पुजाराको शतकमा भारतको पुनरागमन

एएफपी

दुबई — चेतेश्वर पुजाराले कठिन क्षणमा १ सय २३ रनको साहसिक इनिङ्स खेलेपछि भारतले बिहीबार एडिलेडमा सुरु पहिलो टेस्टमा अस्ट्रेलियाविरुद्ध पुनरागमन गरेको छ । अस्ट्रेलियाले उत्कृष्ट बलिङ गर्दै सुरुआती खेल नियन्त्रणमा लिएको थियो । 

चेतेश्वर पुजारा

नाथन लायन, प्याट कुमिन्स, जोस हेजलउड र मिचेल स्टार्कले ३६ डिग्रीको गर्मीमा २–२ विकेट लिएपछि भ्रमणकारी टोली पहिलो दिनको खेलमा २५०–९ को स्थितिमा छ । अनुभवी पुजाराले २ सय ४६ बल खेल्दै टेस्ट क्रिकेटमा ५ हजार रन पूरा गरे । कप्तान विराट कोहलीलाई ३ रनमै गुमाएको अवस्थामा उनले आफ्नो १६ औं टेस्ट शतक पूरा गरेका हुन् ।

तर खेलको अन्तमा उनलाई कुमिन्सले सानदार तरिकाले रनआउट गरे । ‘टेस्ट क्रिकेटमा यो मेरो उत्कृष्ट इनिङ्समध्ये एक हो । अझ भनौं, उत्कृष्ट ५ मध्ये एक हो,’ अन्य ब्याट्सम्यानले राम्रो स्कोर गर्न नसकेकामा निरास देखिएका पुजाराले भने, ‘साँच्चै भन्ने हो भने हामीले यो भन्दा राम्रो ब्याटिङ गर्न सक्नुपथ्र्यो । तर उनीहरूले पनि पहिलो दुई सत्रमा राम्रो बलिङ गरेका हुन् । मैले यही बुझेर धैर्यसाथ खेल्दै कमजोर बल कुरेर बसेको थिएँ ।’

उनले आफ्नो टोलीले यो गल्ती बुझेर दोस्रो इनिङ्समा राम्रो खेल्नुपर्ने जनाए । कोहलीले टस जितेर ब्याटिङ गर्ने निर्णय गर्दा भारतको सुरुआत निकै खराब हुनपुग्यो । रविचन्द्रन अश्विनले २५ रन बनाउँदै पुजारालाई राम्रो साथ दिए । अस्ट्रेलियाले भोजनअगाडि नै भारतको ४ विकेट लिएको थियो ।

रनका लागि संघर्ष गरिरहेका ओपनर केयल राहुल पुन: असफल रहे । उनी हेजलउडको बलमा २ रन बनाई स्लिपमा आरोन फिन्चबाट समातिए । युवा ब्याट्सम्यान पृथ्वी श घाइते भएका कारण टोलीमा स्थान पाएका भेट्रान मुरली विजय ११ रन बनाई स्टार्कको बलमा कप्तान टिम पेनबाट समातिए । कोहली १६ बलमात्र टिक्न सके । कुमिन्सको बललाई ड्राइभ गर्दा उनी उस्मान ख्वाजाबाट गलीमा उत्कृष्ट एकहाते क्याच थमाउन पुगे ।

यसअघि अस्ट्रेलिया भ्रमणमा दुईपल्ट आउदा पाँच टेस्ट शतक बनाइसकेका कोहलीलाई आउट गरेपछि घरेलु टोली खेलमा हाबी हुन लाग्यो । उपकप्तान अजिन्का रहाने १३ रन बनाई स्लिपमा क्याच दिन पुगे । प्लेइङ टोलीमा अटाएका रोहित शर्माले ३१ रन बनाए ।

उनले लायनको बलमा छक्का पनि प्रहार गरेका थिए । फेरि अर्को छक्का प्रहार गर्ने प्रयासमा उनी आउट भए । ६५ औं टेस्ट खेल्दै गरेका पुजाराले ऋसव पन्तसँग ४१ र अश्विनसँग ६२ रनको साझेदारी गरे । पन्तले पनि २५ रन बनाए ।

मार्चमा दक्षिण अफ्रिकाविरुद्ध खेल्दा बलको प्राकृतिक स्वरुप बिगारेर ठूलो विवादमा परेयता अस्ट्रेलियाको घरेलु भूमिा यो पहिलो टेस्ट हो ।

प्रकाशित : मंसिर २१, २०७५ ०९:१४
प्रतिक्रिया
पठाउनुहोस्

चिनीमा चलखेल : छानबिन गर्न अख्तियारलाई पत्र

‘एक–दुई महिनापछि पुन: ताकेता गर्छाैं’
राजु चौधरी

काठमाडौँ — प्रतिनिधिसभा सार्वजनिक लेखा समितिले चिनीमा भएको आर्थिक चलखेल छानबिन गर्न पत्राचार गरेको छ । अर्थ र आपूर्ति मन्त्रालय र मातहतका विभागको मिलेमतोमा चिनी आयात बन्द गरी १२ उद्योगीको कार्टेलिङ गराएको विस्तृत छानबिन गर्न पत्रचार गरेको हो । 



‘भदौ २१ गते प्रधानमन्त्री, मन्त्रीहरू, सांसदहरू, सरकारी पदाधिकारी, उखु किसान र चिनी उद्योग संघका प्रतिनिधिका बीच भएको सम्झौता कार्यान्वयन भएन । प्रतिकिलो ७० रुपैयाँँ बजार मूल्य कायम गराई बजारमा चिनीको चरम मूल्य वृद्धि गराउनमा प्रत्यक्ष सहयोग गरेको देखिन्छ,’ समितिका सचिव रोजनाथ पाण्डेले अख्तियारलाई पठाएको पत्रमा भनिएको छ, ‘ठूलो आर्थिक चलखेल भएकाले अख्तियार दुरुपयोग अनुसन्धान आयोगलाई विस्तृत छानबिन गर्न निर्देशन दिने ।’

यसअघि लेखा समितिले गठन गरेको उपसमितिले चिनी उद्योगीको अनुचित प्रभावमा परी चिनी आयातमा पूर्ण बन्देज लगाएर ‘आर्थिक चलखेल’ भएको ठहर गरेको थियो ।

प्रतिवेदनमा ‘करोडौं रुपैयाँको चलखेल’ भएको दाबी गरिएको छ । उपसमितिले थप छानबिनका लागि अख्तियार दुरुपयोग अनुसन्धान आयोगलाई निर्देशन दिनुपर्ने सुझावसहितको प्रतिवेदन असोज २५ गते बुझाएको थियो । उपसमितिले तोकिएको समय अवधिमै प्रतिवेदन बुझाए पनि समितिको बैठक दसैं, तिहार र छठ अगाडि कुनै निर्णयमा पुग्न सकेन । समितिले ६३ रुपैयाँभन्दा बढी बढ्न नदिनू भनेर सम्बन्धित मन्त्रालय र निकायलाई पत्रचार गरे पनि कार्यान्वयन भएको थिएन ।

व्यवसायीहरूले निर्वाध रूपमा प्रतिकिलो ७० रुपैयाँदेखि ७५ रुपैयाँसम्मा बिक्री गरेका थिए । मंसिर ४ गते बसेको समिति बैठकले भने विस्तृत छानबिनका लागि अख्तियारमा पठाउने निर्णय गरेको हो । ‘समितिको बैठकपश्चात् अख्तियारलाई पत्राचार गरिसकेका छौं,’ सभापति शाहले भने, ‘अब थप विस्तृत छानबिन अख्तियारले गर्छ ।’ उनका अनुसार एक–दुई महिनापश्चात् अख्तियारलाई ताकेताका लाागि पुन: पत्राचार गरिने बताए ।

आयोगका प्रवक्ता रामेश्वर दंगालले लेखा समितिको पत्र प्राप्त गरेको बताए । ‘समितिको पत्र प्राप्त गरेका छौं, अध्ययन भइरहेको छ,’ उनले भने । २०७५ वैशाखमा चिनी उद्योगले फयाक्ट्री मूल्य प्रतिकिलो ५३ रुपैयाँमा (भ्याटबाहेक) बिक्री गरेको उद्योग वाणिज्य तथा आपूर्ति मन्त्रालयको अनुगमन प्रतिवेदनले उल्लेख गरेको छ ।

स्टक चिनी बिक्री गर्दा बजार मूल्य प्रतिकिलो ६३ रुपैयाँभन्दा कम पर्ने स्थिति हुँदाहुँदै अर्थ मन्त्रालयल, सम्बन्धित मन्त्रालयहरू र मातहतका विभागहरू चिनी उद्योगीहरूको अनुचित प्रभवमा परी चिनी आयातमा पूर्ण बन्देज लगाउन पुगेको सांसदहरूले बताउँदै आएका छन् ।

चिनीको कोटापश्चात् बजारमा मूल्य अकासिएको थियो । मूल्य अस्वाभाविक भएपछि आपूर्ति मन्त्रालयले प्रतिकिलो ७० रुपैयाँ तोकेको थियो । उक्त मूल्य बढी भएको समितिले ठहर गर्दै ६३ रुपैयाँ कार्यान्वयन गर्न सरकारलाई निर्देशन दिएको थियो तर कार्यान्वयन भएन ।

उपसमितिले चिनी पैठारीमा लगाइएको पूर्ण बन्देज हटाउने, परिमाणात्मक बन्देजलाई बजारको मूल्य स्थिर राख्न आवश्यक परिमाणात्मक बन्देजलाई बजारको माग र आपूर्तिसँग सन्तुलन गराउन रणनीति तय गर्नेका लागि अर्थ मन्त्रालयलाई निर्देशन दिनुपर्ने सुझाव दिएको थियो ।

सोही सुझावअनुसार अर्थ मन्त्रालयलाई पनि पत्रचार गरेको सभापति शाहले बताए । ‘उपसमितिको सुझावको अध्ययनपश्चात् आवश्यक परिमाणात्मक बन्देजलाई बजारको माग र आपूर्तिसँग सन्तुलन गराउन, कोटा हटाउन निर्देशन दिएका छौं,’ उनले भने । समितिले अर्थलाई पत्र पठाए पनि कोटा हटाउने सन्दर्भमा मन्त्रालयले कुनै चासो देखाएको छैन ।

प्रकाशित : मंसिर २१, २०७५ ०९:०९
पूरा पढ्नुहोस्
प्रतिक्रिया
पठाउनुहोस्