पोखरा कप : आर्मीलाई डफिन्सको धक्का

कान्तिपुर संवाददाता

लेखनाथ — अधिकांस दोस्रो रोजाइका खेलाडी उतारेको त्रिभुवन आर्मी क्लबविरुद्ध क्यामरुनी क्लब डफिन्स टिम फेमिलीले फराकिलो गोलअन्तरले जित हासिल गर्दै सेमिफाइनल तय गरेको छ ।

छैटौं मनकामना केबुलकार पोखरा कपमा सोमबार आर्मीका सन्जिव मोक्तान (हरियो) लाई रोक्न खोज्दै डफिन्सका निया । तस्बिर : दीपक परियार/कान्तिपुर

Citizen

शनिबारमात्र इटहरीमा मदन भण्डारी स्मृति इटहरी गोल्डकप जितेको आर्मीलाई पाहुना टोलीले छैटौं मनकामना पोखरा कप फुटबलको क्वाटरफाइनलमा ४–१ ले हराएको हो ।

पोखरा रंगशालामा सोमबार डफिन्सले लगातार ४ गोल गर्दा आर्मीले खेलको अन्तिम समयमा एक गोल फर्कायो । पहिलो हाफको इन्ज्युरी समयमा डफिन्सका यान्निक ओवनाले गोल गर्दै खाता खोले । रेफ्रीले थप दुई मिनेट सकिएर सिठी फुक्नुअघि उनले गोल गरेका थिए । अट्याकिङ डिफेन्स इकवेमको लामो पासलाई यान्निकले नियन्त्रणमा लिए । विपक्षी डिफेन्सले मार्क नगरेको अवस्थामा उनले सहजै गोल गरे ।

पावर गेम खेलेको डफिन्सका बलिया र अग्ला कदका खेलाडीसामु टेक्निकल खेलेको आर्मी निरीह बन्यो । डफिन्सले दोस्रो हाफमा एकपछि अर्को गोल थप्दै जित सुनिश्चित बनायो । ६० औं मिनेटमा यान्निकले व्यक्तिगत दोस्रो गोल गर्दै अग्रता दिलाए । उनले डाइडर टिनाको क्रस सदुपयोग गरेका थिए । आर्मेल आहान्दाले ६८ औं मिनेटमा तेस्रो गोल गर्दा आर्मीका खेलाडी हतास देखिए ।

दुई डिफेन्सलाई बिट गर्दै अघि बढेका आर्मेलले गोल थपेपछि डफिन्स बलियो बन्यो । उसको गोल गर्ने क्रम त्यतिमै रोकिएन । दोस्रो हाफको इन्ज्युरी समयमा समेत विपक्षीलाई दबाबमा राख्दै डफिन्सले गोल गर्न छोडेन । इन्ज्युरी समयको पहिलो मिनेटमा ओको बोटाले बल विपक्षीको गोललाइन पार गराउँदै चौथो गोल गरेर बिट मारे ।

त्यसको तीन मिनेटपछि आर्मीका विवेक बस्नेतले एक गोल फर्काए । ४–१ ले पछि परिसकेकाले आर्मीका खेलाडीले गोलको खुसीसमेत मनाउन सकेनन् । आर्मीले पाएका केही अवसर चुकायो । ४२ औं मिनेटमा सुदील राईले पेनाल्टी एरियाबाटै प्रहार गरेको कडा प्रहार आकासिएपछि आर्मी सम्भावित अग्रता लिनबाट चुक्यो । त्यसअघि राजु आलेको फ्रिकिक क्यामरुनी गोलकिपर प्रिसो एनडिजंगाले बचाउ गरे ।

यद्यपि डफिन्सले सुरुदेखि नै आर्मीलाई दबाबमा राखेको थियो । ३९ औं मिनेटमा ओवनाको हेडिङ सेकेन्ड बारमा लागेर रिवाउन्ड भयो । त्यसमा एन्जामा यान्निकले प्रहार गरे पनि गोलकिपर विश्वास चौधरीले बचाए । खेलको ४१ औं मिनेटमा पनि ओवनाले कर्नरबाट नियोले दिएको पासलाई हानेको हेड क्रसबार माथिबाट बाहिरियो ।

आर्मीका प्रशिक्षक गंगा देउजाले पहिलो र दोस्रो रोजाइका खेलाडी मिसाएर खेलेकाले स्कोरिङमा समस्या देखिएको बताए । ‘डिफेन्समा तालमेल मिलेन,’ उनले भने, ‘खेलमा लय लिन नसक्दा स्कोरिङमा समस्या भयो ।’ उनले लगातार प्रतियोगिता खेल्दै आएका पहिलो रोजाइका खेलाडीलाई आराम आवश्यक परेकाले दोस्रो रोजाइका खेलाडी मैदान उतारेको बताए । भुटानमा हुने प्रतियोगितामा भाग लिन जाने तयारी भएकाले मुख्य खेलाडीलाई आराम चाहिएको उनले उल्लेख गरे ।

रिस्सोको दाउ
मंगलबार क्वाटरफाइनलमा जापानको रिस्सो युनिभर्सिटी र पुलिस क्लबबीच प्रतिस्पर्धा हुँदै छ । आयोजक कास्की जिल्ला फुटबल संघको आतिथ्यतामा पोखरा आइपुगेको रिस्सो प्रतियोगित जित्ने दाउमा छ । आइतबार राति पोखरा आइपुगेको टिमले सोमबार बिहान पोखरा रंगशाला पुगेर अभ्यास गर्‍यो ।

युनिभर्सिटीका प्रमुख सुगिता मामोरुले विपक्षी पुलिसको खेल थाहा नभए पनि आफ्नो टिमले आक्रामक रणनीति लिने बताए । ‘हाम्रो टिम जापानमा युनिभर्सिटीबीच डिभिजन १ स्तरको लिग खेल्ने तयारी गरेको टिम हो,’ उनले भने, ‘यहाँको मैदानमा गाह्रो भए पनि फुटबल हो, खेल्नुपर्छ ।’

प्रशिक्षक तो काई रिनले पोखरामा फुटबलप्रति दर्शकको लगाव देखेर खुसी भएको बताए । उनले प्रतियोगिता जित्ने नै तयारी गरेको दाबी गरे । आगामी दिनमा हुने अन्य प्रतियोगितामा भाग लिन पनि आफूहरू लालयित भएको उनले उल्लेख गरे । २० खेलाडी र ४ अफिसियलसहित पोखरा आएको टोलीको संयोजन भने पूर्व राष्ट्रिय फुटबल खेलाडी एवं जापानमा फन रुट्स फुटबल एकेडेमी सञ्चालन गरेका वसन्त गौचनले गरेका हुन् ।

प्रकाशित : माघ २२, २०७५ ०९:०७
प्रतिक्रिया
पठाउनुहोस्

शीर्ष वरीयताका खेलाडीको जित

दीपक परियार

लेखनाथ — अन्तर्राष्ट्रिय टेनिस महासंघ (आईटीएफ) को आयोजनामा पोखरामा सोमबारदेखि आईटीएफ यू–१८ जुनियर टेनिस च्याम्पियनसिप सुरु भएको छ ।

पोखरामा सोमबार सुरु आईटीएफ यू–१८ जुनियर टेनिसमा महिला एकलतर्फ प्रतिस्पर्धा गर्दै चीनकी ली यु लिउ ।

पोखरा रंगशालास्थित टेनिस कोर्टमा पुरुषतर्फ फिलिपिन्सका जोसे एन्टोनियो ट्रिया र महिलातर्फ चीनकी ली यु लिउले विजयी भएका छन् । दुवै प्रतियोगिताका शीर्ष वरीयताप्राप्त खेलाडी हुन् ।

जोसे पुरुषतर्फ आईटीएफ र्‍याङकिङमा ४२८ औं स्थानमा छन् । लिउ महिला आईटीएफ र्‍याङकिङको ६०५ औ स्थानमा छिन् । जोसेले भारतका फैज नस्यामलाई ६–२, ६–३ ले हराए । लिउले भारतकी श्रेया चक्रवर्तीविरुद्ध ६–०, ६–३ को सोझो सेटमा विजय पाइन् ।

पुरुषमै हङकङका केल लोक इन ताङले नेपालका प्रणव खनाललाई ६–३, ६–१ ले, भारतका अनुराग अग्रवालले नेपालका आर्यन गिरीलाई ६–३, ६–० ले, भारतका जेराल यासिनले श्रीलंकाका कभिसा रत्नाइकेलाई ६–३, ६–१ ले हराए ।

चीनका चेन लियाङले नेपालका अभिनव आचार्यलाई ६–१, ६–१ ले, जर्मनीका पाउल आर्मिन अल्ब्रेच्टले नेपालका सम्यक वज्राचार्यलाई २–६, ६–२, ६–२ ले, भारतका दीपेन्दर ग्रेवालले मलेसियाका जियान कियोन ताकेसीलाई ६–४, ६–४ ले, चीनका जी छुवान लीले श्रीलंकाका दिलान हेराथलाई ६–२, ६–० ले, भारतका आदित्य वरदान रोयले मलेसियाका हेडन खु मेनन्लाई ६–०, ६–२ ले र जापानका ताकुमी वातानेवले थाइल्यान्डका पोस्वात अकरपनालाई ६–१, ६–४ ले पराजित गरे ।

महिलातर्फ भारतकी श्रृष्टि धीरले नेपालकी इशा श्रीलाई ७–५, १–६, ६–२ ले, चीनकी कुङलिङ जाङले नेपालकी एनी माथेमालाई ६–१, ६–२ ले, दक्षिण कोरियाका जुमिन कोन्सले भारतका लेफिन जमिरलाई रिटायर्ड हर्टमा पराजित गरे । चीनकी जियु झाङले नेपालका शुभांगीलक्ष्मी शाहलाई ६–०, ६–२ ले, जापानकी जुलिया धैया वार्देनले नेपालकी प्रकृति श्रेष्ठलाई ६–१, ६–० ले र चीनकी इटोङ झाङले नेपालकी अल्सा रेग्मीलाई ६–०, ६–२ ले हराए दोस्रो चरणमा प्रवेश गरे ।

यसअघि ग्रेड ५ लेभलको जुनियर टेनिसमा शनिबार र आइतबार भएको क्वालिफाइङ राउन्डबाट ४ महिला र ४ पुरुष खेलाडी यस प्रतियोगितालाई छानिएका थिए । प्रतियोगिता संयोजक अजय विष्टले प्रतियोगिताबाट वल्र्ड र्‍याङकिङमा नम्बर जोडिने भएकाले विदेशी खेलाडी नेपालमा खेल्न लालयित भएको बताए । च्याम्पियनसिप पोखरा रंगशालामा फागुन ४ सम्म चल्नेछ ।

प्रकाशित : माघ २२, २०७५ ०९:०५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT