हामीले गत सिजन पनि राम्रोसुरुआत गरेका थियौं, तर फिनिसिङ दिन सकेका थिएनौं । राम्रो सुरुआत गर्दै च्याम्पियनको रूपमा प्रस्तुत गराैं भन्ने सोचाइ हुन्छ । प्रतियोगिता सुरु हुनुअगाडि नै जितिसक्यौं भन्न लाग्यो भने खेलेको अर्थ नै हुँदैन । त्यही भएर अहिलेको सोच छ,‘राम्रो सुरुआत गरौं र च्याम्पियनका रूपमा फिनिस गरौं ।’

प्रकाशित : मंसिर २०, २०७५ ०९:४८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT