भारतलाई ऐतिहासिक सफलता

एएफपी

नयाँ दिल्ली — भारतीय क्रिकेट टोलीका कप्तान विराट कोहलीले अस्ट्रेलियाको मैदानमा पहिलो टेस्ट शृंखला जित्नुलाई आफ्नो खेलजीवनकै सबैभन्दा गौरवपूर्ण क्षणका रूपमा व्याख्या गरेका छन् ।

भारतका कप्तान विराट कोहली

अस्ट्रेलियामा पहिलोपल्ट टेस्ट शृंखला जितेको भारतीय टोलीले आफ्नो टेस्ट वरीयता (एक नम्बर) लाई अझै बलियो बनाएको छ । विश्वभरबाट उसलाई बधाई र प्रशंसा आइरहेको छ ।

सिड्नीमा चौथो तथा अन्तिम टेस्टको पाँचौ तथा अन्तिम दिनको खेल पनि वर्षाका कारण रद्द गरिएपछि भारतले शृंखला २–१ ले आफ्नो पक्षमा पारेको हो । सन् १९४७/४८ यता भारतले अस्ट्रेलियाली भूमिमा टेस्ट शृंखला जित्न सकेको छैन । ‘अस्ट्रेलियामा एक ऐतिहासिक क्रिकेटिङ उपलब्धि,’ भारतीय प्रधानमन्त्री नरेन्द्र मोदीले टिट गरेका छन्, ‘कडा मिहिनेतपछिको शृंखलाबद्ध जितमा भारतीय टिमलाई बधाई । शृंखलामा केही उल्लेखनीय प्रदर्शन र टिमवर्क देखियो । आगामी खेलका लागि शुभकामना ।’

भारतका महान क्रिकेटर सचिन तेन्दुलकरले पनि यो उपलब्धि भारतीय क्रिकेट टोलीका लागि अद्भूत भनेका छन् । ‘भारतीय टिमले शृंखलामा सहज जित निकालेको छ र मलाई सबै खेलाडीप्रति गर्व छ,’ सचिनले टिटरमा उल्लेख गरेका छन् ।

सिड्नीमा १ सय ९३ रनको उत्कृष्ट इनिङ्ससँगै चार टेस्टमा ५ सय २१ रन बनाएर म्यान अफ द सिरिज घोषित चेतेश्वर पुजाराको सचिनले खुलेर तारिफ गरे । ‘टेस्टमा पुजाराले सानदार ब्याटिङ गरे । मेरा लागि यही नै दुई टिमबीचको अन्तर हो । यति लामो समयसम्म क्रिजमा टिकिरहन सक्नु उनको एकाग्रता र टेस्ट क्रिकेटप्रतिको विश्वास हो,’ सचिनले लेखेका छन् ।

भारतका तीव्र गतिका बलर जसप्रित बुमराहले अस्ट्रेलियाली स्पिनर नथान लायनसँगै शृंखलामा सर्वाधिक २१ विकेट लिए । कप्तान कोहलीले यो सफलतालाई टिमको संयुक्त प्रयाससँग जोडेका छन् । ‘यो टिमको हिस्सा हुनुमा मलाई गर्व छ । यो टिममात्र होइन, परिवार हो,’ कोहलीले टिटरमा लेखेका छन् । भारतीय टोलीका पूर्व महान खेलाडीहरू भीभीएस लक्ष्मण र वीरेन्द्र सेवागले पनि टिमको जितप्रति गर्व गरेका छन् ।

उनीहरूले जितको श्रेय वर्तमान टिमका सबै सदस्यलाई दिएका छन् । जितपछि लक्ष्मणले भने, ‘सन्तुष्टि र आनन्दको यो भन्दा उत्कृष्ट नमूना अरु के होला ?’ सेवागले टिमको उपलब्धिमा गर्व लागेको बताएका छन् । पूर्व कप्तान सुनील गावस्करले भने स्टिम स्मिथ र डेविड वार्नर निलम्बनमा परेपछि कमजोर बनेको अस्ट्रेयाली टोलीमाथि भारतले जित निकालेको प्रतिक्रिया दिएका छन् ।

प्रकाशित : पुस २४, २०७५ ०८:१३
ADVERTISEMENT
प्रतिक्रिया
पठाउनुहोस्
ADVERTISEMENT

अमेरिका–चीन व्यापार युद्ध अन्त्य गर्न बेइजिङमा वार्ता 

एएफपी

बेइजिङ — अमेरिका र चीनबीच बढ्दै गएको व्यापार विवाद अन्त्य गर्न सोमबारदेखि दुई देशका अधिकारीले बेइजिङमा वार्ता सुरु गरेका छन् ।

व्यापार युद्ध अन्त्यका लागि वार्ता गर्न बेइजिङ पुगेका अमेरिकी टोली । तस्बिर : एपी

गतवर्ष दुई देशबीचको व्यापार विवादपछि चीन तथा अमेरिकाले अर्बौं डलरबराबरको सामानमा कर लगाएका थिए । गत वर्षको अन्त्यमा ९० दिनका लागि करवृद्धि स्थगित गर्ने सहमतिपछि दुई देशका अधिकारी वार्तामा जुटेका हुन् ।

वार्तामा सहभागी अधिकारीहरूबीचको वार्ता दुई देशबीच जारी व्यापार युद्ध सदाका लागि अन्त्य गर्ने विषयमा केन्द्रित हुनेछ । वार्ता दुई दिनसम्म चल्ने जनाइएको छ ।

वार्तामा अमेरिकी टोलीको नेतृत्व अमेरिकी व्यापार उपप्रतिनिधि जेफ्री गेरिसले गरेका छन् । वार्ताका विषय तथा उपलब्धिबारे भने कुनै पनि पक्षले जानकारी दिएका छैनन् ।

यद्यपि, चिनियाँ विदेश मन्त्रालयका प्रवक्ताले पत्रकारहरूसँग कुराकानी गर्दै ‘आपसी सम्मान र समानताका आधारमा द्विपक्षीय व्यापार समस्या समाधानका लागि ठोस निर्णय हुनेमा आफू विश्वस्त रहेको’ प्रतिक्रिया दिए ।

९० दिनका लागि स्थगित गरिएको करवृद्धिले तत्कालका लागि दुवै देशलाई राहत दिएको भए पनि बेइजिङ वार्ताबाट ठोस उपलब्धि हासिल हुनेमा आशंका गरिएको छ । ‘दुई पक्षबीचको मुख्य जड औद्योगिक नीति र बौद्धिक सम्पत्तिको मुद्दा हो,’ क्यापिटल इकोनोमिक्सका अर्थशास्त्री जुलियन इभान्स प्रिटचार्डले भने ।

दुई साताअघि अमेरिकी राष्ट्रपति कार्यालय ह्वाइटहाउसले दुवै पक्षले ‘प्रविधिको विस्तार, बौद्धिक सम्पत्तिको संरक्षण, साइबर अतिक्रमण तथा चोरीलगायतका मद्दाबारे कुराकानी हुने’ जनाएको थियो ।अमेरिकाले चीनको अस्वस्थ व्यापार अभ्यासले ठूलो व्यापार घाटा भएको तथा बौद्धिक सम्पत्तिको चीनले चोरी गरेको आरोप लगाउँदै आएको छ । तर चीनले उक्त आरोप निराधार भएको दाबी गर्दै आएको छ ।

त्यसैगरी, युरोपेली देशहरूले समेत कतिपय चिनियाँ कम्पनी आफ्नो राष्ट्रिय सुरक्षाका लागि खतरा भएको दाबी गर्दै आएका छन् । कतिपयले दुई ठूला अर्थतन्त्रबीचको व्यापार युद्धलाई विश्वको नेतृत्व लिने लडाइँका रूपमा समेत अथ्र्याएका छन् ।

अमेरिकी राष्ट्रपति डोनाल्ड ट्रम्पले गत जुलाईमा २ सय ५० अर्ब डलर बराबरको उपभोग्य तथा औद्योगिक चिनियाँ सामानमा कर वृद्धि गरेका थिए । त्यसको प्रतिउत्तरमा चीनले पनि अमेरिकाविरुद्ध १ सय १० अर्ब डलर बराबरको सामानमा करवृद्धि गरेको थियो । उक्त कदमपछि रुष्ट ट्रम्पले थप २ सय ६७ अर्ब डलर बराबरको सामानमा कर लगाउने घोषणापछि दुई देशबीच वार्ता भएको थियो ।

गत डिसेम्बरमा अर्जेन्टिजनाको राजधानी ब्युनस आयर्समा भएको जी २० सम्मेलनका क्रममा अमेरिकी राष्ट्रपति डोनाल्ड ट्रम्प र उनका चिनियाँ समकक्षी सी चिनफिङले ९० दिनका लागि एकअर्का देशका सामानमा करवृद्धि नगर्ने सहमति गरेका थिए । वार्ताका क्रममा चीनले कृषि, उद्योग तथा ऊर्जा क्षेत्रसँग सम्बन्धित ठोस सामग्री खरिद गर्ने सहमतिसमेत भएको अमेरिकाले जनाएको थियो ।

अमेरिका र चीनबीच सन् २०१८ को सुरुदेखि चलेको व्यापारिक युद्धपछि दुई देशका शीर्ष नेताबीच भएको त्यो पहिलो प्रत्यक्ष वार्ता हो । उनीहरूबीच करिब ३ घण्टासम्म चलेको वार्तामा दुवै मुलुकबीच व्यापार सहजीकरणका लागि आगामी दिनमा थप वार्ता गर्ने सहमति भएको थियो ।

वार्तालगत्तै चिनियाँ विदेशमन्त्री वाङ यीले ‘सम्झौताले दुई मुलुकबीच जारी आर्थिक तनाव थप चर्कन रोकिएकाले दुवै देशले जितेको’ प्रतिक्रिया दिएका थिए । चिनियाँ राष्ट्रपति सीले ‘दुई देशबीचका सहयोगी कदमले मात्र दुवै देशको शान्ति र समृद्धिको सपना पूरा हुन सक्ने’ दाबी गर्दै आएका छन् ।

प्रकाशित : पुस २४, २०७५ ०७:५१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT