आर्मीलाई बराबरीको धक्का

आर्मी ०–० फ्रेन्ड्स
मछिन्द्र ०–० ब्रिगेड ब्वाइज
कान्तिपुर संवाददाता

काठमाडौँ — उपाधि दाबेदार मानिएको त्रिभुवन आर्मी क्लबलाई बिहीबार सहिद स्मारक ‘ए’ डिभिजन लिगमा कमजोर टिमको रूपमा लिइएको फ्रेन्ड्स क्लबले गोलरहित बराबरीमा रोकेको छ ।

लिगमा बिहीबार मछिन्द्रविरुद्ध बल प्रहार गर्दै ब्रिगेड ब्वाइजका खेलाडी (सेताे) । तस्बिर : कबिन अधिकारी । कान्तिपुर

सातदोबाटोस्थित एन्फा कम्प्लेक्समा भएको ब्रिगेडब्वाइज र मछिन्द्रको खेल पनि गोलरहित टुंगियो ।

Yamaha


फ्रेन्ड्सले आर्मीको लगातार जित यात्रालाई चार खेलमा पूर्णविराम लगाइदियो र यसले विभागीय टिमको उपाधि होडमा शीर्षस्थानको मनाङलाई दबाब दिने प्रयासमा ठूलो धक्का पुर्‍यायो । लिगमा मनाङ (१८ अंक) र आर्मी (१४) अपराजित छ तर छैटौं चरणमै विभागीय टिम ४ अंकले पछाडि परिसकेको छ ।

फ्रेन्ड्सविरुद्ध जितबाट वन्चित भएपछि चौथो स्थानको आर्मीले थ्रीस्टार (१५) र संकटा (१५) लाई पनि उछिन्ने अवसर गुमायो । आर्मीले पहिलो खेलमा एनआरटीसँग पनि अंक बाँडेको थियो । उसले त्यसयता लगातार ४ खेल जितेर लय समाते पनि फ्रेन्ड्सविरुद्ध ३ अंक जोड्न सकेन ।

चौध टिमबीच प्रतिस्पर्धा भइरहेको लिगमा रेलिगेसनको व्यवस्था छैन । छैटौं चरणसम्म फ्रेन्ड्स एक जित र दुई बराबरीसँगै दसौं स्थानमा छ । तीन बराबरी खेलेको मछिन्द्र (३ अंक) र एक जित, एक बराबरी गरेको ब्रिगेड ब्वाइज (४ अंक) अन्तिम दुई स्थानमा छन् ।

कमजोर टिमविरुद्ध अंक बाँड्नु परे पनि मनाङका प्रशिक्षक नवीन न्यौपानेले उपाधि जित्ने आशा कायमै राखेका छन् । ‘हामीले उपाधि होडमा रहेका थ्रीस्टार र मनाङविरुद्ध अझै खेल्न बाँकी छ,’ उनले भने, ‘उनीहरूलाई पराजित गर्नसके हामी अझै लक्ष्यमा पुग्न सक्छौं ।’

स्ट्राइकरद्वय कप्तान भरत खवास र नवयुग श्रेष्ठको अनुपस्थिति आर्मीका लागि महँगो साबित भयो । भरत दुई पहेँलो कार्डको कार्ड निलम्बनमा परेका हुन् । नवयुग चोटबाट मुक्त भएर तीन सातापछि खेलमा फर्किने क्रममा ७५ औं मिनेटमा मैदानमा प्रवेश गरेका थिए । तर, उनले आफ्नो प्रभाव देखाउन सकेनन् । आर्मीले प्राप्त थुप्रै अवसर गोलमा परिणत गर्न सकेन । त्यसैले अंक बाँड्न बाध्य भयो ।

‘स्ट्राइकरको अनुपस्थितिले ठूलो प्रभाव पार्‍यो,’ प्रशिक्षक न्यौपानेले भने, ‘पूर्ण रूपमा फिट नभए पनि नवयुगलाई गोलको आसमा मैदानमा पठाइएको थियो । हामीले पहिलो हाफमा गोलका अवसर उपयोग गर्न सकेनौं र दोस्रो हाफमा अपेक्षाकृत प्रदर्शन गर्न सकेनौं ।’

उनको टिमको चार प्रहारमा पोस्ट बाधक बनेको थियो । र, फ्रेन्ड्सका दोस्रो रोजाइका गोलकिपर देव लिम्बुले पनि थुप्रै बचाउ गरेका थिए । उनले बंगलादेशी गोलकिपर मोहम्मद नुरुल करिम घाइते भएपछि पोस्ट सम्हाल्ने मौका पाएका थिए ।

आजका खेल
पुलिसविरुद्ध हिमालयन शेर्पा
संकटाविरुद्ध एनआरटी
हल्चोक मैदान

प्रकाशित : मंसिर २१, २०७५ ०९:१९
ADVERTISEMENT
प्रतिक्रिया
पठाउनुहोस्
ADVERTISEMENT

नेपाल इन्टरनेसनल सिरिज : सकियो नेपालको आस

कान्तिपुर संवाददाता

काठमाडौँ — तेस्रो नेपाल इन्टरनेसनल सिरिज ब्याडमिन्टनमा नेपाली खेलाडीको पदक आशा सकिएको छ । बिहीबार भएको स्पर्धामा सबै नेपाली खेलाडी क्वाटरफाइनलभन्दा माथि जान सकेनन् ।

हल्चोकमा भइरहेको इन्टरनेसनल सिरिज ब्याडमिन्टनमा बिहीबार मिक्स्ड डबल्समा थाई प्रतिद्वन्द्वीसँग प्रतिस्पर्धा गर्दै नेपालका विजित थापामगर र पूजा श्रेष्ठ । खेलमा उनीहरू सोझो सेटमा पराजित भएका थिए । तस्बिर : राखेप

मेन्स सिंगल्समा नेपाल नम्बर एक खेलाडी रत्नजित तामाङ भारतका कौशल धर्मामरसँग ३–१ को प्रतिस्पर्धात्मक सेटमा पराजित भए । कौशलविरुद्ध रत्नजितले पहिलो सेट २१–१४ ले गुमाए । दोस्रो सेटमा २२–२४ ले आफ्नो पक्षमा पारे पनि तेस्रो सेट २१–११ ले गुमाउँदै उनी क्वाटरफाइनलबाटै बाहिरिए ।

उनी पहिलो संस्करणमा पनि क्वाटरफाइनलमा पराजित भएका थिए । यस स्पर्धामा मलेसियाका तेक जी सो, भियतनामका काओ कुओन फाम र थाइल्यान्डका कुन्लाभुत भितिसर्न पनि आफ्नो खेल जितेर सेमिफाइनल पुगेका छन् ।

मेन्स डबल्समा रत्नजित र दीपेश धामीको जोडीले थाइल्यान्डका वारित सारापात र पनाचाई वरासाक्तायानानको जोडीसँग २१–१९, १६–२१, २१–१४ को सेटमा खेल गुमाएको थियो । भारतका भी हनुमाइया रंगनाथ र ए सूर्य तथा हेमान्थ गोबडा र मधुसुदन माधप्पाको जोडी सेमिफाइनल पुगेका छन् । थाइल्यान्डकै सुपाक जोम्को र वाचिरावित सोथानेले भारतीय खेलाडीलाई हराउँदै अन्तिम चारमा स्थान बनाए ।

वुमन्स सिंगल्समा इरानकी सोराया अघाइहाजियाघले बंगलादेशकी अख्तर साप्लालाई २–० को सोझो सेटमा हराएर अन्तिम चारमा स्थान बनाइन् । मलेसियाकी थेट चार हुजारले श्रीलंकाकी काभिदी सिरिमानाङे, भारतकी राशी त्यागीले आफ्नै देशकी दुर्भा गुप्ता र थाइल्यान्डकी चनान्चिदा जुचारोनले फ्रान्सकी डिनुक भिग्नेस वारानलाई २–० को सोझो सेटमा हराएर सेमिफाइनल पक्का गरे ।

वुमन्स डबल्सतर्फ जेशिका गुरुङ र सुनैना मुखियाको नेपाली जोडी माल्दिभ्सका अमिनाथ नबिहा अब्दुल रज्जाक र फतिमाथ नबिहा अब्दुल रज्जाकको जोडीसँग २१–१२, २१–११ को सेटमा पराजित भएको छ ।

यस स्पर्धामा भारतका अपर्णा बलान र श्रुथी केपीको जोडी, श्रीलंकाका थिलिनी प्रामोदिका हेन्दाहेवा र काभिदी सिरिमानाङे तथा इरानकी सोराया अघाइहाजियाघ र म्यानकारकी थेट टर हुजारको जोडी सेमिफाइनल पुगेका छन् । सोराया र थेटको जोडी नेपालका अमिता गिरी र रशिला महर्जनबाट वाकओभर पाएको थियो ।

मिक्स्ड डबल्समा नेपालका तीनै जोडी क्वार्टरफाइनलमै पराजित भए । दीपेश धामी र शोभा गौचनको जोडी सिंगापुरका ड्यानी बाबा क्रिस्नाता र टान वेई हानको जोडीसँग २१–११, २१–१० को सेटमा पराजित भयो ।

विजित थापामगर र पूजा श्रेष्ठको जोडी थाइल्यान्डका पानाचाई वरासाक्तायानान र पिचायानिन युङकाको जोडीसँग २४–२२, २१–१४ को सेटमा पराजित हुँदा विकास श्रेष्ठ र सीता राईको जोडीले भारतका राजु मोहम्मद रेहान र जे अनिश कोसारको जोडीसँग २१–१६, २१–८ को सेटमा खेल गुमाएको थियो ।

प्रकाशित : मंसिर २१, २०७५ ०९:१६
पूरा पढ्नुहोस्
ADVERTISEMENT
प्रतिक्रिया
पठाउनुहोस्