फेरिएको सीवाईसी अत्तरिया

विनोद पाण्डे

धनगढी — सीवाईसी अत्तरियाका अध्यक्ष नरबहादुर राईको जोस धेरैले बिर्सेका छैनन् । धनगढी प्रिमियर लिग (डीपीएल) क्रिकेटको पहिलो संस्करणको अक्सनमा उनी यति उत्साहित थिए कि ज्ञानेन्द्र मल्ल, करण केसी, योगेन्द्रसिंह कार्कीजस्ता खेलाडीमाथि भाउ लगाउँदै अत्तरियामा ल्याएका थिए । 

सीवाईसी अत्तरियाको जर्सी सार्वजनिक गर्दै दक्षिण अफ्रिका जोन्टी रोड्स (बीच), कप्तान दीपेन्द्रसिंह ऐरीलगायत । तस्बिर : हेमन्त श्रेष्ठ/कान्तिपुर

डीपीएलमा राईको त्यस्तै जोस फेरि कहिल्यै देखिएन । चन्दा उठाउँदै, सामुदायिक हिसाबमा चलेको अत्तरियालाई आर्थिक संकटले च्यापिसकेको थियो । काठमाडौंको अक्सनपछि धनगढी फर्किएका राईलाई आर्थिक पक्ष जुटाउनै हम्मे पर्‍यो । त्यसैले उनी भन्दै थिए, ‘काठमाडौंमा अक्सनमा जोसमा त राम्रा खेलाडीलाई लिन झण्डा उठाइयो, अहिले यहाँ कहाबाट तिर्ने भइरहेको छ ।’

गत वर्षको दोस्रो संस्करणमा पनि अत्तरियाको पीडा उस्तै नै थियो । डीपीएल खेल्ने ६ मध्ये ५ फ्रेन्चाइज टोली धनगढीमै बसेका थिए । भन्नलाई त स्थानीयसँग सामीप्यता बढाउन अत्तरियामै बसेको भनिए पनि वास्तविकतामा प्रायोजकको अभावमा अत्तरियाको टोली धनगढीका होटलमा बस्न नसक्ने स्थितिमा पुगिसकेको थियो । अत्तरियाका सामान्य होटलमा बस्दा खेलाडीको पीडा उर्लिन थालिसकेको थियो ।

स्थिति आइसकेको थियो कि अत्तरियाको टोली पतनको स्थितिमा पुगेको थियो । मात्र औपचारिक निर्णयको पर्खाइमा ।

परिवर्तनको संवाहक
तेस्रो संस्करणको अक्सनमा राई थिएनन् । अत्तरियाका उपाध्यक्ष शर्मानन्द भट्ट, सदस्य अनुप भण्डारी, व्यवस्थापक रजत शाही, निर्देशक शशांक पोखरेलसहित अभिषेक केसी थिए । अत्तरियाको स्वामित्वमा स्पोर्टस एड र हिमालयन ह्वाइटहाउस स्कुल आएपछि पोखरेल र केसी थपिएका हुन् । स्पोर्टस एड र ह्वाइटहाउसले अत्तरियाको समान ३३ प्रतिशत शेयर लिएको छ ।

स्पोर्टस एडले नै नेपाल स्पोर्टस स्कुलसँग मिलेर दक्षिण अफ्रिकी क्रिकेटर जोन्टी रोड्स र रायन मरोनलाई नेपाल ल्याएको थियो । उनै रोड्स र मरोन अहिले अत्तरियामा छन् । रोड्स मेन्टर र मरोन प्रशिक्षक हुन् । रोड्स डीपीएलका पनि सद्भावना दूत हुन् । खेलकुद र शिक्षा क्षेत्रलाई जोड्ने गरी स्पोर्टस एड सेप्टेम्बरमा दर्ता भएको थियो र त्यसको दुई महिनापछि नै विश्व क्रिकेटका फिल्डिङ हस्ती रोड्सको टोलीलाई नेपाल ल्याएको थियो ।

‘मेकिङ अ डिफरेन्स’ स्पोर्टस एडको नारा छ । अर्थात् परिवर्तनको संवाहक । अहिले अत्तरियामा देखिएको परिवर्तन पनि यही नै हो । रोड्सको चाहना पनि यस्तै छ । उनी आफू विभिन्न देशका लिगहरूको टिमको प्रशिक्षक र मेन्टर भएर थाकिसकेको बताउँछन् । त्यसै कारण फरक रूपमा कसैले केही गर्न खोजेको छ भने त्यसमा उनी सामुदायिक हिसाबमा काम गर्न इच्छुक थिए ।

पहिलोपल्ट नेपाल आउँदा उनले नेपाली यू–१९ टोली र अन्य युवा खेलाडीलाई प्रशिक्षण दिएका थिए । त्यसलगत्तै उनी परिवारसहित अन्नपूर्ण पदयात्रामा आए र आफ्नो उद्देश्य राखे । अभिषेक केसी र डीपीएलका अध्यक्ष सुवास शाहीसँग पोखरामा छलफल भएपछि उनी अत्तरियामा आबद्ध हुनपुगे ।

‘जोन्टीको जुन व्यक्तित्व र खेलाडी जीवन छ, त्यस हिसाबमा उनी जुनै टिममा बसेको भए पनि हुन्थ्यो । अत्तरिया सामुदायिक हिसाबमा चलिरहेको भएर हामी त्यसमा आबद्ध भएका छौं,’ अत्तरियामा स्पोर्टस एडबाट लगानी गरेका केसीले भने, ‘जोन्टी र रायनले अत्तरियाको विद्यालयमा गएर क्याम्प गर्नेछन् । डीपीएल र अत्तरिया व्यावसायिक इभेन्ट भए पनि उनीहरू सामुदायिक हिसाबमा कार्य गर्नलाई बढी उत्साही छन् ।’

भन्दा हतार होला तर अत्तरियामा एउटा एकेडेमी बनाउने योजना रहेको केसी सुनाउँछन् । रोड्स र मरोनमार्फत दक्षिण अफ्रिकाको केपटाउनस्थित एक एकेडेमीसँग अत्तरियाको एकेडेमीलाई जोड्ने दूरगामी योजना पनि उनीहरू सँग छ । केसी भन्छन्, ‘सीवाईसी अत्तरियाले पहिला अरु पनि कार्य गथ्र्यो, अहिले क्रिकेटले बढी एक्सपोज गराएको छ । खेलाडीहरू र टिम सबै नयाँ व्यवस्थापनमा सन्तुष्ट छन् ।’

कागजी हिसाबमा अत्तरिया डीपीएल–३ को सबैभन्दा कमजोर टोली देखिएको छ । दीपेन्द्रसिंह ऐरीको कप्तानीमा रहेको अत्तरियामा सन्दीप जोरा, भुवन कार्की, सुवेन्दु पाण्डे, रामनरेश गिरी, प्रेम तामाङलगायत खेलाडी छन् । नेपाली भूमिमा चलेका भारतीय खेलाडी सन्नी पटेल र जयकिसन कोल्सावाला थपिएकाले टोलीलाई केही बल प्रदान गरेको छ । दुई महिनाअघि काठमाडौंमा अक्सन हुँदा अत्तरिया स्टार र चल्तीका खेलाडीको नाम आउँदा मौनजस्तै बसेको थियो ।

बरु त्यसको तुलनामा अत्तरियाले जितेन्द्रसिंह ठकुरी, रित गौतम, दीपेन्द्र राउत, अदिल अन्सारीजस्ता युवा र नयाँ खेलाडीलाई लिएको थियो । जितेन्द्र र रितले उमेर समूहमा नेपालको प्रतिनिधित्व गरिसके पनि अदिल र दीपेन्द्र राष्ट्रिय क्रिकेटमा देखिन बाँकी खेलाडी हुन् । यो सबै रोड्स र मरोनको सल्लाहबमोजिम गरिएको थियो ।

यी चारै खेलाडीलाई नेपाल क्रिकेट स्कुलबाट रोड्स र मरोनले प्रशिक्षण दिएका थिए । ‘अक्सनमा यी खेलाडीमाथि भाउ नलाग्ने सम्भावना पनि रहन्थ्यो । तर प्रशिक्षण क्याम्पमा जोन्टी र रायनले हेरिसकेका थिए । त्यसमा जितेन्द्रको खेलबाट निकै प्रभावित भए । सोही कारण उनीहरूलाई हामीले नै निवेदन हाल्न भनेर अक्सनमा ल्याएका थियौं,’ केसीले भने ।

सन्दीप जोरा र कमलसिंह ऐरी पनि नेपाली यू–१९ खेलाडीको हैसियतमा रोड्स र मरोनको प्रशिक्षण क्याम्पमा आएका थिए । त्यसैले रोड्स र मरोन यी ६ खेलाडीसँग परिचित छन् । युवा खेलाडीलाई लिएर विकास गर्दै जाने र २०२३ सम्ममा माथिल्लो स्तरमा पुर्‍याउने भनेर अक्सनमा त्यहीअनुरुप खेलाडी लिइएको केसी बताउँछन् ।

डीपीएलपछि के त भन्ने प्रश्नमा केसले उनीहरूले ती खेलाडीलाई विभिन्न भ्रमणमा पठाउन लागिएको योजना सुनाए । ‘जोन्टीजस्ता व्यक्तित्व डीपीएलमाआउनु भनेको नेपाली क्रिकेटकै ठूलो विषय हो । अत्तरियाका लागि त भइहाल्यो ।उनको आगमनमा हामी सबै उत्साहीछौं,’ केसीले भने ।

रोड्सको आगमनले एक दिनमै अत्तरियाको खेलाडीमा आएको प्रभाव केसीले देखिइसकेका छन् । वर्षाले क्रिकेट मैदानहरू भिजाइएका कारण अत्तरियाको टोली फुटसल मैदानमा शारीरिक अभ्यास गर्न व्यस्त छ । ‘५० वर्षे जोन्टी आफूहरूभन्दा फिट देखिएकोमा युवा खेलाडीको मानसिकतामा धेरै परिवर्तन आइसकेको छ,’ रोड्सको प्रभाव नेपाली क्रिकेटमै देखिनेमा केसी विश्वस्त छन् ।

अत्तरिया टिमलाई मेन्टर गरेर एउटा खेलाडीले प्रतियोगितालाई लिने दृष्टिकोण र व्यवहारमा परिवर्तन ल्याउन चाहन्छु,’ धनगढी आएदेखि निकै सामान्य हिसाबमै घुलमिल गरिरहेका रोड्सले भने, ‘म डीपीएललाई लिएर निकै उत्साही छु र आफ्नो तर्फबाट यसमा महत्त्व दर्शाउन चाहन्छु ।’

अत्तरियाको प्रमुख प्रायोजकमा हिमालयन ह्वाइटहाउस स्कुल एन्ड कलेज छ । विनोद दासदेखि पारस खड्कासम्म यही कलेजका विद्यार्थी थिए । यही कारण कलेज धेरै चिनियो । अहिले हाइटहाउस यस्तै नाम कमाउने आशामा ठूलो योजनासाथ अत्तरियामा जोडिएको यसका अध्यक्ष युवराज शर्मा सुनाउँछन् ।

सिर्जनशील युवा
सिर्जनशील युवा क्लब अर्थात सीवाईसी । यही नामले टोलीले धनगढीमा पहिलो फ्रेन्चाइज लिग धनगढी क्रिकेट लिग (डीसीएल) मा खेलेको थियो । त्यसको अर्को वर्ष डीसीएल र होटल डिभोटी एसपीए कपलाई गाभिँदै डीपीएल बनाइयो । सीवाईसीको पहिचानसँग अत्तरिया पनि जोडियो ।

आर्थिक पक्षले धान्न नसकेपछि फ्रेन्चाइज लिगमा पतनको स्थितिमा पुगेको सीवाईसी अत्तरियाको रूप अहिले फेरिएको छ । हाइटहाउससँग प्रायोजन सम्झौता गरिरहँदा राईमा ३ वर्षअघिको उत्साह फर्केर आएको देखिन्थ्यो । यसपालि टोली सन्तुलित बनेको र जोन्टी अनि रायनको आगमनले उत्साहित बनाएको बताइरहँदा उनी आफ्नो खुसी लुकाउन सकिरहेका थिएनन् ।

प्रकाशित : माघ २७, २०७५ ०८:४२
ADVERTISEMENT
प्रतिक्रिया
पठाउनुहोस्

पहिलो पुस्ताका प्रशिक्षक र खेलाडी सम्मानित

विनोद पाण्डे, मोहन बुढाऐर

धनगढी — नेपालका पहिलो अन्तर्राष्ट्रिय क्रिकेट प्रशिक्षक सुनोज भट्टराई र पूर्व कप्तान पवन अग्रवाल एउटै मञ्चमा सम्मानित भएका छन् । रुस्लान धनगढी प्रिमियर लिग (डीपीएल) क्रिकेटको आयोजक धनगढी क्रिकेट एकेडेमी (डीसीए) ले दुवैलाई शनिबार उद्घाटनका क्रममा सम्मान गरेको हो ।

अर्जुन खड्का स्मृति प्रशिक्षक सम्मान पाएपछि सुनोज भट्टराई र धनगढी क्रिकेट सम्मान पाएपछि पूर्व कप्तान पवन अग्रवाल । तस्बिर : हेमन्त श्रेष्ठ/कान्तिपुर

भट्टराईलाई ‘अर्जुन खड्का स्मृति प्रशिक्षक सम्मान’ र अग्रवाललाई ‘धनगढी क्रिकेट सम्मान’ प्रदान गर्‍यो । दुवैको राशि जनही १ लाख रुपैयाँ रहेको छ । डीसीएले डीपीएलको उद्घाटन दिन हरेक वर्ष यो पुरस्कार दिने गर्दछ । विगतका वर्षमा पुबुदु दासानायके, प्रफुल्ल वैद्य, जगत टमाटा, जंगबहादुर थापा, अरुण अर्याल र राजुखड्काले यो पुरस्कार पाइसकेका छन् ।

भट्टराई नेपालका अन्तर्राष्ट्रिय प्रशिक्षक हुन् । उनकै प्रशिक्षणमा नेपालले सन् १९९६ मा मलेसियामा एसीसी ट्रफी खेलेको थियो, जुन नेपालको पहिलो अन्तर्राष्ट्रिय प्रतियोगिता थियो । नेपाली क्रिकेटको पहिलो पुस्ताका अग्रवाल त्यस टोलीका खेलाडी हुन् । भट्टराईकै प्रशिक्षणमा नेपाल आईसीसी यू–१९ विश्वकपमा पुगेको थियो । सन् १९९९ मा सिंगापुरमा सम्पन्न एसीसी यू–१९ कपमा भट्टराईको प्रशिक्षणमा फाइनल पुग्दै नेपाल यू–१९ विश्वकपमा पुगेको थियो । त्यसपछि भने उनले कुनै अन्तर्राष्ट्रिय प्रतियोगितामा नेपाली टोली हेरेका छैनन् ।

‘म क्रिकेटमा निरन्तर नै छु । देखाउनलाई बजारी रूपमा होइन क्रिकेटको गुण निकाल्ने कार्यमा सक्रिय छु । म बोक्राभित्रको फल जस्तै हुँ । बाहिरबाट नदेखिने भित्रै गएर हेर्नुपर्ने,’ डीसीएका स्वर्गीय प्रशिक्षक अर्जुन खड्काको नाममा स्थापित पुरस्कारबाट सम्मानित भएपछि भट्टराईले भने, ‘गत वर्ष अरुणसर (अर्याल) ले पाउँदा नै म धेरै खुसी भएको थिएँ । तर मैले यो पुरस्कार, सम्मान कहिल्यै आशा गरेको थिइनँ । डीपीएलले नेपाली प्रशिक्षकलाई सम्झेको छ, त्यसैले म आयोजकलाई धन्यवाद दिन चाहन्छु ।’

उनी ३३ वर्षदेखि राष्ट्रिय खेलकुदपरिषद्को प्रशिक्षकमा कार्यरत छन् । ५७ वर्षे उनले ३–४ महिनापछि अवकाश पाउँदै छन् । परिषद्को जागिरे प्रशिक्षकका क्रममा उनी २०५२ सालमा धनगढी आएका थिए र कैलाली जिल्लाको प्रशिक्षक भएर राष्ट्रिय प्रतियोगितामा टिम ओरालेका थिए । त्यही कैलाली टोलीका कप्तान जगत टमाटा अहिले राष्ट्रिय टोलीका प्रशिक्षक छन् । क्रिकेट संघले आवश्यक नदेखिएका कारण आफू बीचमा हराएजस्तो भएको उनको तर्क थियो ।

सन् १९९६ मा पहिलो एसीसी ट्रफी खेल्नेक्रममा अग्रवालले ब्रुनाईविरुद्ध बनाएको ८१ रन नेपाली खेलाडीको आधिकारिक अन्तर्राष्ट्रिय प्रतियोगितामा पहिलो अर्धशतक हो । उनकै कप्तानीमा नेपालले २००० यूएईमा एसीसी ट्रफी खेलेको थियो । नेपाल त्यहीबाट पहिलोपल्ट एसीसी ट्रफीको सेमिफाइनल पुगेको थियो । उनले २००१ मा क्यानडामा सम्पन्न आईसीसी ट्रफीसम्म राष्ट्रिय टोलीबाट खेले ।

‘जब कसैले तपाईको प्रयासलाई कदर गर्छ भने त्यसले अझ राम्रो गर्न प्रोत्साहित गर्छ । सम्मान पाउनु मेरा लागि सौभाग्यको विषय हो । क्रिकेट खेल्दाखेरि यसरी सम्मान पाइएला भनेर सोचिएको थिएन, आज त्यो दिन पनि आएको छ,’ सम्मानपछि अग्रवालले भने, ‘पहिला र अहिलेको क्रिकेटको माहोल नै फरक छ । पहिला क्रिकेट बुझ्ने नै कम थिए । अहिले डीपीएल र क्रिकेट भनेपछि धेरै ठूलो रुचिको विषय भइसकेको छ । एउटा खेलाडीको रूपमा अझ खेल्न मजा आउने माहोल छ । त्यस हिसाबमा अलिक चाँडो जन्मिएर खेलिएछ जस्तो पनि लाग्छ ।’

अग्रवालले प्राप्त सम्मान रकम ‘ड्रिम फाप्ला’ मैदान निर्माण अभियानलाई नै प्रदान गरेका छन् । मैदान बनाउनदेखि डीपीएल आयोजना गर्न धेरै दु:ख बेहोरिरहेको अवस्थामा आफूले एउटा सानो सहयोग गरेको उनले सुनाए । सन् २००६ देखि २०११ सम्म नेपाल क्रिकेट संघका सदस्य रहेका अग्रवाल अन्तर्राष्ट्रिय क्रिकेट परिषद्ले केही समयअघि बनाएको सल्लाहकार समितिका सचिव पनि हुन् ।

होटलमा उद्घाटन
डीपीएलको ‘सफ्ट’ उद्घाटन होटल फ्लोरामा गरिएको छ । निर्धारित तालिकाअनुसार शनिबार डीपीएला सुरु हुने कार्यक्रम थियो । सोहीक्रममा उद्घाटन समारोह पनि राखिएको थियो । तर बुधबार रातिदेखिको वर्षाले मैदान हिलाम्ये बनाएका कारण आयोजकले खेलहरू दुई दिन पछि सारिसकेको छ ।

खेल सोमबार सुरु हुनेछ । सामान्य हिसाबमा होटलमै उद्घाटन समारोहलाई भने निरन्तरता दिइएको हो । सुदूरपश्चिमका मुख्यमन्त्री त्रिलोचन भट्टले म्याच रेफ्री मोहम्मद सफिक (समिर खान) लाई म्याच बल प्रदान गरी प्रतियोगिताको उद्घाटन गरेका थिए । उनले फाप्लालाई विधिवत रूपमा लगेर अन्तर्राष्ट्रिय रंगशाला बनाउने दृढता जनाए । निजी र सरकारको लगानीमा नमुना रंगशाला बनोस् भन्ने प्रदेश सरकारको चाहना रहेको जनाए ।

सुदूरपश्चिम प्रदेशका आन्तरिक मामिलामन्त्री प्रकाश शाहले डीपीएल सुदूरपश्चिमको गौरव र राष्ट्रको कोसेढुंगा भएको जनाए । आर्थिक मामिलामन्त्री झपटबहादुर बोहराले डीपीएल रड्रिम फाप्लालाई सहयोग गर्न प्रदेश सरकारले कुनै कसुर बाँकी नराख्ने प्रतिवद्धता जनाए । डीसीएका अध्यक्ष सुवास शाहीले सबैको साथमा प्रतियोगिताले ठूलो रूप लिइरहेको बताए ।

प्रकाशित : माघ २७, २०७५ ०८:४०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT