डफिन्ससँग मनाङ स्तब्ध

दीपक परियार

लेखनाथ — सहिद स्मारक लिग विजेता सिग्नेचर मनाङ मस्र्याङ्दी क्लब (एमएमसी) छैटौं मनकामना केबलकार पोखरा कप फुटबलको सेमिफाइनलमा सडनडेथको सिकार बनेको छ । पहिलोपल्ट सहभागीे पाहुना टोली क्यामरुनको डफिन्स टिम फेमिलीले मनाङको चुनौतीलाई सडनडेथमा पन्छाउँदै फाइनल तय गरेको हो । डफिन्सले एपीएफको सामना गर्नेछ ।

मनकामना केबलकार पोखरा कप फुटबलमा शनिबार मनाङका प्रवेश कलवारलाई रोक्दै डफिन्सका बिइक बिइक । तस्बिर : कान्तिपुर

पोखरा रंगशालामा निर्धारित र थपिएको समयमा १–१ गोलको बराबरीपछि खेल पेनाल्टी शुटआउटबाट गयो । पेनाल्टीमा ५–५ खेलाडीले प्रहार गर्दा ४–४ गोल भयो । त्यसपछि खेल सडनडेथमा पुगेको थियो । जहाँ मनाङका विमल रानाको प्रहार बाहिरिएपछि टोलीले विश्राम लिनपुग्यो ।

अफ्रिकी टिमको फाइनल खेल्ने सपना तब साकार भयो जब अन्तिम पेनाल्टीलाई जो अंगोलाले चुकाएनन् । एक गोलले पछि परेको अवस्थामा कमब्याक गरेको मनाङ पेनाल्टीमा चुक्दा भर्खरै सकिएको इटहरी गोल्डकपको हारको क्षतिपूर्ति पोखरामा भर्न पाएन । खेलको ६६ औं मिनेटमा डफिन्सले पहिलो गोल गरेर खाता खोलेपछि नै मनाङ दबाबमा परेको थियो । मनाङले निर्धारित समय सकिनु १० मिनेटअघि गोल फर्काएपछि भने खेलले रोचक मोड लियो ।

इकुमको लामो पासलाई उरेल इनामेले हेडबाट गोल गरेपछि हिलाम्य मैदानमा डफिन्सले अग्रता लियो । बलिया र अग्ला कदका क्यामरुनी खेलाडीका अघि केही छरितो प्रदर्शन गर्दै मनाङ सम्हालिनुपर्‍यो । उत्कृष्ट टिम रहेको संकेत गर्दै ८० औं मिनेटमा मनाङले गोल फर्कायो । विमल रानाको पासमा ओलावाले अफिजको हेड बलले जाली चुम्यो । निर्धारित समय बराबरीमा टुंगिएपछि दर्शकको साथ मनाङलाई झन् बढ्यो । दर्शकलाई निराश बनाएर घर नफर्काउने कोसिसमा थप ३० मिनेटमा मनाङ लागिरह्यो ।

पेनाल्टी शुटआउटमा कप्तान सुजल श्रेष्ठ, अन्जन विष्ट, कमल श्रेष्ठ र हेमन गुरुङको प्रहार गोलमा परिणत भयो । डफिन्सको तर्फबाट पहिलो पेनाल्टी प्रहार गरेका विभ्लाम नै चुकेपछि मनाङका खेलाडीको अनुहारमा आशाका धर्सा कोरिएका थिए । सुरज बिकको प्रहार खेर गएपछि केहीबेर खिन्नता छायो । विमल रानाले सडनडेथमा पुगेर पेनाल्टी गुमाउँदा फाइनलबाट वञ्चित भयो । क्यामरुनका लागि पेनाल्टी शुटआउटमा बिइक बिइक, इकुम, यान्निक ओवोनार र गोलकिपर प्रिसो एनडीटांगाले गोल गरे ।

जर्सी जुधेपछि टस हारेको डफिन्स आयोजक पोखराको जर्सीमा मैदान उत्रिएको थियो । जापानको रिस्सो युनिभर्सिटीलाई हराएर आएको एपीएफसँगको फाइनल खेल क्यामरुनका लागि सहज हुने धेरैको अनुमान छ । क्यामरुनले जिते उचाले पोखराको मैदानमा उपाधि उचाल्ने दोस्रो अफ्रिकन टिम हुनेछ । यसअघि तेस्रो संस्करणको आहा–रारा गोल्डकपमा अफ्रिकन युनाइटेडले नेपाल पुलिस क्लबलाई हराएर उपाधि जितेको थियो ।

प्रकाशित : माघ २७, २०७५ ०८:३८
प्रतिक्रिया
पठाउनुहोस्
ADVERTISEMENT
ADVERTISEMENT

सुशील र दिवाना सर्वोत्कृष्ट बक्सर

कान्तिपुर संवाददाता

काठमाडौँ — त्रिभुवन आर्मीका सुशील थापा र नेपाल पुलिस क्लबकी दिवाना शेर्मा शनिबार वीर गणेशमान सिंह स्मृति राष्ट्रिय खुला बक्सिङ च्याम्पियनसिपको सर्वोत्कृष्ट बक्सिङ खेलाडी भएका छन् ।

सर्वोत्कृष्ट भएसँगै बक्सिङको इतिहासमै पहिलोपल्ट सुशीलले टीभीएसको मोटरसाइकल र दिवानाले स्कुटर पुरस्कार जितेका छन् । दुवै विजेतालाई आयोजक वीर गणेशमान फाउन्डेसनका अध्यक्ष प्रकाशमान सिंह, प्रतियोगिता संयोजक राजीव श्रेष्ठलगायतले पुरस्कृत गरे । वसन्तपुर डबलीमा शनिबार प्रतियोगिताको पुरुषतर्फ आर्मी टिम च्याम्पियन बन्यो । शनिबार ८ फाइनलमध्ये आर्मीले ५ स्वर्ण जितेको थियो । अघिल्लो दिन आर्मीले महिलामा सफलता पाएको थियो ।

पुरुष ४९ केजी तौलमा आर्मीका सुशील थापाले एपीएफका प्रदीप महर्जनलाई हराएर स्वर्ण जिते । प्रदेश ६ का मोहन गुरुङ र प्रदेश ७ का भानु विष्टले कांस्य थापे ।

५२ केजीको स्वर्ण आर्मीका प्रेम चौधरीले एपीएफका विक्रम परियारलाई हराएर जिते । पुलिसका चन्द्रबहादुर थापा र प्रदेश १ का सुलभराज तुलाधर कांस्य जित्न सफल भए ।

आर्मीकै विमल रोकाले ५६ केजीको स्वर्ण भिडन्तमा एपीएफका पूरन राईलाई पराजित गरे । प्रदेश २ का गणेश थापा र प्रदेश ७ का महेन्द्र चन्दले कांस्य पाए ।

पुलिसका दिनेश श्रेष्ठले ६० केजीको स्वर्ण जित्दा आर्मीका एकबहादुर घलेलाई हराए । प्रदेश ५ का गणेश थापामगर र एपीएफका प्रकाश लिम्बुले कांस्य जिते ।

पुलिसका भूपेन्द्र थापाले एपीएफका सोनाम सार्कीलाई हराएर ६४ केजी तौलको स्वर्ण जिते । आर्मीका सुरेश नेपाली र प्रदेश ६ का इन्द्र सुनारले कांस्यमा चित्त बुझाए ।

६९ केजीमा एपीएफका विकास लामाले स्वर्ण, आर्मीका विष्णुप्रसाद घलेले रजत तथा प्रदेश १ का राजेश गुरुङ र प्रदेश ३ का मनीष डंगोल कांस्य पदक जिते ।

एपीएफका सुमन कार्कीले ७५ केजी तौलको फाइनलमा आर्मीका दीपक श्रेष्ठलाई वाकओभर दिए । प्रदेश २ का दिवस गुरुङ र प्रदेश ३ का दिवेश भूमिलालले कांस्य जिते ।

प्रकाशित : माघ २७, २०७५ ०८:३७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT