ईपीएलः ललितपुरको लगातार दोस्रो जित
काठमाडौँ — भारतीय ब्याट्सम्यानद्वय गौरव तोमर र जयकिसन कोल्सावालाको शतकीय साझेदारीमा ललितपुर प्याट्रियट्सले टीभीएस एभरेष्ट प्रिमियर लिग (ईपीएल) मा पोखरा राइनोजलाई ८ विकेटले पराजित गरेको छ । ललितपुरको तेस्रो खेलमा यो दोस्रो जित हो भने पोखराको लगातार दोस्रो हार हो ।
१ सय ६७ रनको लक्ष्य ललितपुरका ओपनर गौरव र जयकिसनले पहिलो विकेटका लागि १ सय २९ रनको साझेदारी गरेपछि १६ औं ओभरमा लक्ष्य पूरा गरेको थियो ।
१३औं ओभरमा सुशान भारीको बलमा मार्की खेलाडी शक्ति गौचनको हातबाट क्याचआउट हुनुअघि जयकिसनले ३८ बलमा ३ छक्का र ४ चौकाको सहयोगमा ५१ रन बनाए ।
अर्को ओभरमा गौरव ८२ रन बनाएर पाउल कलिनको बलमा आउट भए । उनले ४१ बल खेलेर ८ छक्का र ४ चौका प्रहार गरे । सन्नी पटेलले ८ बलमा २० तथा सोनु तामङले ८ बलमा ११ रनको अविजित इनिङ्स खेले ।
यसअघि त्रिवि मैदानमा टस जितेर पहिले ब्याटिङ गरेको पोखराले निर्धारित २० ओभरमा ४ विकेट गुमाउँदै १ सय ६६ रन बनाएको थियो ।
पोखराका ओपनर रचिर्ड लेभीले विष्फोटक ८४ रनको इनिङ्स खेले पनि दशौं ओभरको अन्तिम बलमा उनी आउट भएपछि पोखराको गति सुस्ताएको थियो ।
पवन सर्राफको बलमा सन्दीप जोराको हातबाट क्याचआउट हुनुअघि लेभीले ३९ बलमा ९ छक्का र ३ चौका प्रहार गरे । पोखराका अर्का ओपनर तथा कप्तान कायल कोएट्जरले ३१ बलमा १९ रन बनाउँदा पाउल कलिन १४ रनमा रनआउट भए ।
विनोद भण्डारीले २३ बलमा ३ चौका र १ छक्काको सहयोगमा अविजित ३४ रन र राजेश पुलामीमगर २ रनमा अविजित रहे । बलिङतर्फ पवनले ३ विकेट लिए ।
प्रकाशित : मंसिर २४, २०७५ १६:०१