डीपीएल र मौसमको बेमेल, दुई दिन पछि धकेलियो खेल

विनोद पाण्डे

धनगढी — पश्चिमी वायुको प्रभावले अचानक मौसम बिग्रिएपछि शनिबार सुरु हुने भनिएको रुस्लान धनगढी प्रिमियर लिग (डीपीएल) क्रिकेट दुई दिन पछाडि धकेलिएको छ । निर्धारित तालिकाअनुसार धनगढी स्टार्स र विराटनगर किंग्सको खेलबाट शनिबार डीपीएल सुरु हुँदै थियो ।

तर बुधबार रातिदेखि परेको वर्षाले मैदान पुरै हिलाम्मे बनाएको छ । शुक्रबारसम्म मौसम खुलिसकेको छैन । आयोजक धनगढी क्रिकेट एकेडेमीले मैदान खेल्ने स्थिति नरहेको अवस्थामा प्रतियोगिता दुई दिन पछाडि सार्दै पछि सोमबार सुरु गर्दै छ । प्रतियोगितामा शुक्रबार एकदिन मात्र विश्राम दिन राखिएको छ ।

Citizen

‘आगामी दुई दिन हामी खेल आयोजना गर्ने स्थितिमा छैनौं । टाइसिट नै पुन: प्रकाशित गरेका छौं । एकदिनमात्र विश्राम दिन राखेका छौं, अब खेल बिथोलियो भने पनि विश्रामका दिन पनि कुनै खेल हुने छैन, अंक बाँडिने छ । एउटा विश्राम दिन र एक खेल भएका दिनमा लगेर सारिएका खेलहरू समेट्दै टाइसिट मिलाएका छौं,’ प्रतियोगिताका निर्देशक विनोद दासले भने, ‘टाइसिट मिलाउँदा पनि कुनै टोलीले लगातार ४–५ वटा म्याच खेल्नुपर्दैन । सबै टिमका कप्तान र व्यवस्थापकसँग सल्लाह गरेर हामीले यो निर्णय गरेका हौं ।’

नयाँ तालिकाअनुसार सोमबार पहिलो दिन काठमाडौं गोल्डेन्स र धनगढी स्टार्स तथा रूपन्देही च्यालेन्जर्स र महेन्द्रनगर युनाइटेडबीच प्रतिस्पर्धा हुनेछ । मंगलबार सीवाईसी अत्तरिया र धनगढी तथा विराटनगर किंग्स र रूपन्देही भिड्दै छन् ।

ट्रफी सार्वजनिक
विश्व क्रिकेटका हस्ती जोन्टी रोड्स र डीपीएल आयोजक धनगढी क्रिकेट एकेडेमीका अध्यक्ष सुवास शाहीले यसअघि ट्रफी सार्वजनिक गरेका थिए । सो अवसरमा ६ फ्रेन्चाइज टोलीका कप्तान र मालिकलाई पनि उभ्याइएको थियो । दक्षिण अफ्रिकी क्रिकेटर रोड्सले भने, ‘मैले विभिन्न देशमा विभिन्न टिमसँग काम गरिसकेको छु । अहिले म जसले केही परिवर्तन गर्न खोजिरहेका छन्, तिनीहरूसँग काम गर्न खोजिरहेकाले धनगढी आइपुगेको छु ।’ उनी डीपीएलको फ्रेन्चाइज टोली सीवाईसी अत्तरियाका मेन्टर पनि हुन् ।

जोगाउन सजिलो छैन : सोमपाल
धनगढी स्टार्सका कप्तान सोमपाल कामीले उपाधि जोगाउन सजिलो नभएको बताए । टिम चौराह धनगढीले डीपीएलको पहिलो दुई संस्करण जितेको थियो । सोमपालले पछिल्लो संस्करण गत वर्ष टिम चौराह धनगढीबाट खेलेका थिए । स्वामित्व परिवर्तन आएसँगै टोलीको नाम पनि परिवर्तन भई धनगढी स्टार्स बनेको छ ।

‘उपाधि जोगाउन गाह्रो भइहाल्छ । गत वर्ष धेरै राम्रो प्रदर्शन गरेर जितेका थियौं, त्यो भन्दा अगाडि पनि धनगढीले जितेको थियो । दबाब त नभनौं, एउटा नयाँ टिम लिएर खेल्दा चुनौती त भइहाल्छ । त्यही पनि आफ्नो टोलीमाथि पूरा विश्वास छ । मौसमले क्याम्प हुन दिएको छैन । त्यही पनि फिटनेस क्याम्प गरिरहेका छौं । होटलभित्र बसेर पनि क्रिकेटकै बारेमा छलफल गरिरहेका छौं । जहिल्यै खेल हुन्छ त्यसका लागि तयार छौं,’ सोमपालले भने ।

उनका अनुसार टोलीका दुवै विदेशी खेलाडी शनिबार धनगढी आइपुग्ने छन् । पहिला इन्डियन प्रिमियर लिग खेल्ने सागर त्रिवेदी खेल्न आउने निश्चित भएको थियो । तर भारतीय क्रिकेट बोर्डले स्विकृति नदिएपछि उनको स्थानमा यूएईबाटै अमिर हायत आउने सोमपालले जनाए ।

यूएईका कप्तान रोहन मुस्ताफासहित सौरभ खनाल, सुनील धमला, हरिबहादुर चौहानजस्ता खेलाडी भएकाले धनगढीलाई पुन: बलियो टोलीमा उभ्याएको छ । सोमपाल मैदानबाहिरको यो विश्लेषण मान्दैनन् । ‘जति बलियो भए पनिट्वान्टी–२० मा प्रतिस्पर्धा धेरै हुन्छ ।

ट्वान्टी–२० सानो र फास्ट संरचनाको खेल हो । ३–४ जनाले प्रदर्शन गर्ने बित्तिकै टिम सन्तुलित भइहाल्छ । त्यसैले हाम्रो टिम बलियो छ भनेर खेल्नु अगाडि कुनै अर्थ राख्दैन,’ सोमपालले भने, ‘हाम्रो टिम राम्रो छ । नयाँ छन् । प्रदर्शन गर्न तयार छन् ।’

अत्तरियाका कप्तान दीपेन्द्रसिंह ऐरीले रायन मेरोन र जोन्टी रोड्सको आगमनले टोलीमा केही सुधार देखिएको र राम्रो प्रभाव पार्नसक्ने विश्वास लिए । विदेशी खेलाडी सन्नी पटेल र जयकिसन कोल्सावालाले नेपालको अन्य फ्रेन्चाइज लिगमा पनि राम्रो गरिरहेकाले यसपालि पनि त्यस्तै अपेक्षा गरिएको जनाए ।

गत वर्ष करण केसीले राष्ट्रिय टोलीबाट केही आश्चर्यजनक प्रदर्शन देखाए । त्यसैका आधारमा आफूले अहिले जिम्मेवारीको नेतृत्व पाएको करण बताउँछन् । ‘जहिल्यै पनि प्रदर्शन राम्रो गर्नपर्छ, प्रदर्शन राम्रो गर्दै आएको भएर नै म विराटनगर किंग्सको कप्तान बनाइएको हँु । प्रदर्शनले नै अगाडि लिएर जाने हो । दबाब त हुन्छ नै कप्तानी गर्न, त्यसै पनि यो मेरा लागि पहिलोपल्ट हो,’ करणले विराटनगरको टिम संरचनाबारेमा भने, ‘हामी यहाँ आएको ३ दिन भयो मौसमले गर्दा एक दिनमात्र अभ्यास गर्न पाएका छौं । हाम्रो टिम सन्तुलित र मिलेको छ त्यस हिसाबमा दुई विदेशी खेलाडी हाम्रा लागि बोनस नै हुन्छन् । विदेशी खेलाडीमा भर पर्नुपर्ने स्थिति छैन ।’

रूपन्देही च्यालेन्जर्सका कप्तान वसन्त रेग्मीसहित विनोद भण्डारी, प्रदीप ऐरी, भीम सार्की नेपाली राष्ट्रिय टोलीसँग यूएईमै रहेकाले राम्रो लयमा रहेको टोलीका खेलाडी विक्रम सोब बताउँछन् । ‘बाँकी खेलाडीको एक साता जस्तो भैरहवा क्याम्प राम्रो भयो । बाबर हायत पनि आएकाले हाम्रो टोली बलियो भएको छ । हाम्रो लक्ष्य उपाधि जित्ने नै छ,’ सोबले भने ।

यसअघि आउने भनेका पाकिस्तानी खेलाडी राजा अलिदार नआउने भएका छन् । उनको विकल्पमा रूपन्देहीले चाँडै टुंगो लगाउने सोबले जनाए । मौसमका कारण मैदानमा जान नपाएकाले आफूहरू जिम र फिटनेसमा केन्द्रित भएको महेन्द्रनगर युनाइटेडका खेलाडी आरिफ शेखले बताए । ‘उपाधि जित्ने लक्ष्यसाथ हाम्रो तयारी छ । हाम्रो टिम मिलेको छ, तर जति मिलेको भए पनि प्रदर्शन देखाउनै पर्छ,’ आरिफले भने ।

टिमभन्दा पनि व्यक्तिगत रूपमा तयारी गरिएको काठमाडौं गोल्डेन्सका ब्याट्सम्यान अनिलकुमार शाह बताउँछन् । ‘हाम्रो ब्याटिङ लाइनअप लामै छ, बलिङमा पनि विविधता छ । अनुभवी खेलाडी र विदेशी खेलाडीले गर्दा पनि टिम सन्तुलित देखिएको छ,’ अनिलले भने, ‘सबै टोली उपाधि उचाल्न चाहन्छन्, हामी राम्रो प्रदर्शन गर्ने प्रयास गर्नेछौं ।’

प्रकाशित : माघ २६, २०७५ ०९:३४
प्रतिक्रिया
पठाउनुहोस्
ADVERTISEMENT
ADVERTISEMENT

महिलातर्फ आर्मी च्याम्पियन

कान्तिपुर संवाददाता

काठमाडौँ — त्रिभुवन आर्मी क्लबले वीर गणेशमान सिंह स्मृति राष्ट्रिय खुला बक्सिङको महिलातर्फ ट्रफी जितेको छ । आर्मीले ६ तौल समूहमा तीन स्वर्ण, २ रजत र १ कांस्य पदक जितेको थियो । शुक्रबार वसन्तपुर डबलीमा सम्पन्न फाइनलमा ६४ केजीमुनि तौलमा आर्मीकी पुनम रावलले एपीएफकी सरस्वती रानालाई पराजित गरिन् ।

गणेशमान स्मृति राष्ट्रिय बक्सिङ च्याम्पियनसिपको महिलातर्फ च्याम्पियन ट्रफी उचाल्दै आर्मी खेलाडी । तस्बिर : इलिट जोशी/कान्तिपुर

५७ केजीमुनि आर्मीकी चन्द्रकला थापाले एपीएफकै सुलभ थापामगरलाई हराइन् । ५४ केजीमुनि आर्मीकी मीनु गुरुङले नेपाल पुलिस क्लबकी निशा तामाङलाई हराएर स्वर्ण जितिन् ।

एपीएफका लागि संगीता सुनार र माला राईले स्वर्ण जिते । संगीताले ६० केजीमुनि तौलमा आर्मीकी सविना श्रेष्ठलाई हराइन् । मालाले ५१ केजीमुनि आर्मीकी विमला श्रेष्ठमाथि सफलता पाइन् । ४८ केजीमुनिको स्वर्ण पुलिसकी दिवाना शेर्माले जितिन् । उनलेआफ्नो विभागका लागि एकमात्र स्वर्ण जित्ने क्रममा प्रदेश ५ की सुशीला थापालाई रोकिन् ।

पुरुषतर्फ शुक्रबार सेमिफाइनल खेलहरू भए । ४९ केजीमा एपीएफका प्रदीप महर्जनले प्रदेश ७ का भानु विष्ट र आर्मीका सुशील थापाले प्रदेश ६ का मोहन गुरुङलाई हराए । आर्मीका प्रेम चौधरीले ५२ केजीमा प्रदेश १ का सुलभराज तुलाधरलाई हराए । एपीएफका विक्रम परियारले पुलिसका चन्द्रबहादुर थापालाई हराउँदै फाइनल पक्का गरे ।

एपीएफका पूरन राई प्रदेश २ का गणेश थापालाई हराउँदै ५६ केजीको फाइनल भिडन्तमा पुगे । प्रदेश ७ का महेन्द्र चन्दलाई हराएका आर्मीका विमल रोकाले पूरनसँग फाइनलमा खेल्नेछन् । ६० केजीमा आर्मीका एकबहादुर घले प्रदेश ५ का गणेश थापामगरबाट वाकओभर पाउँदै फाइनल पुगे । पुलिसका दिनेश श्रेष्ठले एपीएफका प्रकाश लिम्बुलाई हराउँदै एकबहादुरसँग स्वर्ण भिडन्त पक्का गरे ।

पुलिसका भूपेन्द्र थापा र एपीएफका सोनाम सार्कीले ६४ केजीको स्वर्णका लागि खेल्नेछन् । भूपेन्द्रले आर्मीका सुरेश नेपालीलाई हराउँदा सोनामले प्रदेश ६ का इन्द्र सुनारलाई रोके । ६९ केजीमा आर्मीका विष्णुप्रसाद घलेले प्रदेश १ का राजेश गुरुङलाई नकआउट गरे । एपीएफका विकास लामाले प्रदेश ३ का मनीष डंगोललाई हराउँदै स्वर्ण भिडन्त पक्का गरे ।

७५ केजी तौलमा एपीएफका सुमन कार्की र आर्मीका दीपक श्रेष्ठ फाइनल पुगेका छन् । सुमनले प्रदेश २ का दिवश गुरुङलाई हराउँदा दीपकले प्रदेश ३ का दिवेश भूमिलाललाई नकआउट गरे । आर्मीका रवि सुनारले प्रदेश ७ का हिक्मतबहादुर शाहीलाई हराउँदै ८१ केजीको फाइनलमा स्थान बनाए । उनलाई प्रदेश ५ का केशर खत्रीले चुनौती दिनेछन् । केशरले प्रदेश ४ का सुसन पुनलाई नकआउट गरे । फाइनल शनिबार हुनेछ ।

प्रकाशित : माघ २६, २०७५ ०९:३२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT