फिगो र काकाको संकल्प

एएफपी

कराँची — पोर्चुगलका महान खेलाडी लुइस फिगो र ब्राजिलका सुपरस्टार काकाले बिहीबार क्रिकेटको वर्चस्व रहेको पाकिस्तानमा फुटबलको विकासका लागि ‘महान संकल्प’ गरे ।

कराँचीमा क्रिकेट ब्याट चलाउँदै पोर्चुगलका लुइस फिगो ।तस्बिर : एएफपी

दक्षिण एसियाली देश पाकिस्तान जहाँ क्रिकेटको दबदबा छ र त्यहाँको फुटबल संघ अन्तर्राष्ट्रिय फुटबल महासंघ (फिफा) बाट दुईपल्ट प्रतिबन्धमा परिसकेको छ ।

Citizen

स्पेनिस क्लब रियल म्याड्रिडबाट खेलिसकेका दुई लिजेन्डले वल्र्ड सकर स्टार्स टूरअन्तर्गत पाकिस्तानको एकदिने भ्रमण गरे । जसको उद्देश्य प्रदर्शनी खेल र कोचिङ सिविरको माध्यमबाट नयाँ प्रतिभा तयार गर्नु हो ।

पाकिस्तानको दक्षिणी सहर कराँचीमा लोकप्रिय खेल क्रिकेटको ब्याट बोकेर पत्रकारसामु उपस्थित भएका सन् २००० का बालोन डी’ओर विजेता फिगो ‘उत्साही’ देखिए । ‘पाकिस्तानी फुटबलका लागि महान संकल्प भएको छ र हामी यही खेलको विकासका लागि यहाँ आएका हौं,’ सन् २००९ मा संन्यास लिनुअघि बार्सिलोनाबाट खेलेका फिगोले भने ।

अर्कोतर्फ काकाले क्रिकेट बल बोकेका थिए । दुवैले विश्वस्तरमा फुटबल प्रवद्र्धन गर्न आफूहरू प्रतिबद्ध रहेको सुनाए ।
‘हामीलाई पाकिस्तानप्रति एउटा राम्रो छाप छ,’ २०१७ मा संन्यास लिनुअघि इटलियन क्लब एसी मिलानबाट व्यावसायिक फुटबल खेलेका र २००७ का फिफा बालोन डी’ओर जितेका काकाले भने ।

सन् १९७० को सुरुआतसम्म पाकिस्तान एसियालीस्तरमा शीर्ष १० भित्र रहन्थ्यो । तर अहिले त्यो इतिहास भइसकेको छ । सरकारी बेवास्ता र कमजोर पूर्वाधारका कारण पाकिस्तान फिफा वरीयातामा १९९ औं स्थानमा छ ।

पाकिस्तान सन् १९९५ र २०१७ मा फिफाद्वारा प्रतिबन्धमा परिसकेको छ । फिफाले आफ्नोमातहतका संघहरूमा सम्बन्धित देशको सरकार तथा न्यायिक हस्तक्षेप भएको स्वीकार गर्दैन ।

पछिल्लो प्रतिबन्ध सन् २०१८ मा हटाइएको थियो । यद्यपि गत महिना नेतृत्वका लागि भएको चुनावको नतिजालाई संघका प्रमुखले अस्वीकार गरेका छन् । दक्षिण एसियाली देशको करिब २० करोड जनताका लागि सबैभन्दा प्रिय क्रिकेट नै हो । जसले गर्दा पकिस्तानले अहिलेसम्म फिफा विश्वकपमा स्थान बनाउन सकेको छैन ।

सन् २०१७ मा ब्राजिलियन महान् खेलाडी रोनाल्डिन्होसहित ८ अन्तर्राष्ट्रिय सुपरस्टारको भ्रमणले साबित गरिदिएको छ कि यस देशमा फुटबलको लोकप्रियता फर्कंदै छ । युवाहरू क्रिस्टियानो रोनाल्डो, लियोनल मेसी र लुका मोड्रिचलाई मनपराउँछन् ।
फिगो र काकाले सन् २०२६ मा अमेरिका, मेक्सिको र क्यानडाद्वारा संयुक्त रूपमा आयोजना गर्न लागेको विश्वकपमा सहभागी टोलीको संख्या ३२ बाट बढाएर ४८ बनाउने फिफाको योजनाप्रति समर्थन गरेका छन् ।

‘यसको मतलब ‘धेरै खेलाडी धेरै अवसर,’ फिगोले भने । र, काकाले उद्घोष गरे– पाकिस्तान यस अवसरलाई सदुपयोग गर्दै छिट्टै विश्वकपमा देखिनेछ ।

पाकिस्तान फुटबल टिमका कप्तान सद्दाम हुसेनले पनि फिगो र काकालाई भेट गरेका छन् । कराँचीमा दुवै सुपरस्टारले युवा प्रसंसकलाई अटोग्राफ दिएको र सेल्फी दिए । कराँचीपछि यी दुई लाहोर जानेछन् । उनीहरू अप्रिल २३ देखि २६ सम्म हुने प्रदर्शनी खेल र प्रशिक्षण सिविरका क्रममा पनि पाकिस्तान फर्कने छन् ।

प्रकाशित : पुस २७, २०७५ ०९:०२
प्रतिक्रिया
पठाउनुहोस्

‘व्यापार विवाद चाँडै समाधान हुन्छ’

एएफपी

बेइजिङ — चीनले अमेरिकी प्रतिनिधिमण्डलसँग भएको वार्तामा उल्लेख्य प्रगति भएको जनाउँदै व्यापार विवाद चाँडै समाधान हुने बताएको छ । बेइजिङमा भएको वार्तामा दुई देशबीच जारी व्यापार विवाद समाधान गर्ने आधार तयार भएको चीनले बिहीबार जनाएको छ ।

अमेरिका र चीनबीच लामा समयदेखि जारी व्यापार विवाद अन्त्यका लागि वार्ता गर्न अमेरिकी प्रतिनिधिमण्डल सोमबार बेइजिङ पुगेको थियो । गत डिसेम्बरमा जी–२० सम्मेलनको अवसरमा अर्जेन्टिनामा अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चिनफिङबीच दुई देशले गरेको करवृद्धि ९० दिनका लागि नबढाउने सहमति गरेका थिए ।

उनीहरूबीच समस्या समाधानका लागि वार्ता गर्ने निर्णय भएबमोजिम अमेरिकी प्रतिनिधिमण्डल चीन पुगेको हो । ‘दुवै देशका वार्ता टोलीले ‘सविस्तार, गहिराइमा पुगेर र सावधानीपूर्वक’ विचारहरूको आदानप्रदान गरेका छन् । जसले आपसी समझदारी बढेको छ र आपसी चासोका विषय समाधान गर्ने आधार तयार भएको छ,’ चिनियाँ वाणिज्य मन्त्रालयद्वारा जारी विज्ञप्तिमा भनिएको छ, ‘दुवै पक्षले निकट सम्बन्धलाई स्थापित गर्दै अघि बढ्ने विषयमा सहमति भएको छ ।’

दुई देशबीचको वार्तामा आगामी मार्चयता व्यापार विवाद अन्त्य गर्न सम्झौता गर्ने र थप करवृद्धि रोक्ने विषयमा दुवै पक्ष सकारात्मक भएको जनाइएको छ । वार्तामा अमेरिकी पक्षले आफ्ना प्रविधि र बौद्धिक सम्पत्तिको बलजफती रूपान्तरण र चोरी गरेको आरोप लगाउनुका साथै चिनियाँ कम्पनीलाई अधिक सरकारी अनुदान दिएर अमेरिकी उत्पादनलाई धराशयी पार्ने प्रवृत्ति रोक्न माग गरेको छ । यसबारे सोधिएको प्रश्नमा चीनका वाणिज्य मन्त्रालयका प्रवक्ता गाओ फेङले भने, ‘वार्तामा संरचनागत विषयलाई केन्द्रित गरिएको छ ।’

बेइजिङ वार्तामा सहभागी अमेरिकी व्यापार तथा कृषि मामिला उपमन्त्री टेड म्याककिन्नीले भने, ‘वार्ता निकै सकारात्मक भएको छ ।’ गत मंगलबार अमेरिकी राष्ट्रपति ट्रम्पले ट्वीट गर्दै चीनमा जारी व्यापार वार्ता निकै राम्रोसँग अघि बढेको बताएका थिए ।
अमेरिकाले व्यापार असन्तुलन बढेकाले ट्रम्प प्रशासनले बेइजिङमाथि बढीभन्दा बढी अमेरिकी सामान खरिद गर्न दबाब दिएको र चिनियाँ बजार विदेशी कम्पनीका लागि सहज बनाउन आग्रह गरेको छ ।

अमेरिकी वाणिज्य मन्त्री विल्बर रोसले अमेरिकी टेलिभिजन सीएनबीसीलाई बुधबार दिएको अन्तर्वार्तामा दुवै मुलुकबीच सम्झौता हुने प्रवल सम्भावना रहेको बताएका थिए । ‘व्यापार युद्धबाट चिनियाँ अर्थतन्त्रलाई बढी नोक्सान हुनेछ । चीनले अरू मुलुकको भन्दा बढी सामान अमेरिकामै बिक्री गर्दछ ।’

प्रकाशित : पुस २७, २०७५ ०८:४३
पूरा पढ्नुहोस्
प्रतिक्रिया
पठाउनुहोस्