एपीएफले खेल जित्यो, रिस्सोले मन

दीपक परियार

लेखनाथ — फिँजिएर खेल्ने खेलाडी । अनुशासन उस्तै । १७–२१ वर्षे जापानी खेलाडीको खेलकौशल देखेर पोखराका भेट्रान फुटबलर आनन्द रन्जित लोभिए । नेपाल पुलिस क्लबसँग क्वाटरफाइनल खेल हेरेपछि उनले जापानको रिस्सो युनिभर्सिटीको टिम फाइनल पुग्ने अड्कल काटे ।

छैटौं मनकामना केबलकार पोखरा कपको सेमिफाइनलमा शुक्रबार प्रतिस्पर्धा गर्दै एपीएफ (रातो) रिस्सो युनिभर्सिटीका खेलाडी । तस्बिर : दीपक/कान्तिपुर 

मंगलबार पुलिसलाई १–० ले हराएकाले धेरै दर्शक रिस्सोको समर्थनमा देखिए । तिनै दर्शक प्रतिकूल मौसमका बाबजुद पनि रिस्सो र एपीएफ क्लबबीचको सेमिफाइनल हेर्न शुक्रबार रंगशाला झुल्किए ।

दर्शकले रिस्सोकै खुबै पक्ष लिए । पोखराको मैदानमा जापानको गुणस्तरीय खेल हेर्न पाएको चर्चा भयो । उनीहरू चाहन्थे टिम फाइनलसम्म पुगोस् । चाहनाको पछाडि एउटै कारण थियो, आधुनिक फुटबल हेर्ने । शुक्रबारको परिणामले दर्शकलाई निराश बनायो । खेलमा रिस्सो टाइब्रेकरमा पराजित हुनुपर्‍यो । पाहुना टोलीलाई घर फर्काउनुपर्दा बादल लागेर धुमिल भएको आकाशजस्तै मन लिएर दर्शक रंगशालाबाट बाहिरिए ।

उत्कृष्ट प्रदर्शनका बाबजुद रिस्सो फुटबल क्लब छैटौं मनकामना पोखरा कप फुटबलको सेमिफाइनलमा एपीएफसँग पराजित भयो । निर्धारित र थपिएको ३० मिनेटमा दुवै टोलीबाट कुनै गोल नभएपछि पेनाल्टी शुटआउटबाट नतिजा निकालियो । खेल ४–१ ले एपीएफको पक्षमा पर्‍यो । थपिएको ३० मिनेटमा मात्रै एक पछि अर्को गर्दैै ९ पल्टसम्म विपक्षी गोलपोस्टमा गरेको प्रहार रिस्सोले गोलमा परिणत गर्न नसक्नु दुर्भाग्य ठहरियो । जसले गर्दा खेल टाइब्रेकरमा पुग्नु बेफाइदाजनक बन्यो ।

पेनाल्टी शुटआउटमा पहिलो गोल एपीएफका कप्तान सुदीप सिख्राकारले गरे । रिस्सोको तर्फबाट नात्सुकी ताकेदा पहिलो पेनाल्टी हान्न तम्सिए । उनको प्रहार एपीएफका गोलकिपर राजु नगरकोटीले बचाए । जितको सम्भावना बलियो भयो । ताकुतो योसिनोको प्रहार क्रसबार माथिबाट बाहिरिएपछि एपीएफका खेलाडीमा खुसीको सीमा रहेन । एपीएफका आशिष लामा, राजीव लोप्चन र गोलकिपर राजुले पेनाल्टीमा गोल गरेर टिमलाई फाइनल पुर्‍याए । रिस्सोका कप्तान ताकुया हितोमीले एकमात्र गोल गरे ।

विपक्षीलाई निकै दबाबमा राखे पनि रिस्सोले स्कोरिङ निकाल्न सकेन । एकपछि अर्को गोलको अवसर सिर्जना गरेको रिस्सोलाई एपीएफले निर्धारित समयसम्म रोकेरै राख्यो । विपक्षी गोलकिपर राजु रिस्सोका लागि मुख्य बाधक बने । एपीएफका डिफेन्स मानव पर्खालझैं उभिएका छँदै थिए । जापानी प्रशिक्षक ताकेसी तोकाइरिनले विपक्षी डिफेन्सको प्रशंसा गरे । भने, ‘सबै डिफेन्स गोलकिपरसरह खेले । त्यसैले हामीलाई गाह्रो भयो ।’ हुनपछि खेल ७०–३० को थियो । रिस्सोका स्ट्राइकरले गर्ने प्रत्येक प्रहार गोलकिपरले रोक्थे । रिबाउन्ड बल डिफेन्सले क्लियर गर्थे । रिबाउन्ड बलमा आफ्ना खेलाडीले स्कोर गर्न नसक्दा खेलमा पराजित हुनुपरेको प्रशिक्षक तोकाइरिनको तर्क छ ।

खेलको १२ औं मिनेटमै रिस्सोले पहिलो आक्रमण गर्‍यो । केसुकी ओमुरोको क्रसलाई योजी फुजिमोरीले पेनाल्टी एरियाबाटै ब्याकहिल किक प्रहारलाई विपक्षी किपरले पन्च गर्दै कर्नर अवसर दिलाए । दोस्रो हाफमा पनि एपीएफलाई दबाबमा राख्यो । ५३ औं मिनेटमा कप्तान ताकुया हितोमीको प्रहार एपीएफका गोलकिपरले पन्च गर्दै विफल बनाए । गोलकिपरबाट रिबाउन्ड बललाई केसुकी अमुरोले प्रहार गरे । उक्त बल राजुले नियन्त्रण गर्दै टोलीको जित आशा मर्न दिएनन् । ७३ औं मिनेटको अवसर पनि पाहुना टोलीले सदुपयोग गर्न सकेन । योजी फुजिमोरीको कडा प्रहार गोलरक्षक राजुले पन्च गर्दै बचाए ।

खेलको ८४ आंै मिनेटमा ताकुया हितोमीको प्रहार विपक्षी गोलकिपरले पन्च गरेर जोगाए । रिबाउन्ड बललाई योता उमिहाराले हेडिङ गरे पनि क्रस बारमाथिबाट बाहिरियो । खेलको ८६ औं मिनेटमा पाएको कर्नरलाई नात्सुकी ताकेदाले प्रहार गरे । उमिहाराले हानेको हेडिङ सेकेन्ड बार नजिकैबाट बाहिरियो ।

रक्षात्मक खेलेको एपीएफविरुद्ध सफल नहुँदा निर्धारित समय गोलरहित बराबरीमा टुंगिँदै ३० मिनेट लम्बियो । अतिरिक्त समयमा रिस्सोले विपक्षी पोस्टमा धेरै प्रहार गर्‍यो । प्रत्येकपल्टको प्रहार विपक्षी गोलकिपरले उत्कृष्ट बचाउ गरे ।

अतिरिक्त समयको तेस्रो मिनेटमा यासुताका सुजुकीको क्रस उमिहाराले वान टचमा हितोमीलाई पास दिए । हितोमीले गोल एरियाभित्रैबाट प्रहार गरेको बल सेकेन्डबारमा लागेर रिबाउन्ड भयो । उक्त बल विपक्षी डिफेन्सले क्लियर गरे । लगत्तै चौथो मिनेटमा विपक्षी गोलकिपर धेरै अघि बढेको अवस्थामा गोलपोस्ट खाली हुँदा मासाकी कानेउराले पेनाल्टी एरियाबाट गरेको प्रहार आकासिन पुग्यो । एपीएफले भने खेल अवधिभर उत्कृष्ट प्रहार रच्न सकेन । गोलबाट बच्न नै समय खर्चियो । विपक्षीको एकपछि अर्को प्रहार रोकेका एपीएफ गोलकिपर राजुमाथि न्याय भयो । उनी म्यान अफ द म्याच भए ।

त्यसो त अप्रत्यासित जितले एपीएफका प्रशिक्षक राजेन्द्र तामाङलाई चकित तुल्यायो । ‘उनीहरूको खेल्ने तरिका नै फरक छ,’ उनले भने, ‘उनीहरूकै तरिकाले हामी खेलेको भए धेरै गोलको अन्तरले हार बेहोर्नुपथ्र्यो । त्यसैले डिफेन्सलाई महत्त्व दिएर खेल्यौं ।’ गोलकिपरको प्रदर्शनले टिमलाई फाइनलसम्म पुर्‍याएको उनले उल्लेख गरे । उनको टिम शनिबार लिग विजेता मनाङ मस्र्याङदी र क्यामरुनको डफिन्स टिम फेमिलीबीच हुने दोस्रो सेमिफाइनल विजेतासँग आइतबार फाइनल खेल्नेछ ।

शुक्रबारको खेलमा अचम्मको संयोग थियो । एपीएफ सम्हालेका तामाङ पोखराकै हुन् । रिस्सोलाई जापानबाट पोखरा ल्याउने वसन्त गौचनको घर पनि पोखरा हो । दुवै नेपालको राष्ट्रिय टोलीबाट अन्तर्राष्ट्रि प्रतियोगिता खेलिसकेका खेलाडी हुन् । खेलपछि दुवैले बधाई साटासाट गरे । भेट्रान फुटबलर आनन्द रन्जितले दुवैलाई धाप मार्दै भने, ‘एपीएफले खेल जित्यो, रिस्सोले मन ।’

प्रकाशित : माघ २६, २०७५ ०९:३०
ADVERTISEMENT
प्रतिक्रिया
पठाउनुहोस्
ADVERTISEMENT

सरस्वती र धनबहादुरलाई अवार्ड

कान्तिपुर संवाददाता

काठमाडौँ — एपीएफकी सरस्वती चौधरी र त्रिभुवन आर्मी क्लबका धनबहादुर भट्ट प्लेयर अफ द इयर अवार्डबाट सम्मानित भएका छन् । 

प्लेयर अफ द इयर अवार्ड विजेता एपीएफकी सरस्वती चौधरी ।


नेपाल भलिबल संघले हालै आयोजना गरेको एनभीए अवार्डमा उत्कृष्ट बनेका महिलातर्फ सरस्वती र पुरुषतर्फ धनबहादुरले ३० हजार रुपैयाँ राशिको प्लेयर अफ द इयर अवार्ड पाएका हुन् । राष्ट्रिय खेलकुद परिषद्का उपाध्यक्ष पिताम्बर तिम्सिनालगायतले खेलाडीलाई अवार्ड वितरण गरे । धनबहादुर अहिले रामेछाप सिभिल च्याम्पियनसिप भलिबलमा व्यस्त रहेकाले उनी अवार्ड वितरणमा उपस्थित थिएनन् ।

डेढ वर्षअघि भलिबल नेपालको राष्ट्रिय खेल भएलगत्तै संघका अध्यक्षसमेत रहेका मनोरन्जन रमण शर्माले १० लाख रुपैयाँको अक्षय कोषको स्थापना गरेका थिए । त्यही रकमको ब्याजबाट वार्षिक रूपमा १–१ महिला र पुरुष खेलाडीलाई नगदसहित सम्मान गर्ने परम्परा यसपालिदेखि थालनी भएको हो ।

‘म भलिबल संघमा रहे पनि नरहे पनि वा म जीवित रहुन्जेलसम्म यो अक्षय कोषमार्फत खेलाडीको हितका लागि लगानी हुनेछ,’ अवार्ड कार्यक्रममा शर्माले भने, ‘भविष्यमा मेरा छोरानातिले यसमा रकम थप गरी सहयोग गर्न सक्नेछन् ।’

राष्ट्रिय टोलीकी मुख्य स्पाइकरसमेत रहेकी सरस्वतीले घरेलु प्रतियोगिताका नौमध्ये ८ उपाधि एपीएफलाई दिलाउन महत्त्वपूर्ण भूमिका खेलेकी थिइन् । पछिल्लो समय एपीएफ टिम नै सरस्वतीको प्रदर्शनप्रेरित छ ।

सर्भर धनबहादुरले घरेलु भलिबलमा आर्मीको टिमको प्रदर्शनमा निर्णायक भूमिका खेल्दै आएका छन् । राष्ट्रिय टोलीमा पनि उनले नियमित उत्कृष्ट प्रदर्शन गरिरहेका छन् ।

नेपालले अर्को वर्ष भदौमा एसियाली सेन्ट्रल जोन भलिबलको आयोजना गर्दै छ । जहाँ ९ टिमको सहभागिता रहने छ । भलिबल संघका महासचिव जितेन्द्रबहादुर चन्दले निर्माणाधीन राखेप कभर्डहल समयमै सम्पन्न भए प्रतियोगिता गर्न सहज हुने बताए ।

राखेप उपाध्यक्ष तिम्सिनाले राष्ट्रिय खेल विकासका लागि सबै सरोकारवालासँग सर्वपक्षीय छलफल गरी योजना बनाउने आश्वासन दिए ।

प्रकाशित : माघ २६, २०७५ ०९:२६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT